«My nie adny ŭ kosmasie». Novaja spravazdača Pientahona pra NŁA vyklikała sprečki ŭ Kanhresie ZŠA
Ministerstva abarony ZŠA za try hady zafiksavała zvyš 1600 vypadkaŭ źjaŭleńnia NŁA pa ŭsim śviecie (asabliva nad jadziernymi i vajskovymi abjektami), pryroda kala dvuch sotniaŭ ź jakich dahetul zastajecca niavyznačanaj. Byłyja vysokapastaŭlenyja čynoŭniki Pientahona i NASA raskrytykavali dakład za «niedastatkovuju ščyraść» i zajavili na słuchańniach u Kanhresie, što niekatoryja z hetych źjavaŭ źviazanyja z technałohijami, jakija nie naležać čałaviectvu.
Upraŭleńnie pa adsočvańni anamalij ZŠA (All-Domain Anomaly Resolution Office, AARO), jakoje padparadkoŭvajecca Ministerstvu abarony ZŠA, pradstaviła ŭ amierykanskim Kanhresie dakład ab fiksacyi i vyvučeńni vypadkaŭ nazirańnia nieapaznanych latajučych abjektaŭ (NŁA) u pieryjad z 2021 pa kastryčnik 2024 hoda.
Pavodle spravazdačy, za try hady Pientahon zafiksavaŭ 1652 vypadki NŁA, 757 ź jakich adbylisia z maja 2023 pa červień 2024. Pieravažnaja bolšaść abjektaŭ, jak pakazvaje analiz, akazalisia dronami, samalotami, pavietranymi šarami, ptuškami i spadarožnikami.
Adnak pryroda 170 vypadkaŭ NŁA za try hady (122 ź ich — z maja 2023 pa červień 2024) dahetul zastajecca niavyznačanaj. Bolšaść z vypadkaŭ była zafiksavanaja ŭ rajonach prysutnaści ŭzbrojenych sił ZŠA pa ŭsioj płaniecie (ź ich 60 vypadkaŭ nad Uschodniaj Azijaj i 44 nad Bližnim Uschodam) i pablizu amierykanskaj jadziernaj infrastruktury, uklučajučy schoviščy jadziernaj zbroi i rakietnyja startavyja placoŭki (18 vypadkaŭ NŁA niavyznačanaj pryrody), paviedamlaje AARO.
U spravazdačy pryviedzieny pakazańni vidavočcaŭ datyčna nazirańnia NŁA niavyznačanaj pryrody. Siarod ich jość takija apisańni, jak «zialony ahniavy šar», «mieduza z roznakalarovymi ahniami» abo «srebnaja rakieta daŭžynioj kala 2 mietraŭ».
U dakładzie taksama adznačajecca, što pavodziny hetych abjektaŭ nie adpaviadali viadomym typam pavietranych srodkaŭ, takich jak drony, pavietranyja šary abo samaloty. Niekatoryja z hetych vypadkaŭ charaktaryzavalisia «niezvyčajnaj chutkaściu, zdolnaściu imhnienna źmianiać kirunak albo ruchacca biez prykmietnaha ruchavika».
Niahledziačy na zahadkavyja pavodziny i niavyznačanuju pryrodu šerahu abjektaŭ, AARO u dakładzie padkreśliła, što «da hetaha času niama paćvierdžańnia, što zafiksavanyja vypadki źviazanyja ź inšapłanietnymi technałohijami ci dziejnaściu zamiežnych dziaržaŭ».
«My nie možam vyklučyć nivodnaha scenaru, ale na siońnia niama ničoha, što b paćvierdziła inšapłanietnaje pachodžańnie hetych abjektaŭ. My praciahvajem zbor danych sumiesna z NASA i našymi zamiežnymi sajuźnikami, kab lepš razumieć pachodžańnie hetych źjavaŭ i acanić ich patencyjny ŭpłyŭ na našu biaśpieku», — havorycca ŭ dakumiencie.
