Upieršyniu za paŭstahodździa vučonyja zrabili praryŭ u lekavańni astmy i chraničnaha branchitu

Astma źjaŭlajecca adnym z asnoŭnych nieinfiekcyjnych zachvorvańniaŭ, ad jakoha pakutujuć jak dzieci, tak i darosłyja. Pry hetym u dziaciej jana źjaŭlajecca adnym z najbolš raspaŭsiudžanych chraničnych zachvorvańniaŭ.

Va ŭsim śviecie, pavodle danych Suśvietnaj arhanizacyi achovy zdaroŭja (SAAZ), ad astmy pakutuje kala 5% darosłaha nasielnictva i 10% dziaciej. Pa infarmacyi ministerstva achovy zdaroŭja, u Biełarusi ŭ 2023 hodzie było zafiksavana zvyš 73 tysiač vypadkaŭ hetaha zachvorvańnia ŭ darosłych, pry hetym u zvyš 4300 — upieršyniu.

Što tyčycca chraničnaha branchitu (aficyjnaja nazva — chraničnaja abstruktyŭnaja chvaroba lohkich), to, pa infarmacyi SAAZ, hetaja chvaroba zajmaje čaćviortaje miesca siarod pryčyn śmierci ŭ śviecie.

Za apošnija 50 hadoŭ lačeńnie abodvuch zachvorvańniaŭ istotna nie źmianiłasia. Asnoŭnymi mietadami zastajucca inhalacyjnyja korcikasteroidy dla kantrolu zachvorvańnia i sistemnyja steroidy pry abvastreńniach.

Jak piša The Gardian, vučonyja ź Vialikabrytanii prapanavali novy mietad lačeńnia ciažkich prystupaŭ astmy i chraničnaha branchitu. I heta pieršy značny praryŭ za apošnija paŭstahodździa, jaki moža stać sapraŭdnaj revalucyjaj u lačeńni.

Vynikami svajho daśledavańnia vučonyja padzialilisia na staronkach časopisa Lancet Respiratory Medicine. 

Jak pišuć aŭtary, jany pasprabavali pa-inšamu vykarystać viadomy preparat dla lačeńnia astmy — bienralizumab. Zvyčajna jaho ŭžyvajuć u nizkaj dozie dla padtrymlivajučaha lačeńnia ciažkaj astmy, adnak daśledavańnie pakazała, što adnarazovaja injekcyja padvyšanaj dozy preparatu niepasredna ŭ čas abvastreńnia bolš efiektyŭnaja za steroidnyja tabletki, jakija na hety momant źjaŭlajucca adzinym dastupnym varyjantam lačeńnia.

U daśledavańni, jakoje było praviedziena na bazie Karaleŭskaha kaledža Łondana, uziali ŭdzieł 158 pacyjentaŭ, jakija źviarnulisia pa miedycynskuju dapamohu ŭ adździaleńnie nieadkładnaj dapamohi z-za prystupu astmy ci chraničnaha branchitu.

Pacyjentam praviali chutki analiz kryvi i adabrali tych, u kaho byŭ eazinafilny typ abvastreńnia. Pavodle danych navukoŭcaŭ, taki typ maje pałova prystupaŭ astmy i tracina chraničnaha branchitu. 

Pacyjenty byli vypadkovym čynam padzielenyja na try hrupy. Adna hrupa atrymała injekcyju bienralizumabu i tabletki-pustyški, inšaja — standartnaje lačeńnie pradnizałonam (30 mł štodzionna na praciahu piaci dzion) i fiktyŭnuju injekcyju, treciaja atrymała jak injekcyju bienralizumabu, tak i steroidy.

Jak pišuć aŭtary, praz 28 dzion nazirałasia značnaje palapšeńnie simptomaŭ u pacyjentaŭ pieršaj i treciaj hrup, jakija atrymlivali injekcyi bienralizumabu. Praz 90 dzion u hetych hrupach było ŭ čatyry razy mienš ludziej, u jakich lačeńnie nie dało efiektu, u paraŭnańni z hrupaj, jakaja atrymlivała tolki steroidy.

Daśledavańnie pakazała, što lačeńnie z vykarystańniem injekcyi bienralizumabu pryviało da bolš praciahłaha palapšeńnia stanu pacyjentaŭ, što aznačała bolš redkija ich zvaroty da doktara abo ŭ balnicu. Akramia taho, pacyjenty paviedamlali pra lepšuju jakaść žyćcia pry novym režymie lačeńnia.

Navukoŭcy adznačyli, što steroidy, jakija prymianiajucca dla lačeńnia abvastreńniaŭ astmy i chraničnaha branchitu, mohuć mieć surjoznyja pabočnyja efiekty, takija jak pavieličeńnie ryzyki dyjabietu i asteaparozu. Tamu pierachod na bienralizumab, jaki pracuje inakš i maje mienš pabočnych efiektaŭ, moža istotna palepšyć stan pacyjentaŭ i źnizić ryzyki, źviazanyja z praciahłym užyvańniem steroidaŭ.

• 10
• 0
• 0
• 0
• 0
• 1
• 0
• 0