Sudździa Kastryčnickaha sudu Viciebsku Taciana Žuraŭkova paličyła, što niezaležnaja hazeta «Viciebski kurjer M» naniesła maralnuju škodu miascovamu pradprymalniku Alaksandru Daniłavu i zasudziła ŭ jaho karyść amal 2 miljony rubloŭ kampensacyi.
Viciebski pradprymalnik atrymaŭ dazvoł harvykankamu na pabudovu zabaŭlalnaha maładziovaha centru pobač ź miescam, dzie kaliści znachodzilisia budynki chryścijanskich chramaŭ, u tym liku – sabor śviatoha Mikałaja. Prykładna ŭ hetym kutku sučasnaha skveru byli mohiłki, na jakich chavali śviataroŭ i znakamitych ludziej Viciebsku. Rašeńnie harvykankamu prymałasia niečakana i chutka, biez abmierkavańnia, jak patrabujecca, hramadzkaściu. Pra heta nia viedali i inšyja pradprymalniki horadu, jakija b mahli paŭdzielničać u adkrytym konkursie na zabudovu. Atrymałasia, što ŭsio było zroblena pad adnaho čałavieka.
«Viciebski kuŕjer M» padniaŭ hetuju prablemu, pryčym u maralnym aspekcie: ci varta na namolenym na praciahu stahodździaŭ miescy budavać zabaŭlalnuju ŭstanovu, u jakoj moładź budzie zajmacca skokami i hulać u azartnyja hulni. U artykule była taksama fraza pra toje, što rašeńnie pad kankretnaha čałavieka navodzić na dumku pra niejkija, moža rodnasnyja, suviazi pradprymalnika sa staršynioju harvykankamu Piatrom Drazdovym.
Jak vyśvietliłasia na sudzie, nieprymalnaść hetkich rodnasnych suviaziaŭ z adkaznym čynoŭnikam i lehła ŭ asnovu isku Daniłava. Jaho jašče vielmi pakryŭdziła, što hazeta byccam paličyła, što jon parušyŭ zakon. Pra heta, darečy, u artykule niama anivodnaha słova. Svoj maralny stan pradprymalnik paśla publikacyi paličyŭ vielmi drennym i zaprabavaŭ 30 miljonaŭ rubloŭ ź «Viciebskaha kuŕjera M» i jašče piać z aŭtara – invalida Siarhieja Butkieviča. Žurnalistu pra heta kazać nia stali, bo bajalisia čarhovaha insultu.
Niahledziačy na toje, što vydańnie padtrymali supracoŭniki adździełu kultury, historyki, tvorčaja intelihiencyja horadu, dobruju psychalahičnuju padtrymku akazała Pravasłaŭnaja carkva (Viciebskaja eparchija ŭznaharodziła hałoŭnaha redaktara vydańnia Uładzimiera Bazana hramataj za vychavańnie ŭ hramadzianaŭ duchoŭnaści), vyrak sudździa pabudavała na abvinavačańni vydańnia i žurnalista. Nie dapamahła i karysnaja publikacyi moŭnaja ekspertyza, jakuju zrabili ŭ Miensku.
U vyniku «Vydavieckamu domu «Viciebski kuŕjer»» daviadziecca zapłacić Daniłavu 1,5 miljona rubloŭ, jašče 150 tysiačaŭ pradprymalnik atrymaje ad Butkieviča, plus 310 tysiačaŭ pakryćcia vydatkaŭ. Ale hałoŭny redaktar Bazan spadziajecca, što sud vyšejšaj instancyi padtrymaje kasacyjnuju skarhu na rašeńnie Žuraŭkovaj.
