Pryznačajučy ŭ staršyni Nacbanka Ramana Hałoŭčanku, Łukašenka ni słovam nie zaiknuŭsia pra Paŭła Kałaŭra. Nie skazaŭ jamu dziakuj, nie pieravioŭ na inšuju rabotu, a ŭvohule — byccam by i nie było čałavieka, dziakujučy jakomu biełarusy na dziesiacihodździe zabyli słova «devalvacyja». «Našaj Nivie» stała viadoma, u čym jaho zrabili vinavatym.
Jak zvalnialisia papiarednija kiraŭniki Nacbanka? Piatro Prakapovič atrymaŭ adstaŭku praz stan zdaroŭja, a kali padlačyŭsia, viarnuŭsia pamočnikam Łukašenki. Nadzieju Jermakovu — jak i Kałaŭra — taksama źniali pad «novy» ŭrad, ale z nastupnym pieravodam na inšuju rabotu, u kiraŭnictva Banka BiełVEB.
Z Kałaŭram usio nie tak. Pryznačeńnie Ramana Hałoŭčanki ŭ Nacbank supravadžałasia słovami padziaki nie Kałaŭru, a Hałoŭčanku — «za toje, što pahadziŭsia». I vykazanym spadzievam, što Hałoŭčanka z Turčynam «narešcie pastaviać z noh na hałavu niekatoryja pytańni ŭ našaj ekanomicy, jakija datyčać jaje finansavańnia».
Heta byŭ kamień naŭprost u aharod Kałaŭra — finansavańniem ekanomiki zajmajucca banki.
U publičnaj prastory pačalisia śpiekulacyi na temu taho, što strohija pohlady Kałaŭra na manietarnuju palityku i stali pryčynaj adstaŭki, što ad jaho patrabavali ŭklučać stanok, a jon admaŭlaŭsia…
«Naša Niva» naviała daviedki pra pryčyny chałodnaha staŭleńnia Łukašenki da Kałaŭra.
Apytanyja pradstaŭniki bankaŭskaha siektara sychodziacca ŭ mierkavańni, što naprykancy svajoj karjery Kałaŭr trapiŭ u historyju, jakaja pierakreśliła dasiahnieńni raniejšych hadoŭ, i jakuju jamu nie zmahli daravać inšyja ekanamisty, jakija ciapier na pieršych rolach: Dźmitryj Kruty, Raman Hałoŭčanka, Mikałaj Snapkoŭ, Alaksandr Turčyn.
Raniej «Naša Niva» ŭ ahulnych rysach užo apisvała nienaturalnuju situacyju, jakaja vypadkova skłałasia ŭ biełaruskim bankaŭskim siektary: parazityčnaja biełaruskaja ekanomika pa sutnaści stała asnoŭnym kredytoram svajho hałoŭnaha donara — Rasii, — praz roźnicu ŭ bankaŭskich staŭkach. Heta historyja litaralna apošniaha hoda.
U Rasii bankaŭskija staŭki hałapavali, u toj čas jak u Biełarusi trymalisia stabilnymi. Ale i popyt na hrošy ŭ Biełarusi byŭ nižejšym. Pryvatnyja banki złavili ŭdaču za chvost i pačali kredytavać nierezidentaŭ. Rasijskija kampanii brali ŭ biełaruskich bankach valutnyja kredyty pad harantyi matčynych kampanij niekatorych biełaruskich bankaŭ. «Śbierbank» uvohule nie saromieŭsia raźmiaščać u Rasii adkrytuju rekłamu, što rasijskija pradpryjemstvy mohuć vyhadna kredytavacca ŭ Biełarusi.
Čytajcie taksama: Biełaruskija banki ŭdała śpiekulujuć na dysparytecie stavak z Rasijaj. Rasijanie nam dvojčy prypłačvajuć
Pa słovach našych surazmoŭcaŭ, na pačatak 2025 hoda situacyja była ŭžo takoj, što «ŭ biełaruskaj bankaŭskaj sistemie zastałosia paru miljardaŭ likvidnaści, što pa sutnaści ništo».
«Jak u luboj situacyi, jość łuziery, jość bienieficyjary. Tut bienieficyjary — pryvatnyja biełaruskija banki i rasijski biznes. Pieršyja staviać rekordy prybytkovaści, druhija tanna prakredytavalisia.
Łuziery — biełaruski biźnies. Jak pryvatny, tak i dziaržaŭny siektar, dla jakich hrošy stali darahimi. Kali pieršy adkazvaje tolki pierad saboj, to za druhi pierad Łukašenkam adkazvaje Saviet ministraŭ. Kali ŭ dziaržsiektary niama rostu, kali adstajem ad płana, Łukašenka pytaje z Hałoŭčanki i Snapkova.
