«U razmovach z Trampam Pucin nasamreč kpiŭ ź jaho, ale Tramp hetaha nie razumieŭ z-za asablivaściej pierakładu»
Śpiecyjalny pamočnik Trampa pa spravach Jeŭropy i Rasii ŭ 2017-2019 hadach Fiłona Chił raskazała pra asablivaści razmoŭ Trampa z Pucinym.
Fijona Chił šmat hadoŭ vyvučała Pucina ŭ Rasii jak daśledčyk, a taksama pracavała ŭ raźviedvalnych strukturach ZŠA, pierš čym u pieršaj administracyi Trampa zaniać pasadu śpiecyjalnaha pamočnika pa spravach Jeŭropy i Rasii. Jana stała šyroka viadomaj padčas pieršaha impičmientu Trampa, kali jaje pakazańni dali važnyja źviestki pra ŭzajemaadnosiny Trampa z Pucinym i jaho raniejšyja dziejańni ŭ dačynieńni da prezidenta Zialenskaha.
U intervju Foreign Affairs Fiona Chił padzialiłasia svaimi ŭražańniami ad nazirańnia za razmovami Trampa z Pucinym. Pryvodzim niekatoryja vykazvańni.
Jak adznačaje Chił, Tramp nie asabliva rychtujecca da sustreč z Pucinym, nie źviartaje ŭvahi na važnaść taho, kab u kamandzie byli ludzi, jakija sapraŭdy razumiejuć situacyju, viedajuć, chto taki Pucin i što saboj ujaŭlaje Rasija.
U toj čas jak Pucin pracuje ŭ kamandzie. Jon — pradukt «hłybinnaj dziaržavy» i, u adroźnieńnie ad Trampa, vykarystoŭvaje dziaržaŭny aparat u svaich intaresach.
U Pucina jość koła vysokapastaŭlenych čynoŭnikaŭ: jaho daradca Ušakoŭ, ministr zamiežnych spraŭ Łaŭroŭ, a taksama Kirył Dźmitryjeŭ — kiraŭnik Rasijskaha fondu pramych inviestycyj, jaki prymaŭ aktyŭny ŭdzieł u pieramovach z ZŠA. Dla mnohich jon nie asabliva viadomaja fihura, ale jon hraje važnuju rolu. Usie hetyja ludzi hadami pracujuć u rasijskaj sistemie.
Jany dobra razumiejuć, što robiać. Bolš za toje, jany biezdakorna havorać na anhlijskaj movie i dakładna viedajuć svaju stratehiju. Jany cudoŭna ŭśviedamlajuć, jakuju krainu pradstaŭlajuć, jak pracuje ich sistema i jakija źniešnija faktary ŭpłyvajuć na situacyju. U ich jość poŭnaje ŭjaŭleńnie ab ahulnym raskładzie.
Ale Tramp, jak adznačaje Chił, zacykleny vyklučna na adnoj postaci — Pucinie. Usich pasiarednikaŭ, jakija jaho atačajuć, jon usprymaje tolki jak pravadnikoŭ da Pucina ci instrumientaŭ dla naładžvańnia kantaktu. Jon nie źviartaje ŭvahu ni na svaich daradcaŭ, ni na pierakładčykaŭ. Jamu važna tolki adno — mahčymaść asabista sieści za stoł pieramovaŭ z Pucinym.
Kali ty nie padrychtavany i nie viedaješ, ź jakoj pazicyi zychodzić surazmoŭca, — padkreślivaje byłaja śpiecpamočnik Trampa, — usio zvodzicca da prostaha ŭzajemadziejańnia. U takoj situacyi niepaźbiežna pačynaješ usprymać rytoryku Rasii, tamu što adziny čałaviek, jakoha Tramp usprymaje jak roŭnaha, — heta Pucin.
«Jamu niecikavyja ni Uitkof, ni Rubia. Dla jaho heta ŭsiaho tolki supracoŭniki administracyi, nie bolej. (…) Toje ž samaje ź pierakładčykam», — davodzić ekśpiertka.
