U Hdańsku spalili dom-pryčep biełarusa. Jon dapamahaŭ biazdomnym, a ciapier sam šukaje srodki na novaje žyllo
Biełarus Aleh Miadźviedzieŭ straciŭ dom-pryčep, jaki słužyŭ jamu žyllom i majsterniaj u polskim Hdańsku. Hruzavik padpalili nieviadomyja. Unutry znachodziłasia abstalavańnie dla pracy: 3D-pryntary i ŭstanoŭka dla łaziernaj rezki. Jano taksama stračanaje.
Ciapier Aleh raspačaŭ zbor srodkaŭ, kab nabyć novy dom-pryčep i adnavić svaju dziejnaść, piša Most.
Aleh vymušany byŭ emihravać u Polšču praz palityčny pieraśledu ŭ Biełarusi. Da pierajezdu ŭ Hdańsk jon žyŭ u roznych haradach Polščy: u Łodzi, Katavicach, a niekatory čas navat znachodziŭsia ŭ anarchisckim skvocie ŭ Varšavie: Aleh naležyć da anarchistaŭ.
Ź ciaham času jon vyrašyŭ nabyć hruzavik z kantejnieram, jaki staŭ jahonym žyllom i majsterniaj. Aleh raspracoŭvaje nastolnyja hulni.
— U mianie byŭ peŭny dośvied žyćcia ŭ padobnych umovach jašče da taho, jak ja nabyŭ hruzavik. Kali ja žyŭ u Sopacie, ja nabyŭ pryčep-daču. Niekalki miesiacaŭ pražyŭ tam, a paźniej pierajechaŭ u Hdańsk. Ale mnie stała ciesna, tamu što było šmat abstalavańnia: 3D-pryntary, łaziernaja rezka. Miesca katastrafična nie chapała, i ja vyrašyŭ nabyć hruzavik, kab žyć i pracavać u im, — raspaviadaje Aleh.
Dapamoh zatrymać zładziejaŭ, a jany jaho abvinavacili
Žyćcio ŭ hruzaviku niedaloka ad plaža mieła svaje składanaści. Pa słovach Aleha, jaho niekalki razoŭ sprabavali abrabavać. Jon miarkuje, što padpał hruzavika moža być źviazany z tym, što jon dapamoh zatrymać dvuch zładziejaŭ za niekalki tydniaŭ da incydentu.
— Dvoje mužčyn, jakich ja napałochaŭ, sprabavali ŭciačy. Adzin ź ich trapiŭ u pole, a druhi pieraskočyŭ praz płot. Ja vyklikaŭ palicyju, jakaja jechała dźvie hadziny. U vyniku ich zatrymali. Znajšli ŭ ich mašynie skradzieny mator z łodki, jakaja stajała pobač z maim hruzavikom, — raskazvaje Aleh.
Ale nieznajomyja, vierahodna, vyrašyli pomścić. Paśla taho vypadku na padstavie ich abvinavačvańniaŭ va ŭžyvańni zbroi (u Aleha byŭ pry sabie nož) palicyja zatrymała ŭžo biełarusa. Ale pakolki surjoznych dokazaŭ suprać jaho nie było, u vyniku jaho adpuścili.
Napačatku listapada 2024 hoda chtości padpaliŭ hruzavik. Ranicaj 4 listapada Aleh pryjšoŭ da svajho žylla, kab zabrać rečy pierad adjezdam u Varšavu, i ŭbačyŭ poŭnaściu zhareły dom.
Aleh adrazu źviarnuŭsia ŭ palicyju. Transpartny srodak nie byŭ zastrachavany ad pažaru, tamu atrymać kampiensacyju za stratu majomaści nie atrymałasia.
Žyvie ŭ znajomych, ale dapamahaje inšym
Aleh časta dapamahaje inšym. Naprykład, užo vosiem hadoŭ udzielničaje ŭ mižnarodnaj inicyjatyvie «Ježa zamiest bomb», jakaja nakiravanaja na dapamohu biazdomnym i ludziam u ciažkaj žyćciovaj situacyi. Pačynaŭ u Biełarusi, a paśla pierajezdu ŭ Polšču praciahnuŭ u Hdańsku.
— My hatujem ježu ŭ subotu, a ŭ niadzielu razdajom kala pomnika Nieptunu ŭ Hdańsku. Heta važna, bo ludzi viedajuć, što my budziem tam u adzin i toj ža čas. Zvyčajna hatujem kala 50 litraŭ supu, — tłumačyć Aleh.
Ale zaraz Aleh sam apynuŭsia ŭ składanaj situacyi. Paśla źniščeńnia hruzavika jon časova žyvie ŭ znajomych i vymušany časta pierajazdžać. Kab adnavić svajo žyćcio i praciahnuć pracu, jon raspačaŭ zbor srodkaŭ. Zaraz sabrana 3,4 tys. złotych z 18 tys. nieabchodnych. Ale taksama jon šukaje mahčymaści dla supracoŭnictva — Aleh zacikaŭleny ŭ raspracoŭcy nastolnych hulniaŭ i stvareńni sajtaŭ dla niedziaržaŭnych arhanizacyj.
Chto pavinien być prezidentam Biełarusi ŭ pierachodny pieryjad? Razvažajuć viadomyja biełarusy15
Kamientary