«Kubło takoje». Ź pierapisak Kabančuka robicca jasna, čamu Vieramiejčyka paličyli niebiaśpiekaj i zabaranili jamu ŭjezd va Ukrainu

Aryštu byłoha bajca Pałka Kalinoŭskaha Vasila «Pacuka» Vieramiejčyka i vydačy jaho z Vjetnama biełaruskamu KDB papiaredničała admova jamu ŭ pravie zastavacca ŭ Litvie. Litoŭcy kiravalisia svaimi pryčynami, ale, moža być, mahli ŭličyć i zabaronu na ŭjezd va Ukrainu. A z čyjoj padačy Ukraina pryniała toje rašeńnie? Čałaviek vajavaŭ, a jamu zabaranili zajazdžać. Zrazumieć, što papiaredničała ŭniasieńniu «Pacuka» ŭ stop-list, dapamahajuć pierapiski namkampałka Kabančuka.

Pryviadziom razmovu, jakaja adbyvajecca letam 2023-ha pamiž Vadzimam Kabančukom i śpiecpasłańnikam Ofisa Cichanoŭskaj va Ukrainie Hienadziem Mańko.

«Bačyš, jakija cikavyja detali»

Inicyjuje dyjałoh Kabančuk. Jon skidvaje Mańko junackija fota Vieramiejčyka ź sistemy «Pašpart» i supravadžaje vyjavy svaim kamientarom. 

Z kantekstu jasna, što heta praciah raniejšaj vočnaj razmovy, u jakoj abmiarkoŭvałasia niejkaja «papiera», pra źmiest jakoj u kursie dva surazmoŭcy. A Kabančuk jašče raz asobna choča padśviacić adzin momant. 

«Vitaju, druža. Vierahodna, jon maje suviaź z Prakopam (mianuška Vadzima Prakopjeva — NN), razam latali ŭ Maskvu 2018-07-10», — piša Kabančuk i daje tłumačeńnie ab asobie na fota ŭžo hałasavym paviedamleńniem.

«Heta «Pacuk» (pazyŭny Vieramiejčyka — NN), jon byŭ raniej u Pałku. Bačyš, jakija cikavyja detali vyśviatlajucca… Tut padobna, što kubło takoje spleciena było ŭžo daŭno…», — kaža jon. 

«Vitaju, druža. Nu ja to zrazumieŭ, pračytaŭ z tvajho tekstu. U hetaj papiery tolki baču pa im dva adrezki, pa Pacuku. Tak, ja viedaju jaho, ja baču, jon časam źjaŭlajecca na niejkich pieradačach. Tolki dzie pra suviaź z Prakopam? Ja nie ŭbačyŭ», — hołasam vykazvaje sumnievy Mańko. 

«A jany lacieli na adnym samalocie. Nu, tut prosta dakumient nie ŭstavili, ale hety dakumient jość. Tam jašče inšyja cikavyja suviazi źjaŭlajucca», — kaža Kabančuk. 

Na hetym surazmoŭcy skančajuć pierahavorvacca hałasavymi paviedamleńniami, praciahu my nie viedajem. 

Pavialičyć

Suviaź z Prakopjevym

Z razmovy možna zrabić vysnovu, što kiraŭnictva Pałka zapytvałasia ŭ «Kibierpartyzanaŭ» nie tolki bijahrafičnyja danyja svajho byłoha bajca Vieramiejčyka, ale i bolš tonkija momanty — kudy lataŭ, kali. I analizavali, z kim jon lataŭ i kudy. U pryncypie, u takoj praviercy niama ničoha niezvyčajnaha. Heta narmalnaja kontrraźviedvalnaja i kantrolnaja dziejnaść.

Ci fakt palotu Prakopjeva i Vieramiejčyka adnym rejsam Minsk-Maskva ŭ lipieni 2018 hoda byŭ vypadkovaściu, ci hetyja dvoje lacieli razam?

«Vasil tady praz Maskvu lataŭ u Tajłand», — skazali nam jaho siabry. 

«Ciapier užo nie ŭspomniu, ale praz Maskvu ŭ tyja hody ja lotaŭ va Ułan-Batar, u Tbilisi», — patłumačyŭ «Našaj Nivie» Prakopjeŭ. 

