«U Jeŭropie reč moža kaštavać 30 jeŭra, a ŭ nas — usie 100». Biełarusy raskazali, jak kuplajuć brendavyja rečy, jakija nie pradajucca na radzimie

Piecia, 18 hadoŭ, student:

— Praz uzrost ja nie mahu dazvolić sabie tracić kuču hrošaj na adzieńnie, asabliva na brendy typu Balenciaga abo Louis Vuitton. Ja bolš zachaplajusia skiejterskaj kulturaj, tamu šukaju rečy, jakija ŭpisvajucca ŭ hety styl. Adnak mnohich cikavych brendaŭ u nas prosta niama, tak što davodzicca vykručvacca.

Adzin z samych zručnych sposabaŭ znajści adzieńnie ad niedastupnych u Biełarusi kampanij — telehram-kanały pierakupaŭ.

Ciapier u mianie jość niekalki pravieranych kanałaŭ, dzie pradajuć, naprykład, b/u rečy z Polščy. Ich papiarednie praviarajuć na sapraŭdnaść (lihit-ček), a paśla pierapradajuć.

Niekatoryja z hetych kanałaŭ ja znajšoŭ sam, a niejkija paraili siabry — u našaj tusoŭcy mnohija nosiać padobnyja rečy i časta zakazvajuć ich z-za miažy. Tam ludzi vystaŭlajuć rečy na prodaž u farmacie: «Try pary džynsaŭ Armani, takija i takija pamiery, takaja i takaja cana». Čaściej za ŭsio vopratku pryvoziać z Turcyi ci inšych krain. U zaležnaści ad pradaŭca heta moža być jak aryhinał, tak i replika.

Jość i bolš «pryziemlenyja» kanały, dzie pradajuć rečy, jakija realna nosiać zvyčajnyja ludzi, a nie tolki školniki, jakija haniajucca za chajpovymi brendami.

Raniej ja šukaŭ takija rečy ŭ instahramie, ale z časam mnohija pradaŭcy pačali pierachodzić u telehram. Čamu, dakładna nie viedaju, mahčyma praz prablemy ź milicyjaj. Chtości pajšoŭ z hetaj śfiery, ale mnohija praciahvajuć pracavać.

Jość niekalki prykmiet, pa jakich možna zrazumieć, što telehram-kanał nadziejny. U instahramie heta zrabić było b praściej — tam možna pačytać kamientary, napisać vodhuk ci navat zładzić niešta nakštałt «buntu», kali pradaviec akazaŭsia niadobrasumlennym.

U telehramie takich mahčymaściaŭ niama, tamu ja aryjentujusia pa padpisčykach i pytajusia mierkavańnie ŭ znajomych. Kali chtości ŭžo zakazvaŭ u kankretnaha pradaŭca, možna daviedacca, jak usio prajšło. Asabista mnie hetaha dastatkova, u mianie jość piać pravieranych kanałaŭ, i hetaha całkam chapaje. Kali ŭ adnym niama patrebnaj rečy, zaŭsiody možna pahladzieć u inšym.

Samyja składanyja ŭ pošuku rečy — tyja, jakija ŭ nas nie vielmi viadomyja. Jany nie zaŭsiody darahija, ale znajści ich ciažka.

Naprykład, brend Independent — skiejtarskaje adzieńnie, jakoje ŭ Jeŭropie kaštuje kala 30 jeŭra. A ŭ nas za jaho mohuć prasić 150-400 rubloŭ, tamu što prosta nakručvajuć košt. Časta padobnyja brendy možna znajści na placoŭkach nakštałt Kufar, ale ceny tam zvyčajna vyšejšyja, čym u telehram-kanałach.

Akramia redkich rečaŭ, časam ja biaru i bolš dastupnyja brendy, naprykład Levi's. U Biełarusi jany pradajucca i ŭ aficyjnych kramach, ale ceny tam mohuć dachodzić da 600 rubloŭ. Kali jość mahčymaść zakazać tańniej, ja starajusia hetym skarystacca: mahu, naprykład, paprasić znajomych, jakija jeduć u Jeŭropu, pryvieźci mnie.

Surjoznych prablem z zakazami ŭ mianie nie było, tamu što ŭ mianie niama zavyšanych patrabavańniaŭ da rečaŭ. Padrobki taksama nie traplalisia — ja zaŭsiody prašu pradaŭca skinuć fota detalaŭ: švy, birki i inšaje. Časam prašu zrabić fota z dvuma palcami ŭ kadry ci namalavać niešta na listočku, kab pierakanacca, što zdymak nie zapampavany ź internetu.

U telehram-kanałach z pravieranymi pradaŭcami takoha zvyčajna nie patrabujecca, tamu što tam ludzi ŭžo daŭno zajmajucca prodažami i naŭrad ci stanuć ryzykavać reputacyjaj. Vyklučeńnie — kali čałaviek vyrašyć pajści z hetaj temy i pierad zakryćciom pasprabuje kahości padmanuć.

Jašče adzin sposab padstrachavacca — nakładzieny płaciež. Zaŭsiody prašu takuju opcyju, kab pravieryć tavar na miescy pierad apłataj. Kali pradaviec pačynaje vykručvacca i admaŭlajecca, to ja prosta nie kuplaju ŭ jaho.

