U Minsku adkryŭsia restaran-muziej piva. U im čatyry tematyčnyja zały
Na histaryčnaj vulicy Revalucyjnaj, u samym sercy Minska, adkryŭsia restaran-muziej. Tam na troch pavierchach ažyvaje šmatviakovaja historyja biełaruskaha brovarstva, piša Tochka.by.
Muziej pradstaŭleny čatyrma tematyčnymi załami. Kožnamu naviedniku prapanujuć apynucca ŭ siaredniaviečnaj karčmie z masiŭnymi dubovymi stałami, pryhłušanym śviatłom i kavanymi elemientami.
Dalej idzie epocha madernu: jaje atmaśfieru stvaraje rekanstrujavanaja ŭstanova kanca XIX — pačatku XX stahodździa. Płaŭnyja linii mebli, mihacieńnie kryštalnych lustraŭ i huki pijanina pieraniasuć u časy, kali piŭnaja kultura była simvałam śvieckaha žyćcia i vytančanaha hustu.
Nastupnaja zała, pryśviečanaja pieryjadu SSSR, stylizavanaja pad saviecki restaran: ahitacyjnyja płakaty na ścienach, «Paparać-kvietka» ŭ mieniu i, viadoma, lehiendarny saviecki posud — hranionyja šklanki i piŭnyja kubki. Tut panuje duch prostaj i dastupnaj radaści, dzie piva nie raskoša, a častka paŭsiadzionnaha pobytu.
Kulminacyja muzieja — treci pavierch, ekspazicyja «Letapis zavoda: ad 1876 da našych dzion». Heta serca prajekta Lidbeer, całkam pryśviečanaje historyi Lidskaha brovaru. Hości prasočać uvieś šlach pradpryjemstva: ad jaho zasnavańnia ŭ 1876 hodzie lidskim mieščaninam Nosielem Pupko da statusu fłahmana industryi.
U ekspazicyi pradstaŭlenyja ekskluziŭnyja archiŭnyja materyjały, asabistyja rečy zasnavalnikaŭ, piŭnyja etykietki i ŭzory sučasnaj pradukcyi.
U muziei dastupna braniravańnie ekskursij dvuch farmataŭ: z dehustacyjaj napojaŭ i z napojami dy stravami biełaruskaj kuchni roznych epoch.
Ciapier čytajuć
«Dla biełaruskich uładaŭ ja, chutčej, mahčymaść, a nie pahroza». Kaleśnikava dała vialikaje intervju Zołatavaj86
Kamientary