Adziny prałukašenkaŭski kanał na biełaruskaj movie prypyniaje svaju pracu
Stvaralnica telehram-kanała «Vieraščaka» Zoja Sierada napisała, što nie maje času na stvareńnie kantentu, ale, mahčyma, jana nie vytrymała cisku z boku prarasijskich aktyvistaŭ.
«Užo bolš za hod minuła z taho momantu, kali ja vyrašyła stvaryć hety biełaruskamoŭny kanał. Rašeńnie heta ŭźnikła nie spantanna, ja da jaho išła peŭny čas, kali biełaruskamoŭnyja resursy, jakija ja spažyvała, adzin za druhim traplali ŭ śpis zabaronienych, a zamiest ich nichto ničoha nie prapanavaŭ. Vyhladaje heta sumna, ale i zaraz situacyja takaja ž. Biełaruskaja mova źnikaje navat z adzinaha nibyta biełaruskaha kanała telebačańnia. Ale…
Ale na žal, z novaha hoda času na Vieraščaku ŭ mianie ŭžo nie zastaniecca. Usio ž kantent treba nie tolki kinuć na kanał, ale i znajści jaho, i pierapracavać, časam pierakłaści z ruskaj na biełaruskuju movu. Tamu ŭ nas z vami apošnija dni.
Nie zasmučajciesia vielmi, znosić kanał ja nie budu. Tym bolš, što z vami zastaniecca jašče adzin admin. Prosta pastajannych publikacyj i rubryk tut užo nie budzie dakładna. Kali patraplu na što cikavaje, to padzialusia z vami, a nie, to i nie», — piša Sierada.
Jana prapanavała padpisčykam dałučacca da viadzieńnia kanała, kali chto maje žadańnie dapamahčy.
Zoja Sierada, aŭtarka kulturnaha kanała «Vieraščaka», žyvie ŭ ahraharadku Narač Miadzielskaha rajona, pracuje ŭ dziciačym sadzie i zachaplajecca lalečnym mastactvam.
U svaim kanale jana niaredka vyśmiejvała Bondaravu i jaje pamahatych, jakija nie tolki zaklikajuć źniščać usio biełaruskaje, ale i niaredka vykazvajuć z hetaj nahody kramolnyja dumki nakont biełaruskich uładaŭ.
Prarasijskija aktyvisty chejciać kanał Sierady za prabiełaruskaść, što jany atajasamlivajuć z rusafobijaj. Jany taksama abvinavacili Zoju Sieradu ŭ pryznańni telehram-kanała «Za Sajuznuju dziaržavu Biełarusi i Rasii» ekstremisckim. Kanał hety mieŭ vyraznuju antybiełaruskuju skiravanaść.
Hałoŭny ideołah Biełarusi znajšoŭ u krainie «psieŭdapatryjatyčnyja jačejki» i zaklikaŭ da zmahańnia ź imi «adzinym bajavym kułakom»23
Kamientary