Palitviazień Aŭtuchovič znoŭ pabyvaŭ u ŠIZA, jamu nie pieradajuć lekaŭ

«Z sanatoryja ja ŭžo pryjechaŭ, usio narmalna. Bieražycie svajo zdaroŭje, nie chvalujciesia za mianie. Duchoŭna ja hatovy da lubych vyprabavańniaŭ, ja z usim spraŭlusia. Heta moj šlach, dadzieny mnie Boham, i ja jaho prajdu», — napisaŭ Mikałaj Aŭtuchovič i pavinšavaŭ svajakoŭ z Novym hodam i Kaladami.

List ad Mikałaja byŭ napisany 22 śniežnia, a pryjšoŭ niadaŭna. Heta nie ŭpieršyniu, kali pra ŠIZA Aŭtuchovič paviedamlaje z dapamohaj słova «sanatoryj».

Krynica adznačaje, što pry hetym Mikałaj Aŭtuchovič nie skardzicca, a znachodzić u sabie siły padbadzioryć inšych.

«Pieradać vam maju siłu duchu mahu tolki praz maralnuju padtrymku, što i sprabuju zrabić. Nie sumujcie, uśmichniciesia!» — źviartajecca Mikałaj Aŭtuchovič da svajakoŭ.

Pavodle krynicy, u śniežni svajaki pasłali palitviaźniu miedycynskuju banderol, ale da adrasata jana nie dajšła i była viernutaja. Niadaŭna svajaki vysłali Aŭtuchoviču novuju banderol ź lekami. Pa źviestkach ad palitviaźnia, u jaho ad chvaroby sustavaŭ puchnuć nohi, jamu patrebnyja specyjalnyja preparaty.

Mikałaja Aŭtuchoviča pieryjadyčna źmiaščajuć u ŠIZA, a pryčyny pakarańnia zastajucca nieviadomymi. U listapadzie 2024 hoda palitviazień paviedamlaŭ svajakam, što adbyŭ 21 dzień u ŠIZA, dzie jamu tolki zredku akazvali miedycynskuju dapamohu. Pavodle Aŭtuchoviča, u jahonaj kamiery było vielmi choładna, tolki pad kaniec terminu tam adramantavali aciapleńnie.

Taksama palitviazień paviedamlaŭ, što ŭ jaho adabrali tanomietr, choć mieŭsia dazvoł na karystańnie hetym pryboram dla vymiareńnia cisku. Paśla toj adsiedki ŭ ŠIZA Mikałaj Aŭtuchovič pieradaŭ na volu, što «kali ź im štości zdarycca, dyk heta było zroblena śpiecyjalna».

Z pačatku śniežnia 2020 hoda Mikałaj Aŭtuchovič adbyvaje ŭžo treciaje ŭ svaim žyćci źniavoleńnie. Usiaho, pavodle padlikaŭ svajakoŭ, palitviazień adznačyŭ u viaźnicach 10 navahodnich śviataŭ i 9 dzion naradžeńnia.

Pavodle prysudu Hrodzienskaha abłasnoha suda Mikałaj Aŭtuchovič atrymaŭ 25 hadoŭ źniavoleńnia i hrašovy štraf u 1000 bazavych vieličyń, a taksama pazbaŭleńnie zvańnia praparščyka ŭ adstaŭcy. Pieršyja 5 hadoŭ źniavoleńnia były pradprymalnik i pravaabaronca musić adbyć u turmie, astatnija 20 hadoŭ — u kałonii strohaha režymu. Sud nazvaŭ Aŭtuchoviča vinavatym pavodle 10 artykułaŭ Kryminalnaha kodeksa, u tym liku ŭ stvareńni złačynnaj hrupoŭki i akcie teraryzmu. Svajoj viny Mikałaj Aŭtuchovič nie pryznaŭ, padčas pracesu jon trymaŭ haładoŭku pratestu. Viarchoŭny sud Biełarusi ŭ vyniku razhladu apielacyjnaj skarhi Aŭtuchoviča vyzvaliŭ jaho ad adbyćcia pakarańnia pavodle adnaho z abvinavačańniaŭ, ale ahulny termin źniavoleńnia pakinuŭ bieź źmienaŭ.

Biełaruskija pravaabaroncy pryznali Mikałaja Aŭtuchoviča palitviaźniem.

• 1
• 0
• 0
• 1
• 0
• 0
• 4
• 1