Łukašenka: pry ŭzrastajučych układańniach u biełaruski sport jon nie prynosić adpaviednaj addačy

Pra heta zajaviŭ prezident Biełarusi Alaksandr Łukašenka, vystupajučy siońnia na alimpijskim schodzie.

«Skažu ščyra: mianie niepakoić, što pry takoj uvazie da sportu ŭ krainie, pry ŭzrastajučych układańniach finansavych srodkaŭ u hetu halinu, časam navat na škodu inšym, my nie atrymlivajem adpaviednaj addačy», — skazaŭ kiraŭnik dziaržavy.

«Ale ž kožny biudžetny rubiel, jaki my ŭkładvajem u sport, asabliva ŭ ciapierašnich umovach, dajecca vielmi niaprosta. I jon pavinien pracavać na imidž krainy, na toje, kab pieramohi našych spartsmienaŭ rabili Biełaruś bolš viadomaj i aŭtarytetnaj u śviecie, kab uźnimali, u rešcie rešt, duch našaha naroda, źjadnoŭvali nacyju pačućciom hordaści, kali na mižnarodnych spabornictvach hučyć biełaruski himn i ŭźnimajecca naš ściah», — ličyć Alaksandr Łukašenka.

Na praciahu apošnich 16 hadoŭ na zimovych i letnich alimpijadach Biełaruś stabilna ŭvachodzić u lik 20 macniejšych dziaržaŭ. Adnak prezident ličyć, što hetaha niedastatkova:

«Prahresu ž niama, u dziasiatku ŭvajści nijak nie možam. Ale ž toje, što było dobra ŭčora, siońnia nas nie moža zadavolvać».

U jakaści prykładu ŭsio bolšych pośpiechaŭ u vialikim sporcie Alaksandr Łukašenka pryvioŭ Kitaj, jaki ŭsiaho za niekalki hadoŭ dabiŭsia značnych rezultataŭ. «Cudoŭna razumieju, što z kožnym hodam kankurencyja ŭ suśvietnym sporcie stanovicca macniejšaj, miedali zavajoŭvać usio bolš składana. Atrymlivajecca, što našy kankurenty raźvivajucca, a my staim na miescy.

Pa asobnych vidach sportu haniebna stracili liderskija pazicyi. Heta, u pryvatnaści, i kańkabiežny sport, i łyžnyja honki»,

— adznačyŭ kiraŭnik dziaržavy. Jon padkreśliŭ, što tut sprava nie ŭ miedalach i miescach. U mnohich biełaruskich spartsmienaŭ nie bačna imknieńnia da pieramohi, žadańnia adstajać honar krainy i dakazać moc biełaruskaha sportu. Łukašenka zhadaŭ vystupleńnie biełaruskich chakieistaŭ na Alimpijadzie ŭ Vankuviery, dzie, na jaho dumku, kamanda nie mieła svajho stylu hulni i nie prajaviła nieabchodnych bajcoŭskich jakaściaŭ.

«Nadyšoŭ čas patrabavać na vynik, za patračanyja srodki, za padmanutyja nadziei zaŭziataraŭ», — padkreśliŭ biełaruski lider.

Alaksandr Łukašenka adznačyŭ, što ŭ apošnija hady alimpijski ruch u krainie raźvivajecca dynamična, sportu nadajecca vialikaje značeńnie ŭ hramadstvie i dziaržavie, stvarajucca spryjalnyja ŭmovy jak u stalicy, tak i ŭ rehijonach. Akramia taho, praktyka raboty NAK rekamiendavana Mižnarodnym alimpijskim kamitetam dla ŭkaranieńnia ŭ inšych krainach, što śviedčyć ab peŭnych pośpiechach Biełarusi.

Na alimpijskim schodzie, akramia razhladu arhanizacyjnych pytańniaŭ, buduć padviedzieny vyniki vystupleńnia biełaruskich spartsmienaŭ na apošnich letnich i zimovych alimpijadach, pastaŭleny zadačy pa zabieśpiačeńniu paśpiachovaha vystupleńnia na CHCHCH letnich Alimpijskich hulniach u Łondanie, usiebakova praanalizavana efiektyŭnaść dziejnaści tych arhanizacyj, ad jakich zaležać vyniki vystupleńniaŭ spartsmienaŭ na alimpijadach.

Asablivaja ŭvaha budzie ŭdzielena pytańniam padrychtoŭki spartyŭnaha reziervu. «My pavinny vyznačycca, jak budziem vypraŭlać niehatyŭnuju situacyju ŭ tych letnich i zimovych alimpijskich vidach sportu, pradstaŭniki jakich niezdavalniajuča vystupili na Alimpijskich hulniach. Što nieabchodna zrabić dla taho,

kab u Łondanie i Sočy značna pierasiahnuć vyniki, dasiahnutyja ŭ Piekinie i Vankuviery», — źviarnuŭsia kiraŭnik dziaržavy da ŭdzielnikaŭ schodu.

Jon taksama dadaŭ, što čakaje, što siońniašniaje abmierkavańnie i analiz situacyi ŭ biełaruskim sporcie stanuć pačatkam efiektyŭnaha vyrašeńnia ŭsich isnujučych tut prablem.

• 0
• 0
• 0
• 0
• 0
• 0
• 0
• 0