«Kali ja i lataŭ adnym samalotam ź Vieramiejčykam u minułym, to ja pra heta nie viedaŭ, dyj jon taksama. Pieršy raz ja ŭbačyŭ hetaha čałavieka ŭ 2022 hodzie ŭ pačatku vajny, kali sabraŭsia ahulny aŭtobus na Kijeŭ z Varšavy. Jon byŭ adnym z tych, chto jechaŭ. Padsieŭ, zdajecca, u Lvovie, chacieŭ vajavać», — śćviardžaje Prakopjeŭ.

Sam fakt hetaj razmovy Kabančuka i Mańko nie daje padstavaŭ adnaznačna śćviardžać, što za adpraŭkaj Vieramiejčyka ŭ stop-list stajaŭ namieśnik kamandzira pałka ci jaho kiraŭnictva.

Razmova adbyłasia praz paŭhoda paśla momantu, kali Vieramiejčyk daviedaŭsia ab zabaronie na ŭjezd va Ukrainu: apošni raz jon byŭ tam vosieńniu 2022-ha, a ŭ pačatku 2023-ha ŭžo nie zmoh zajechać.

My nie viedajem, kali Vieramiejčyka paličyli pahrozaj biaśpiecy Ukrainy i na padstavie jakoj infarmacyi było pryniataje toje rašeńnie. Śpiecsłužby i dziaržaŭnyja orhany, jak praviła, nie raskryvajuć takich źviestak. 

Ale hetaja razmova ŭkazvaje na toje, što kiraŭnictva Pałka Kalinoŭskaha adnaznačna ličyła kampramietujučym faktam suviaź ludziej z Prakopjevym.

Čamu kiraŭnictva Pałka Kalinoŭskaha i, u pryvatnaści, Kabančuk nie ŭsprymali Vadzima Prakopjeva? 

«U kiraŭnictva Pałka była pazicyja, što va Ukrainie nie pavinna być alternatyŭnaha padraździaleńnia biełarusaŭ», — kaža były bajec.

U padpałkoŭniku Sachaščyku — jon na toj momant byŭ pradstaŭnikom Abjadnanaha pierachodnaha kabinieta pa biaśpiecy i abaronie — kiraŭnictva Pałka bačyła kankurenta z tumannaj bijahrafijaj i škodnymi metami. Zamiest dałučeńnia da Pałka Kalinoŭskaha ci raboty na vałanciorskich pačatkach na jaho karyść Sachaščyk chacieŭ stvaryć svaju jamu alternatyvu.

Adpaviedna, ludziej Sachaščyka ŭ Pałku nie ličyli siabrami. A Prakopjeŭ byŭ najbližejšym paplečnikam Sachaščyka, čałavieka, jaki ruchaŭ Sachaščyka ŭ palityku.

U Sachaščyka — minułaje ŭ biełaruskaj armii plus rasijski pašpart. Jadro kalinoŭcaŭ, jakoje vyjšła z fanackich asiarodkaŭ i z 2014-ha u składzie «Azova» ryzykavała saboj za Ukrainu, ubačyła ŭ im čałavieka, jaki zajaŭlaje prava na lidarstva, nie majučy na toje zasłuh i bijahrafii, z naskoku choča stać hałoŭnym na čužym poli.

Asabistaja niepryjaznaść razahravała padazreńni ŭ nienadziejnaści, rasijskim śledzie. 

«I tyja, chto byŭ z Sachaščykam źviazany — u tym liku Prakopjeŭ, jany prachodzili dla viarchoŭ kalinoŭcaŭ pa toj ža katehoryi jak minimum niebiaśpiečnych kankurentaŭ, a to i mahčymych rasijskich zasłancaŭ», — dadaŭ inšy surazmoŭca «Našaj Nivy».

Pry hetym niepaźbiežnaja na vajnie maksimalnaja padazronaść spryjała rašeńniam, skiravanym na minimizacyju ryzyk.

Pavialičyć

Pryčyny nie lubić

Adnačasova ŭ kiraŭnictva Pałka Kalinoŭskaha byli pryčyny nie lubić Vieramiejčyka.

«U siaredzinie-kancy 2022-ha adnosiny ŭnutry Pałka Kalinoŭskaha byli ŭžo składanymi. Zahinuły kamandzir bataljona «Vołat» — Ivan «Brest» Marčuk sprabavaŭ vyvieści svajo padraździaleńnie sa składu PKK. Ale nie paśpieŭ», — raskazvaje sasłužyviec Vieramiejčyka.

