Julija Daraškievič i Andrej Dyńko stali laŭreatami premii «Za mužnaść i prafesijanalizm».
Julija Daraškievič i Andrej Dyńko stali laŭreatami premii «Za mužnaść i prafesijanalizm».
30 žniŭnia rasiejski Pieršy kanał i Biełaruskaja asacyjacyja žurnalistaŭ abvieścili imiony laŭreataŭ premii «Za mužnaść i prafesijanalizm» imia Źmitra Zavadzkaha za 2006 hod. Jaje ŭładalnikami stali hałoŭny redaktar «Našaj Nivy» Andrej Dyńko, fotakarespandent hazety Julija Daraškievič, žurnalist «Komsomolskoj pravdy» v Biełoruśsii» Aleh Ulevič.
Nahadajem, što Andrej Dyńko adsiedzieŭ u sakaviku 10 sutak u specpryjomniku-raźmierkavalniku na Akreścina. Julija Daraškievič mužna vykonvaje svaje prafesijnyja abaviazki, niahledziačy na šmatlikija pieraškody z boku pravaachoŭčych orhanaŭ. Aleh Ulevič byŭ žorstka źbity 2 sakavika la ścienaŭ Kastryčnickaha RUUS Miensku padčas aśviatleńnia zatrymańnia eks-kandydata ŭ prezydenty Alaksandra Kazulina.
Daviedka «Našaj Nivy»
Premija «Za mužnaść i prafesijanalizm» imia Źmitra Zavadzkaha była zasnavana ŭ 2002 h. u pamiać źnikłaha 7 lipienia 2000 h. aperatara ORT supracoŭnikami kanału (ciapier – Pieršy kanał). Paźniej da vyznačeńnia kandydataŭ dałučyłasia Biełaruskaja asacyjacyja žurnalistaŭ. Uručajecca albo biełaruskim žurnalistam, albo žurnalistam, što pracujuć u Biełarusi i sutykajucca ź pieraškodami ŭ aśviatleńni važnych hramadzka-palityčnych padziej dy zaznajuć ucisk z boku ŭładaŭ ci pravaachoŭnych orhanaŭ.
Pieršymi ŭładalnikami premii stali teleaperatary Siarhiej Hielbach, Siarhiej Puškin, Kanstancin Marozaŭ, Uładzimier Andronaŭ, Uładzimier Babaryka.
U 2003 h. premiju atrymali fotakarespandenty Siarhiej Hryc, Vasil Fiadosienka, a taksama «Biełorusskaja diełovaja hazieta».
U 2004 h. – Infarmacyjnaja kampanija BiełaPAN, Iryna Chalip («Novaja hazieta»), Maryna Koktyš («Narodnaja vola») i teležurnalist Leanid Mindlin.
Letaś premiju atrymali: karespandent RIEN-TV u Miensku Alena Słaŭ, aperatar Ŭładzimier Kościn, žurnalist radyjo «Svaboda» Luboŭ Łuniova, redaktar «G?os z-nad Niemna» Andžej Pisalnik, žurnalist «Biełorusskoj diełovoj haziety» Siarhiej Sacuk.
Sioleta z šaści kandydataŭ byli ŭchvalenyja kandydatury troch žurnalistaŭ.
Premija nia maje hrašovaha vymiareńnia i ŭjaŭlaje saboju vyjavu linzy abjektyva kamery na čornaj padstaŭcy. Akramia taho ŭhanaravanyja žurnalisty atrymlivajuć hramatu za podpisam hiendyrektara Pieršaha kanału Kanstancina Ernsta.
Cyrymonija ŭznaharodžvańnia projdzie ŭ pačatku vieraśnia.
Julija Daraškievič
«Hety hod byŭ nasyčany padziejami, jak stanoŭčymi, tak i nia vielmi. Było šmat pracy dla žurnalistaŭ. Mnie vielmi pryjemna, što maju pracu zaŭvažyli i acanili».
Andrej Dyńko
«Kab ža Pieršy kanał jašče pra Biełaruś paviedamlaŭ narmalna... Hetuju premiju prysudžaje žurnaliscki kalektyŭ kanału. I vybar laŭreataŭ -- faktyčna vykaz niazhody žurnalistaŭ z redakcyjnaj palitykaj kanału. Dziakuj im za salidarnaść. Chaj hetaja premija pakładziecca cahlinaj u padmurak budučych, novych adnosinaŭ svabodnaj Rasiei z svabodnaj Biełaruśsiu».
Ciapier čytajuć
U Minsku adbylisia masavyja zatrymańni vydaŭcoŭ i kniharaspaŭsiudnikaŭ23
Kamientary