Dziejačy emihracyi pasvarylisia z nahody śpisaŭ zaprošanych na pryjom da prezidenta Polščy
Usio pačałosia z dopisu Alaksieja Dzikavickaha, byłoha dyrektara «Biełsata», jaki ŭ fejsbuku padniaŭ prablemu: niechta vykraśliŭ jaho sa śpisu zaprošanych na pryjom da Naŭrockaha. «Darosłyja ludzi, a zajmajucca takoj fihnioj», — piša jon. U kamientaryjach adhuknulisia inšyja pakryŭdžanyja tym, što ich taksama nie zaprasili.
Apisvajučy kantekst, Dzikavicki tłumačyć, što administracyja polskaha prezidenta ad časoŭ Dudy zaprašaje biełarusaŭ na śviatočny pryjom u prezidencki pałac.
Kožny hod tudy chadziŭ i Dzikavicki, ale ŭ 2026‑m jaho nie zaprasili, «chacia ŭ śpisy byŭ padadzieny».
Na dumku Dzikavickaha, heta adbyłosia praź intryhi biełarusaŭ, «jakich čynoŭniki paprasili padrychtavać i spraŭdzić śpisy haściej» — tyja, nibyta, «zrabili ŭsio mahčymaje, kab Dzikavickaha sa śpisaŭ vykraślić».
Heta jon źviazvaje z tym, što «nie padziakavaŭ, jak naležyć, a podłaść nazvaŭ podłaściu».
Dzikavicki pryznaje, što dakładna nie viedaje, chto hetym razam jaho vykreślivaŭ, ale zdahadvajecca. I razam z hetym pryznajecca, što vykreślili proźviščy i inšych, značna bolš hodnych, čym jon, ludziej.
Svoj kryk dušy jon skančaje zaklikam da tych, chto zajmaŭsia składańniem śpisaŭ.
«Kali ty/vy dumajecie, što majecie prava vyrašać, chto hodny zvacca čalcom biełaruskaj hramady, a chto nie — vy pamylajeciesia. Toje, što vy vypadkova apynulisia ŭ patrebnaj situacyi i ŭ patrebny čas, nie daje vam prava vyrašać, chto sapraŭdny biełarus, a chto — nie, a tym bolš — manapalizoŭvać biełaruskaje pradstaŭnictva. Lepiej vykarystajcie hetuju situacyju jak šaniec papracavać nad ułasnymi kompleksami, pychaj. A potym zajmiciesia čym-niebudź bolš karysnym, kali ŭmiejecie.
Žyvu tut nastolki doŭha, što sustrakaŭsia i razmaŭlaŭ z usimi prezidentami majoj druhoj Ajčyny, da adnaho dahetul maju pryvatny mabilnik, a dla inšaha dapamahaŭ adnojčy pisać pramovu, što tyčyłasia Biełarusi.
Tamu vašaje drobnaje škodnictva nie maje dla mianie anijakaha značeńnia — ani ŭ sensie prafiesijnym, ani ŭ pryvatnym.
Pasłuchajcie, kali łaska, starejšaha tavaryša: kali budziecie ŭvieś čas zdavać i hanić svaich (heta ž nie pieršy raz, praŭda?), čužyja taksama vas pavažać nie buduć».
U pastskryptumie Dzikavicki dadaŭ, što na pryjomie, chutčej za ŭsio, budzie praz namahańni trecich asob. Tamu «viaršycielaŭ losaŭ» jon zahadzia prosić lepš nie padychodzić da jaho z falšyvymi ŭśmieškami, bo sam jon ruku padavać nie choča, a niekulturna sabie pavodzić taksama nie budzie, kab pra biełarusaŭ nie padumali čaho kiepskaha.
«Paznaju hety počyrk»
U kamientarach Dzikavickaha padtrymali niekatoryja jaho byłyja kalehi.
Tak, były viadoŭca «Biełsata» Siarhiej Padsasonny adznačyŭ:
«Łajalnaść, łajalnaść, łajalnaść… Usio staroje, jak śviet. Mizernaść hetych «napaleonaŭ» navat nie ździŭlaje, nie ŭražvaje, prosta vyklikaje ahidu».