«Pacuk» chacieŭ davieści da kanca hetuju zadumu. Kiraŭnictva pałka ŭsprymała heta jak sieparatyzm, jak niešta niapravilnaje. Vieramiejčyk pierahareŭ, pierasvaryŭsia, zachacieŭ uziać paŭzu. Zvolniŭsia.

Potym addychaŭsia i znoŭ zachacieŭ vajavać.

«Pacuk» paprasiŭsia nazad, było navat hałasavańnie nakont hetaha — viartać, nie viartać. Hałasavała tolki viarchuška, a nie ŭsie bajcy. U vyniku vyrašyli nie viartać. Jak tady skazaŭ adzin z udzielnikaŭ hałasavańnia: «Haŭnamut». Vierniecca i budzie znoŭ nastrojvać častku kalektyvu na raskoł», — raskazvaje kalinoviec.

Na toj momant padraździaleńnie «Teror» užo adkałołasia ad pałka, inšyja bajcy vahalisia. Tamu z byłym namieśnikam bataljona «Vołat» Vasilom Vieramiejčykam vyrašyli nie ryzykavać.

Pavialičyć

I tut užo dylema

Prykładna tady ž Sachaščyk z Prakopjevym sprabavali ŭdychnuć novaje žyćcio ŭ svaju zadumu stvaryć asobny połk «Pahonia». Połk Kalinoŭskaha vystaŭlaŭ na front sotni čałaviek, «Pahonia» składałasia z tuzina pry internacyjanalnaj rocie. Ludzi Sachaščyka chacieli pašyrycca i vyjści na samastojnaje padraździaleńnie, šukali sabie bajcoŭ, viali pieramovy ź niekatorymi kalinoŭcami. Chtości byŭ blizki da zhody.

«Jak raskazvaŭ mnie asabista Vieramiejčyk, jaho taksama abchodžvali. Vidać, Vasia dzialiŭsia hetaj infarmacyjaj z byłymi sasłužyŭcami, jana dajšła da kiraŭnictva pałka», — kaža jaho były sasłužyviec. 

I tut užo dylema. Kali ŭziać Vieramiejčyka nazad — ryzyka, što zachoča stać atamanam i źviadzie jašče hrupu ludziej. Kali nie brać, to jon pojdzie da Sachaščyka i ŭžo adtul budzie ahitavać iści da jaho, u «Pahoni» nie było aŭtarytetnych publičnych ludziej, jon moh by stać takoj fihuraj». 

«Takim čynam, u niejki momant pryčyny nie lubić Vieramiejčyka amal da litary supali z pryčynami nie lubić Vadzima Prakopjeva», — ličać infarmavanyja surazmoŭcy, jakim «Naša Niva» pakazała dyjałoh Kabančuka i Mańko.

Baraćba z raskolnikami, adstojvańnie manapolii svajoj arhanizacyi pryviało da taho, što abiedźvie hetyja fihury, jakija chacieli pa-svojmu roznaha, z pazicyi kiraŭnictva pałka chacieli adnaho i taho ž. 

«Naprošvałasia najlepšaje rašeńnie, kab Vieramiejčyk uvohule nie apynaŭsia va Ukrainie. PKK ničoha nie hublaje, «Pahonia» Sachaščyka ničoha nie nabyvaje — tamu, ja dumaju, tak zdaryłasia, tamu ź im tak abyšlisia. Mieniedžmient ryzykaŭ», — skazaŭ nam surazmoŭca, u minułym blizki da Vieramiejčyka.

Prakopjeŭ ličyć pryčynaj reŭnaść

Vadzim Prakopjeŭ kateharyčna abviarhaje śpiekulacyi pra svaju suviaź z Rasijaj. Jon ličyć pryčynaj niedavieru da siabie prosta baraćboj za resursy.

«Ź pieršych dzion vajny ciapier užo byłoje kiraŭnictva PKK zmahałasia ź lubymi alternatyŭnymi padraździaleńniami biełarusaŭ. Ja byŭ abvieščany voraham. U chod išło ŭsio: roznaha rodu padstavy, dyskredytacyi, vykarystoŭvańnie suviaziaŭ u HUR [Hałoŭnym upraŭleńni raźviedki Minabarony Ukrainy], u Ofisie Cichanoŭskaj. 

«Pahoniu» całkam rasfarmiravali, mianie vyklikali ŭ SBU i vietliva, ale ćviorda prapanavali vyjechać z Ukrainy.