Jany kivajuć na toje, što vinavaty Nacbank — jon dapuściŭ vymyvańnie likvidnaści z krainy i rost stavak faktyčna na pustym miescy. Heta jahony ŭčastak frontu, heta nie my pravalili, a jon. Nu što heta takoje? Staŭki ŭ rublach za hod vyraśli na 90% — raniej možna było kredytavacca pad 11-12%, ciapier 18-19-20%. Staŭki ŭ dalarach — na 40%. Jak u takich umovach vykonvać dziaržaŭnyja prahramy?
Kali Hałoŭčanka sa Snapkovym kažuć, što vinavatyja nie jany, to tut absalutna łahična kahości ź ich i adpravić na miesca Kałaŭra, kab pakazali, jak treba, i vypravili situacyju. I pierad imi sapraŭdy staić nieardynarnaja zadača», — ličyć adzin z našych surazmoŭcaŭ, jaki 20 hod pracuje ŭ śfiery dziaržaŭnych finansaŭ.
Jahony kaleha z pryvatnaha banka z dumkaj zhodny.
«Pryvatnyja banki vymyvali nie tolki svaju likvidnaść, ale i likvidnaść dziaržaŭnych bankaŭ, jakija pra kredytavańnie nierezidentaŭ, kaniečnie ž, nie zadumvalisia. Tamu što bankaŭskaja sistema — heta złučany sasud. Jość mižbankaŭski rynak, na jakim možna kuplać hrošy. Pryvatny bank raźmiaščaje zajaŭku z pryjemnym pracentam — dziaržaŭnyja banki dajuć jamu hrošy, toj ich addaje ruskim, zarablaje na delcie. Tut vielmi prostaja matematyka.
I vielmi łahičnyja pavodziny bankaŭ, ich niama za što vinavacić — BPS-Śbierbank i Alfa-Bank zajmajucca svajoj statutnaj dziejnaściu, zarablajuć na mahčymaści. Jany nie pavinny dumać pra vykanańnie dziaržaŭnych prahram. Pra heta pavinny dumać čynoŭniki. Ale tut inšaje pytańnie, a što realna moh zrabić Kałaŭr?
Pa-pieršaje, dla Biełarusi kredytavańnie nierezidentaŭ —heta nastolki redkaja historyja, što ja absalutna ŭpeŭnieny, što Nacbank niejki čas prosta nie byŭ u kursie, a mieŭ ujaŭleńnie tolki na ŭzroŭni čutak, što hrošy nasamreč nie zastajucca ŭ Biełarusi, a sychodziać u Rasiju. Kali apomnilisia, było ŭžo pozna.
Pa-druhoje, u rehulatara nasamreč nie vielmi šmat instrumientaŭ, kab hetuju historyju apieratyŭna spynić. Kałaŭr moh rassyłać listy z pahrozami, što my tut vam (kiraŭnikam bankaŭ — NN) nastupny raz kvalifikacyju nie paćvierdzim, kidajcie durnoje, ale heta ŭsurjoz uspryniać nie paśpieli.
Čytajcie taksama: Nacbank patrabuje ad bankaŭ spynić kredytavańnie rasijan
Kali praces užo pačaŭsia, to jon adbyvajecca vielmi chutka.
Takaja vialikaja, adnosna našaj, rasijskaja ekanomika mahła b vysmaktać hrošy z našaj sistemy i za tydzień, kali b była techničnaja mahčymaść. I vypraŭlać hetuju situacyju ŭ pracesie ŭžo było pozna, jaje treba było prosta nie dapuskać, pradbačyć, zadzirać patrabavańnie da reziervaŭ pry kredytavańni nierezidentaŭ raniej, čym jano pačałosia. Z hetym Kałaŭr i jahonaja kamanda nie spravilisia.
Ja dumaju, jaho i źniali jak čałavieka, «jaki nie spraviŭsia» ŭ ciažki dla biełaruskaj ekanomiki momant. I źniali biez padziak i santymientaŭ za papiarednija hady stabilnaj pracy», — dadaŭ inšy surazmoŭca.
Kali vy cenicie tuju infarmacyju, jakuju źbiraje «Naša Niva», dapamažycie našaj pracy, pieraličyŭšy hrošy praz Patreon abo pieradaŭšy Redakcyi ich lubym inšym zručnym dla vas sposabam. Dziakujučy hetamu my zmožam bolš.
«Naša Niva» — bastyjon biełaruščyny
PADTRYMAĆ
Kamientary
"Finansavy hienij" pahareŭ na tym, što nie zmoh ničoha zrabić ź inflacyjaj i pryjšłosia dyktataru zahadvać cenam stajać z adpaviednymi nastupstvami.
Tamu nie treba kanśpirałohij.