Pałata pradstaŭnikoŭ ZŠA pieraabrała śpikieram respublikanca Majka Džonsana
Respublikanskaja bolšaść Pałaty pradstaŭnikoŭ ZŠA ŭ piatnicu paśla zaciažnoha pracesu mižpartyjnych pieramoŭ i hałasavańnia pieraabrała Majka Džonsana na pasadu śpikiera ŭ novym sklikańni. Adbyłosia heta ź minimalnaj pieravahaj, piša Bi-bi-si.
«Pavodle vynikaŭ padliku hałasoŭ, ahulnaja kolkaść tych, chto prahałasavaŭ, składaje 434, ź jakich Majk Džonsan sa štata Łuizijana atrymaŭ 218, [lidar demakrataŭ] Chakim Džefrys — 215 i kanhresmien Cim Emier — adzin hołas», — abviaściŭ staršynia na pasiadžeńni.
Takim čynam, Majk Džonsan atrymaŭ nieabchodnuju bolšaść, kab być abranym na pasadu śpikiera Pałaty pradstaŭnikoŭ 119-ha sklikańnia. Džonsan uznačalić nižniuju pałatu, jakaja maje najmienšuju kolkasnuju pieravahu respublikanskaj bolšaści za apošnija 100 hadoŭ.
Kab być abranym na hetuju pasadu, była nieabchodnaja padtrymka nie mienš za 218 hałasoŭ. Sami ž respublikancy, uličvajučy, što kanhresmien Met Hietc padaŭ u adstaŭku ŭ minułym miesiacy, u ciapierašni čas majuć usiaho 219 miescaŭ u nižniaj pałacie.
Heta značyć, dastatkova było dvuch respublikancaŭ, jakija prahałasavali b «suprać» abo «ŭstrymaŭsia», kab zabłakavać abrańnie novaha śpikiera. Adzin ź ich jašče da Novaha hoda zajaviŭ, što nie padtrymaje Džonsana. Jašče niekalki pradstaŭnikoŭ kansiervatyŭnaha kryła padčas hałasavańnia ŭstrymalisia, adnak paśla paŭzy i pieramoŭ z samim Džonsanam usio ž padtrymali jaho.
3 studzienia Kanhres ZŠA pačaŭ pracu ŭ novym składzie, sfarmavanym pa vynikach vybaraŭ u listapadzie 2024 hoda. Respublikancy ciapier kantralujuć bolšaść jak u Pałacie pradstaŭnikoŭ, tak i ŭ Sienacie.
Ciapier čytajuć
«Moža, bajaŭsia zastavacca ŭ šlubie sa mnoj, bo pracuje na BT». Nastaŭnica, jakaja źjechała praz danosy Bondaravaj, raspaviała pra razvod i žyćcio ŭ emihracyi2
Kamientary