Ale mnie pašancavała bolš, čym Vieramiejčyku, tamu što na toj momant ja ŭžo atrymaŭ prytułak u adnoj ź jeŭrapiejskich krain», — kaža Prakopjeŭ.

«Sproba abjadnać nas z Vasilom u «kubło» moža być źviazana z tym, što jon ćviorda vykazvaŭ niezadavolenaść uładkavańniem PKK. Heta vyklikała reŭnaść kiraŭnictva. A namalavać nas maskoŭskimi špijonami-zmoŭnikami — heta siońnia samy vierny sposab sapsavać kamuści žyćcio va Ukrainie», — miarkuje Prakopjeŭ, jaki rezka krytykuje i byłoje kiraŭnictva Pałka Kalinoŭskaha za intryhanstva, i Ofis Cichanoŭskaj za nierašučaść u vajenny čas. 

U toj ža čas Prakopjeŭ uchvalaje źmienu kiraŭnictva Pałka.

«Kali b usie adrazu razabralisia, što ŭjaŭlaje ź siabie ciapier užo byłoje kiraŭnictva PKK, to biełaruski dobraachvotnicki ruch moh by ŭjaŭlać ź siabie absalutna inšuju siłu. I ja tolki rady, što adbyłasia źmiena kiraŭnictva ŭ PKK. Usio, što ja viedaju pra Paŭła Šurmieja, kaža, što jon pravilny čałaviek i na pravilnym miescy lidara», — kaža Prakopjeŭ. 

«Fakty nie paćvierdžanyja»

Pavialičyć

Zabarona Vieramiejčyku ŭjezdu va Ukrainu syhrała ŭ losie Vieramiejčyka złuju rolu. Jon pa natury nie lubiŭ prasić i asprečvać, ličyŭ heta nižej za svoj honar, kazała jahonaja žonka. «Skazaŭ: ja tut ničoha prasić nie budu», — apisała jana reakcyju Vasila na pryznańnie jaho pahrozaj nacyjanalnaj biaśpiecy Litvy.

Apynuŭšysia miž niebam i ziamloju, biez mahčymaści pajechać va Ukrainu chacia b prosta žyć, jon pasłaŭ usich i palacieŭ u Vjetnam, dzie apynuŭsia ŭ zonie dasiažnaści biełaruskich śpiecsłužbaŭ. Tak zabarona ŭjezdu stała pieršapryčynaj doŭhaha łancužka padziej, jakija pryviali bajca ŭ kamieru SIZA KDB. Nichto nie viedaje, što ź im tam adbyvajecca.

Što ž mahło być u toj papiery, jakuju niechta — pakul što nieviadoma chto — padkłaŭ ukrainskim słužbam jak matyvacyju padazreńniaŭ na adras Vieramiejčyka, byłoha aficera biełaruskaj armii, jaki śviadoma vybraŭ šlach supracivu? Pakul adkazu na hetaje pytańnie niama.

Čytajcie taksama: Były aficer, vyžyŭ u strašnym bai. Chto toj kalinoviec Vieramiejčyk, jakoha Vjetnam addaŭ biełaruskamu KDB?

Chto ŭzłamaŭ telehram Kabančuka, niajasna. Naprošvajecca dumka, što heta mahli być biełaruskija ci rasijskija śpiecsłužby abo źviazanyja ź imi struktury. Pa mierkavańni žurnalista «Našaj Nivy», jaki vyvučaŭ uzłamanyja danyja, uzłom adbyŭsia 24 žniŭnia 2023 hoda, trecija asoby mieli dostup da akaŭnta z 09:40 da 10:11. Samaje śviežaje z vyhružanych u vyniku ŭzłomu paviedamleńniaŭ datujecca žniŭniem 2023 hoda. 

«Fakty pa hetaj spravie pakul nie paćvierdžanyja, tamu biez kamientaryjaŭ», — adkazaŭ Vadzim Kabančuk na zapyt «Našaj Nivy». My pytalisia ŭ jaho pra źmiest toj papiery, u jakoj fihuravała proźvišča Vieramiejčyka. 

Paśla adstaŭki Valeryja Sachaščyka z Abjadnanaha pierachodnaha kabinieta ŭ žniŭni 2024-ha Kabančuk zaniaŭ tam jahonaje miesca.

Kali vam važnaja praca, jakuju robiać žurnalisty «Našaj Nivy», padtrymajcie nas, kali łaska, danatam praz «Patreon».

• 3
• 0
• 0
• 8
• 1
• 4
• 8
• 0