«Tramp nie ŭsłuchoŭvajecca ŭ słovy. Jon usprymaje hutarku chutčej na ŭzroŭni emocyj, čym źmiestu», — havoryć Chił i zhadvaje, što ŭpieršyniu, kali jana słuchała adnu z telefonnych razmovaŭ Trampa z Pucinym, jana ŭvažliva sačyła za rasijskaj movaj, tamu što pierakładčyki nie zaŭsiody pieradajuć usie niuansy. I asabliva kali heta ruski pierakładčyk, jaki pierakładaje na movu, jakaja taksama nie źjaŭlajecca jaho rodnaj. U vyniku hublajecca masa detalaŭ.
«Paśla razmovy Tramp skazaŭ: «Vydatnaja hutarka». A ja padumała: «Nasamreč nie». U słovach Pucina było šmat schavanych pahroz. Jon vielmi staranna padbiraŭ vykazvańni.
U šmatlikich razmovach z Trampam Pucin nasamreč kpiŭ ź jaho, ale Tramp hetaha nie razumieŭ praz asablivaści pierakładu. Časam Pucin padbuchtorvaŭ jaho, praviarajučy reakcyju. Ale praź pierakład hetyja momanty zhładžvalisia», — śćviardžaje Chił.
Akramia taho, jak adznačaje ekśpiert, Tramp nie abmiarkoŭvaŭ detali pieramovaŭ paśla sustreč. Usio heta vyhladaje vielmi nieprafiesijna, bo hublajecca sutnaść taho, što Pucin nasamreč havaryŭ.
Adzin sa znakavych vypadkaŭ adbyŭsia ŭ Osacy na samicie G20. Tady rasijski bok zamianiŭ svajho pierakładčyka na vielmi pryvabnuju i vielmi kvalifikavanuju maładuju žančynu.
«U toj momant jany stajali adzin suprać adnaho i mieralisia siłami, abmiarkoŭvajučy hipierhukavyja rakiety.
Tramp śćviardžaŭ, što ŭ jaho jany buduć. A Pucin ź niekatorym sarkazmam adkazvaŭ niešta nakštałt: «Tak, viadoma, buduć. Ale ŭ mianie jany ŭžo jość» — raspaviadaje Chił.
Potym, pavodle słoŭ śpiecpamočnika Trampa, lidary dźviuch krain pierajšli da abmierkavańnia Izraila. U toj pieryjad Rasija sprabavała ŭjavić siabie abaroncam Izraila, arhumientujučy svaju prysutnaść na Hałanskich vyšyniach i svaje dziejańni ŭ Siryi. Pucin kazaŭ pra heta.
«I tady Tramp skazaŭ: «Ale ja rablu dla Izraila bolš, čym chto-niebudź». I dadaŭ: «U Izraili ŭžo nazvali ŭ moj honar toje i heta». Na što Pucin pahladzieŭ na jaho i skazaŭ: «Nu, Donald, mahčyma, im varta nazvać usiu krainu ŭ tvoj honar».
I toje, jak jon skazaŭ heta pa-rusku, było nastolki sarkastyčna. Možna było ŭbačyć, jak jaho ludzi vakoł jaho ŭchmylajucca.
Adnak Tramp hladzieŭ tolki na pierakładčycu, i kali jana pieradała jaho słovy, intanacyja atrymałasia miakčejšaj. U vyniku Tramp adkazaŭ: «O, nie, ja dumaju, heta było b zanadta», — jak byccam uspryniaŭ heta jak całkam ščyruju prapanovu», —
dzielicca Chił i śćviardžaje, što byli i inšyja padobnyja momanty, kali Pucin śpiecyjalna pravakavaŭ Trampa, pramaŭlajučy rezkija, navat abraźlivyja vykazvańni pra amierykanskich palitykaŭ, takich jak Bajden ci sienatar Uoren.
Kamientary