Skandał u Polščy: źnikłyja procitankavyja miny adšukali na składzie IKEA
Zdareńnie ŭžo kaštavała pasady hienierału, a niekalki sałdataŭ z Hajnaŭki mohuć adpravicca ŭ turmu.
Ilustracyjnaje fota: Eric Risberg / AP
U polskaj armii vybuchnuŭ skandał z-za straty procitankavych min. Incydent adbyŭsia jašče letam, ale pra jaho stała viadoma tolki ciapier.
Vajskovaja čaść u Hajnaŭcy (Padlaskaje vajavodstva) zakazała tavarny ciahnik dla pieravozki ŭzbrajeńnia na skład u Halenievie, što na inšym kancy krainy. Padčas vyhruzki vajskoŭcy dapuścili pamyłki ŭ raźlikach, i niekalki skryniaŭ sa procitankavymi minami zastalisia ŭ ciahniku, paviedamlaje WP.
Zhodna z paviedamleńniami, havorka idzie jak minimum pra niekalki dziasiatkaŭ zabytych min. Vydańnie Money.pl śćviardžaje, što ich mahło być 240. Bolšaść takich min važać ad 8 da 15 kh, značnaja častka ich masy — heta vybuchovaje rečyva, pryznačanaje dla źniščeńnia ciažkaj vajennaj techniki, uklučajučy tanki i branieviki.
Niekatory čas miny «padarožničali» pa krainie, pakul nie apynulisia na adnym sa składaŭ IKEA. Supracoŭniki składa byli vielmi ździŭleny takomu «hruzu». Miny adrazu ž viarnuli armii, jak paviedamlaje prakuratura, ni adna ź ich nie była stračana.
«My paćviardžajem, što 16 lipienia minułaha hoda kampanija PKP Cargo paviedamiła nam pra najaŭnaść vajennaha hruzu ŭ adnym z vahonaŭ, jakija prybyli na pradpryjemstva IKEA Industry Orla.
Pradstaŭnik hruzapieravozčyka adkryŭ vahon, i hruz byŭ kanfiskavany Vajennaj žandarmieryjaj u toj ža dzień», — zajaviła PAP staršynia IKEA Industry Poland Małhažata Dabies-Turulska.
Pa śladach skandału ź Ministerstva abarony Polščy zvolnili hienierała Artura Kiempčyńskaha, jaki zajmaŭ pasadu kiraŭnika Inśpiektarata padtrymki Vojska Polskaha. Paviedamlajecca, što hienierał byŭ adpraŭleny ŭ adstaŭku za toje, što schavaŭ ad kamandavańnia incydent ź minami.
Pa spravie taksama dapytvajucca vajskoŭcy, jakija adkazvali za hruz. Im pahražaje ad troch miesiacaŭ da piaci hadoŭ pazbaŭleńnia voli.
Kamientary