Razam z tym, na fonie publikacyi dakłada AARO u Kanhresie ZŠA ŭźnikła sprečka. Niekalki byłych vysokapastaŭlenych čynoŭnikaŭ Pientahona i NASA zajavili na słuchańniach, što amierykanski ŭrad «niedastatkova ščyry» ŭ adnosinach da hramadstva i «vydatna viedaje pachodžańnie abjektaŭ».
«NŁA realnyja, i niekatoryja z hetych technałohij nie byli stvorany ni našym uradam, ni inšymi dziaržavami. Jany adsočvajuć vajskovyja abjekty pa ŭsim śviecie.
Choć bolšaja častka majoj 15-hadovaj pracy na ŭrad ZŠA pa pytańni NŁA ŭsio jašče zastajecca kanfidencyjnaj, hetaja praźmiernaja sakretnaść pryviała da surjoznych parušeńniaŭ pravoŭ asobnych dziaržsłužačych, hramadzian i vajskoŭcaŭ — usio heta, kab schavać ad hramadskaści toj fakt, što my nie adny ŭ kosmasie», — zajaviŭ były vysokapastaŭleny čynoŭnik Pientahona Łuis Elizonda na słuchańniach u Kanhresie ZŠA.
Cim Hała, kontr-admirał VMS ZŠA ŭ adstaŭcy, padzialiŭsia na słuchańniach, što ŭ 2015 hodzie jon asabista naziraŭ NŁA padčas vajennych vučeńniaŭ na ŭschodnim uźbiarežžy ZŠA. Hała sa spasyłkaj na tahačasnyja danyja sensaraŭ źniščalnikaŭ śćviardžaŭ, što «abjekt vałodaŭ charaktarystykami, jakich nie isnuje ŭ amierykanskim arsienale», i dadaŭ, što paśla incydentu infarmacyja ab abjekcie była zasakrečanaja tak, što navat jaho ŭzroŭniu dostupu było niedastatkova.
A były čynoŭnik NASA Majkł Hołd, jaki ŭvachodziŭ u skład śpiecyjalnaj hrupy ahienctva pa daśledavańniu NŁA, zaklikaŭ urad ZŠA «nie pieraškadžać navukovamu dyjałohu ab nievytłumačalnych źjavach i pašyryć dostup hramadstva da zakrytych danych».
Ciapier čytajuć
«Moža, bajaŭsia zastavacca ŭ šlubie sa mnoj, bo pracuje na BT». Nastaŭnica, jakaja źjechała praz danosy Bondaravaj, raspaviała pra razvod i žyćcio ŭ emihracyi1414
Kamientary
1) Aha, kitajcy i CRU ab hetym ničoha nia viedaje. Śmiešna.
2) Kudy skiravać uvahu zamiežnych vyviedak? Siońnia niemahčyma zrabić niejki sakretny latak i pravodzić jaho ispyty, kab ciabie na zasiakli sa spadarožnikaŭ. Tyja ž kitajcy. My nie ŭ 1945 žyviom. Siońnia ŭsie navidavoku.
1) čamu ž, adzin z bakoŭ budzie viedać, što heta za štučki lotajuć nad miescami raźmiaščeńnia vajskovych abjektaŭ. Miarkuju, što heta Kitaj. Bo CRU niama patreby špijonić za vajskovymi abjektami ŭłasnaj krainy. Zirnicie na mapu, tam ZŠA, Japonija/P.Kareja dy Blizki Ŭschod...a Kitaja niamaaaa...:)))
2) latak, dy jahonyja vyprabavańni, mažliva j nie schavaješ, a voś technalohii jahonaha stvareńnia - zusim inšaja sprava. Voś tamu j blefujuć, kab skiravać u bok resursy, srodki, čałaviečyja vysiłki čužoj vyviedki.
Zastaniecca tolki siadzieć dy fiksavać, chto sunie ŭ pustuju skryniu svoj doŭhi nos. Pramysłovy špijanaž jašče nichto nie admianiaŭ.