Što adbyvałasia za kratami z zatrymanymi pa spravie ab padryvie rasijskaha samalota A-50 u Mačuliščach

Pierakładčyk i były palitviazień Siarhiej Paŭłavicki raskazaŭ «Našaj Nivie», jak za kratami paznajomiŭsia ź niekatorymi fihurantami spravy ab padryvie rasijskaha samalota A-50 na aeradromie ŭ Mačuliščach.

U SIZA KDB Siarhiej sustreŭ ukrainca Mikałaja Šviaca — aficyjnyja orhany jaho nazyvali vykanaŭcam toj dyviersii:

«Pryviali chłopca, jon nazvaŭ siabie — kaža, Mikoła. Słova za słova, i jon skazaŭ, ź jakoj nahody jon tam — maŭlaŭ, ja ž samalot ichni padarvaŭ.

[…] Mikoła nie ličyŭ siabie terarystam, jon nazyvaŭ siabie dyviersantam. Kazaŭ, što jon ahient słužby biaśpieki Ukrainy i što byŭ padrychtavany, kab ździejśnić hety ŭčynak suprać techniki voraha. Nie pamiataju, kab jon vykazvaŭ asablivuju varožaść suprać Biełarusi. Jon prosta ličyŭ svaje dziejańni absalutna zakonnymi [va ŭmovach, kali na Ukrainu napali]».

Paŭłavicki zaŭvažaje, što Šviec u raskazach pra dyviersiju nikoli nie zhadvaŭ inšych ludziej. Kazaŭ pra ŭsio ŭ adzinočnym liku — maŭlaŭ, ja pryjechaŭ u Biełaruś, uładkavaŭsia na pracu, zdabyŭ dron i zapuściŭ jaho. Kali ŭkrainca pieravodzili ź SIZA KDB letam 2024-ha, jon jašče nie viedaŭ, što jaho vyzvalać, ale spadziavaŭsia na heta:

«Apošnija miesiacy jon žyŭ čakańniem, što jaho zabiaruć svaje. Kali jon adjazdžaŭ, heta mahło być što zaŭhodna — pieravod u inšuju kamieru, inšuju ŭstanovu. My jamu sabrali torbu naležnym čynam, pakłali sała i kaŭbasy, tak što pajechaŭ nie hałodny, nie musić na nas kryŭdzicca».

Pieradačaŭ u Šviaca nie było — prosta nie mieŭ ludziej, jakija mahli b ich pieradać. Mikałaj prasiŭ pieradać list ukrainskamu pasłu, ale zamiest hetaha jamu prapanoŭvali hutarku z prapahandystami: maŭlaŭ, skažaš naŭprost u kamieru dla Zialenskaha ci Budanava. Na heta ŭžo nie pahadžaŭsia sam Šviec.

U inšaj kamiery Siarhiej paznajomiŭsia ź jašče adnym fihurantam toj spravy, Andrejem Ściapurkam:

«U momant znajomstva Andrej adrazu skazaŭ — maŭlaŭ, prabač, ale ja pra siabie ničoha raskazvać nie budu. Kali jaho niekudy zabrali z kamiery, mnie raskazali, što ŭ chłopca nie ŭsio prosta, jon zaviazany ŭ niejkich terarystyčnych spravach, a ŭ jakich, nichto asabliva nie viedaŭ. Byli zdahadki, što moža jon źviazany ź piejntbalistami.

Potym jon raskazaŭ, što ŭ jaho nasypanaja pryharšča artykułaŭ. Uvieś čas jaho vyklikali na dopyty, i adnojčy jon viarnuŭsia niejki zadavoleny — my tak zrazumieli, što jamu niešta z tych artykułaŭ skinuli».

Pavialičyć

Kali Šviaca vyzvalili i adpravili va Ukrainu, Ściapurka žyŭ nadziejaj na toje, što sprava razvalicca — maŭlaŭ, jakaja sprava pra teraryzm biez hałoŭnaha «terarysta»? Ale skončyłasia tym, što fihurantaŭ toj spravy pieraviali ź SIZA KDB u SIZA №1, dzie jany i znachodzilisia da suda. Pa danych pravaabaroncaŭ, ciapier Andrej Ściapurka adbyvaje termin u navapołackaj kałonii №1.

Padčas etapavańnia Paŭłavicki sustreŭ Dzianisa Sakałova — hety fihurant spravy Mačuliščaŭ taksama adbyvaje ciapier termin:

«Dzianis — čałaviek aptymistyčny, rašučy, naporysty, vielmi inicyjatyŭny. Jon sapraŭdny pradprymalnik, u jaho ŭ hałavie pastajanna naradžajucca niejkija biznes-płany. 

Pavialičyć

Byli tam i dobra raspracavanyja płany, naprykład, budaŭnictva razumnaha doma. Dzianis dakładna viedaŭ, jakoje abstalavańnie tam budzie stajać, dzie buduć znachodzicca datčyki».

Nakolki viadoma, Ściapurku dali kala 6 hadoŭ kałonii, Sakałovu — 13. Šviec byŭ pamiłavany, jaho addali Ukrainie.

Nahadajem, ranicaj 26 lutaha 2023 hoda na aeradromie Mačuliščy zdarylisia vybuchi kala kaštoŭnaha rasijskaha samalota dalniaj raźviedki DRŁV A-50, jon byŭ padarvany ŭ dvuch miescach. Jon vykarystoŭvaŭsia dla naviadzieńnia rasijskich rakiet na celi va Ukrainie. Paśla samalot adpravili na ramont na 325‑i avijacyjny ramontny zavod, jaki ŭvachodzić u skład Tahanrohskaha avijacyjnaha navukova-techničnaha kompleksu imia Bieryjeva ŭ Rasii.

Pa hetaj spravie asudzili 12 čałaviek. Mikałaju Šviacu dali 25 hadoŭ pazbaŭleńnia voli, inšym «saŭdzielnikam» — ad 15 da 25 hadoŭ pazbaŭleńnia voli, a «inšym abvinavačanym pa spravie» — ad 2 hadoŭ 3 miesiacaŭ da 15 hadoŭ. Kankretnyja prysudy kožnamu z abvinavačanych, akramia Šviaca, nie nazyvalisia.

• 8
• 0
• 0
• 2
• 1
• 4
• 5
• 1