Ad Antarktydy adkałoŭsia vielizarny ajśbierh. Navukoŭcaŭ uraziła, što akazałasia pad im
Rakapadobnyja, ślimaki, čarviaki i ryby — heta tolki častka istot, jakich daśledčyki hłybakavodździa vyjavili pad masiŭnaj antarktyčnaj ledzianoj plitoj, piša The Washington Post.
Kali 13 studzienia ad ledzianoha ščyta adkałoŭsia hihancki ajśbierh daŭžynioj kala 30 kiłamietraŭ, navukoŭcy jakraz pracavali kala ŭźbiarežža Antarktydy. Im adkryŭsia ŭčastak akijana, jaki nie bačyŭ soniečnaha śviatła dziesiacihodździami.
Kamanda, jakaja znachodziłasia na borcie daśledčaha sudna Falkor (too), vyrašyła abśledavać marskoje dno ŭ zonie, jakaja tolki što ahaliłasia. Da hetaha momantu nivodzin čałaviek nie vyvučaŭ hetuju častku hłybokaha mora.
«Heta adzin z tych vypadkaŭ, kali kidaješ usio, čym zajmaješsia», — raskazała hałoŭnaja navukovaja supracoŭnica ekśpiedycyi Patrysija Eskiete.
Adnak pieršapačatkova čakańni byli nievialikimi: navukoŭcy nie dumali, što pad takim toŭstym ledzianym pokryvam mahło być bahataje žyćcio.
Ale toje, što kamanda vyjaviła pad ajśbierham, ich ździviła: hihanckija marskija pavuki, vaśminohi, ledzianyja ryby, karały i hubki, u tym liku hubka ŭ formie vazy, uzrost jakoj, mahčyma, dasiahaje niekalkich sotniaŭ hadoŭ. Daśledčyki ličać, što zmohuć apisać dziasiatki novych dla navuki vidaŭ.
«My byli sapraŭdy ździŭlenyja tym, nakolki raznastajnaj i bahataj akazałasia ekasistema tam, unizie», — skazała Eskiete, daśledčyca z Univiersiteta Aviejru ŭ Partuhalii.
Adkryćcio, abvieščanaje ŭ čaćvier, nie tolki paćviardžaje, što žyćcio zdolnaje praniknuć u samyja addalenyja kutki płaniety — navat pad drejfujučymi ledavikami, — ale i daje važnuju navukovuju bazu dla razumieńnia taho, jak hłybakavodnyja ekasistemy mohuć źmianiacca na fonie hłabalnaha paciapleńnia.
«Jany akazalisia ŭ patrebnym miescy ŭ patrebny čas i zmahli ŭbačyć cełuju ekasistemu», — skazała Džecika Virmani, kiraŭnica niekamiercyjnaha instytuta Schmidt Ocean Institute, jaki padtrymaŭ daśledavańnie.
Padčas ekśpiedycyi, jakaja doŭžyłasia kala miesiaca, daśledčyki z dapamohaj dystancyjna kiravanaha aparata zdymali videa, rabili fatahrafii i źbirali ŭzory sa dna ŭ samych hłybokich zonach kala bierahoŭ Antarktydy.
Kamanda taksama vyvučyła addalenyja rajony mora Bielinshaŭzena, jakija znachodziacca dalej ad ledzianoha ščyta. Siarod patencyjna novych vidaŭ — rakapadobnyja, marskija ślimaki, čarviaki i ryby.
Spatrebiacca miesiacy łabaratornych daśledavańniaŭ, kab paćvierdzić adkryćcio novych vidaŭ.
«Bolšaja častka pracy pačynajecca tolki ciapier», — padkreśliła Patrysija Eskiete.
Paśla letašniaj ekśpiedycyi la ŭźbiarežža Čyli navukoŭcy z taho samaha instytuta apisali bolš za 70 novych vidaŭ, u tym liku krabaŭ-pustelnikaŭ i marskich ślimakoŭ, raniej nieviadomych navucy.
U vypadku z Antarktydaj najbolšaja zahadka — nie ŭ niejkaj kankretnaj istocie, a ŭ cełaj ekasistemie: jak uvohule pad takim masiŭnym płastom lodu moža isnavać takoje bahataje žyćcio?
U inšych častkach akijana charčavańnie dla nasielnikaŭ marskoha dna zabiaśpiečvajuć arhanizmy, zdolnyja da fotasintezu, — ich reštki asiadajuć na dno. Ale pad ciomnym antarktyčnym lodam takoha nie adbyvajecca.
Zamiest hetaha pažyŭnyja rečyvy, vidać, prynosiacca akijanskimi płyniami, tałymi vodami ledavikoŭ ci inšymi jašče nie da kanca vyvučanymi krynicami.
«Ciapier heta stała najvažniejšym napramkam navukovych daśledavańniaŭ dziakujučy zroblenamu adkryćciu», — adznačyła Virmani.
Eskiete spadziajecca viarnucca ŭ hety rajon, kab vyvučyć, jak budzie mianiacca žyćcio pad učastkam akijana, vyzvalenym ad lodu, što dapamoža zrazumieć, jak moža źmianiacca hłybakavodnaje žyćcio ŭ palarnych rehijonach pa miery paciapleńnia klimatu i aktyŭnaha adkołvańnia ajśbierhaŭ u Antarktydzie i inšych miescach.
Najbujniejšy ŭ śviecie ajśbierh sieŭ na miel kala bierahoŭ Antarktydy
Chłopiec, jakoha zahłynuŭ kit, raskazaŭ, jak jamu ŭdałosia vyžyć
Stali viadomyja pieramožcy štohadovaj premii za najlepšyja FOTY dzikaj pryrody
Pahladzicie fota ŭpieršyniu vyjaŭlenaha hłybakavodnaha vaśminoha i jaho čaroŭnych inšapłanietnych dziaciej
Jak rakaviny pieratvarajucca ŭ zołata. Vustryc ciapier nie prosta hadujuć
Kamientary