U zakazie rečaŭ z-za miažy jość plusy i minusy. Ź minusaŭ — časam davodzicca napružvać znajomych. Naprykład, chtości jedzie za miažu, choča pryvieźci rečy dla siabie, a ja prašu jaho ŭziać dla mianie paru futbołak. Heta zajmaje miesca i stvaraje niazručnaści. Pakul nichto nie skardziŭsia, ale mnie samomu byvaje trochi niajomka.

Ź plusaŭ — bolš mahčymaściaŭ znajści cikavyja rečy. Možna navat paprasić znajomych niešta pašukać pad moj styl, i jany sapraŭdy znojduć niešta krutoje. Da taho ž pakupki ŭ siabroŭ za miažoj časta abychodziacca tańniej, a vybar u kramach tam našmat šyrejšy. Možna pryjści, ubačyć reč na svaje vočy, zrabić fota, a nie aryjentavacca tolki na karcinki z telehram-kanałaŭ abo z «Kufra».

Z apłataj prablem amal nie było. U niekatorych pradaŭcoŭ jość biełaruskija karty, jakija prachodziać pry apłacie. Z dastaŭkaj składaniej.

Ja zaŭsiody damaŭlaŭsia pra pieradaču asabista, tamu što adnojčy paličyŭ košt dastaŭki ź Italii, i jana akazałasia zanadta vysokaj. Paśla hetaha navat nie razhladaŭ varyjant dastaŭki, a prosta šukaŭ sposaby pryvieźci rečy praz znajomych.

Ciapier źjaviłasia šmat telehram-kanałaŭ, asabliva rasiejskich, jakija dapamahajuć zakazvać rečy praz kitajski sajt Poison. Padobnych biełaruskich kanałaŭ mienš, ale jany taksama jość.

Jak heta pracuje: ty zakazvaješ tavar na Poison, ale zamiest taho, kab pryjści da ciabie niepasredna, jon spačatku adpraŭlajecca na kitajski adras. Tam jaho pakujuć i pierasyłajuć dalej u Biełaruś. Potym užo zakaz dastaŭlajuć tabie.

Nacenka pasiarednikaŭ zaležyć ad katehoryi tavaru. Naprykład, na parfumy idzie adzin pracent, na adzieńnie — inšy. Ja sam tak zakazvaŭ, ale nie niepasredna, a praz adnaho. Jon braŭ sabie čaraviki, a ja zamaŭlaŭ kiedy Vans. Atrymałasia navat tańniej, čym kali b my brali ŭ kramie, tamu što aformili dastaŭku adrazu na dźvie pary.

Ja nie zahłyblaŭsia ŭ detali, ale viedaju, što hety sposab vielmi papularny. Mnohija maje znajomyja karystajucca im, tamu što jon dazvalaje zakazvać aryhinalnyja rečy biez ryzyki narvacca na padrobku.

Nataša, 25 hadoŭ, mieniedžarka

— Kali ja padarožničaju, mnie zaŭsiody chočacca pryvieźci niešta asablivaje, što nielha prosta tak kupić u Biełarusi. Mnohija brendy, jakija mnie padabajucca albo naohuł nie pradstaŭlenyja ŭ nas, albo ich možna dastać tolki praz bajeraŭ, što dla mianie zanadta kłopatna. Mnie našmat praściej zajści ŭ kramu i samoj usio pahladzieć.

Ja nie składaju śpisy abaviazkovych kram pierad pajezdkaj, ale pa fakcie zaŭsiody zahladaju ŭ miescy, jakija mnie padabajucca.

Naprykład, ja lublu kramy Bath & Body Works. Upieršyniu ja zajšła ŭ taki ŭ Dubai, potym była ŭ Tajłandzie. Abažaju sam praces prahułak pa ich kramach: testavać vodary, sprabavać tekstury — kajf. Tym bolš u nas hety brend nie dastać.

Mnie padabajecca adčuvańnie, što ja kupiła niešta sama, u inšym horadzie ci krainie, pryviezła heta dadomu. Heta dadaje kupli kaštoŭnaści. A kali niešta možna kupić u luby momant, źnikaje hety asablivy momant radaści.

Naprykład, ja chacieła kupić u Dubai sumku Karl Lagerfeld abo Hugo Boss, ale akazałasia, što jana tam daražejšaja, čym na Lamoda, navat ź viartańniem Tax Free. U vyniku ja prosta zakazała sumku ad Hugo Boss anłajn.

Što tyčycca bolš darahich brendaŭ nakštałt Louis Vuitton — u mnohich ź ichnich bucikoŭ niama ceńnikaŭ. Tam ty spačatku ŭlublaješsia ŭ reč, a potym bačyš, što jana kaštuje 3000 jeŭra, i takaja: «Akiej…»

U hetym jość svoj plus — spačatku ty vybiraješ dušoj, a potym užo dumaješ, jak upisać heta ŭ svoj biudžet. Taki praces šopinhu zdajecca mnie bolš uśviadomlenym.

Zahadzia biudžet na kankretnyja rečy pierad pajezdkaj ja nie płanuju. Prosta adkładaju peŭnuju sumu, jakuju dakładna chaču vydatkavać na jakuju-niebudź kłasnuju šmotku ci inšy cikavy suvienir.

• 2
• 1
• 1
• 4
• 0
• 0
• 0
• 0