Eks-supracoŭnik «Biełsata» Ihar Kulej padzialiŭsia, što jaho taksama vykraślili jašče letaś.
«Našy asobnyja «znatnyja» pradstaŭniki demsił stali praciaham unutranych polskich razborak i vykinuli ŭsich, chto nie padtrymaŭ čystki na «Biełsacie», a moža, i nie tolki nas», —
vykazaŭ Kulej svaju viersiju matyvacyi i nazvaŭ vinavatych:
«Paznaju hety počyrk. (…) Vykreślivajuć «niazručnych» abo pradstaŭniki APK, abo Ofisa Śviatłany Cichanoŭskaj, bolš niama kamu».
Da abmierkavańnia dałučylisia i inšyja pradstaŭniki demakratyčnych kołaŭ.
Najbolš łakaničnym byŭ babarykaniec Ivan Kraŭcoŭ, jaki pakinuŭ taki dopis: «+1 tut».
Eks-śpikier Kaardynacyjnaj rady Andrej Jahoraŭ taksama byŭ niešmatsłoŭnym: «Jak znajoma».
«Kenselinh, marhinalizacyja, padnožki, brud»
A voś palityk i paplečnik Zianona Paźniaka Pavieł Usaŭ vykazaŭsia vielmi krytyčna i biezapielacyjna:
«Heta nasamreč vielmi žudasna, bo kali ŭ čužoj krainie «biełarusy» (proźviščy jakich usio ž varta viedać) vyrablajuć takija paskudstvy, to bajusia sabie ŭjavić, što jany buduć rabić u Biełarusi.
Adkaz vidavočny. Tamu, pa hetym dy inšych prykładach, možna naŭprost skazać, što pieramieny z takimi pieramienščykami dla Biełarusi niebiaśpiečnyja.
Ź inšaha boku, dumaju, što kłan, jaki zaraz niby pradstaŭlaje apazicyju, robić jakraz usio, kab pieramienaŭ i nie adbyłosia. Dla demakratyčnaj supolnaści JANY navat bolš škodnyja, čym Łukašenka, bo jon nie nazyvaje siabie demakratam».
Zasnavalnik «Biełaha lehijona» Siarhiej Bulba padtrymaŭ krytyku:
«Kak daleki oni ot naroda»… paralelnaja rečaisnaść. Ludzi, jakija na biełaruskaj temie adno hranty pilać, sprabujuć vydavać siabie za tych, chto zdolny vyrašyć los narodu. Brydkaje vidovišča. Padalej ad vas trymacca chočacca».
Były supracoŭnik Ofisa Cichanoŭskaj Valer Kavaleŭski raspavioŭ pra svaju padobnuju historyju:
«MZS Polščy miesiac tamu zapytaŭ maje asabistyja danyja dla zaprašeńnia na prymańnie, jakija jany paśla pieradali ŭ kancylaryju prezidenta. Tam kancy abarvalisia. I ja pierakanany, što heta rašeńnie nie polskaha boku, a hałoŭnych pradstaŭnikoŭ biełaruskaha naroda, viečnych lidaraŭ i biezdakornych simvałaŭ našaha demakratyčnaha vybaru.
Kenselinh, marhinalizacyja, padnožki, brud i abhavory apanientaŭ ci ludziej z alternatyŭnym mierkavańniem na šlachu da vyrašeńnia kryzisu ŭ Biełarusi stali normaj palitstruktur demruchu».
«Nastupnym ich krokam budzie zavieści špica»
Svaimi nazirańniami padzialiŭsia i kiraŭnik Asacyjacyi biełaruskaha biznesu Jaŭhien Bury. Pavodle jaho słoŭ, sioleta jon nie atrymaŭ zaprašeńnia ni na Kaladny pryjom da Prezidenta Polščy, ni na Kaladny pryjom da Śviatłany Cichanoŭskaj.
«Nu chiba tolki heta polski bok paŭpłyvaŭ na rašeńnie Śviatłany bolš mianie nie zaprašać na jaje pryjomy. Bo nie moh ža Ofis sam prosta ŭziać i vykraślić mianie sa svaich śpisaŭ tolki za toje, što ja nie byŭ łajalny i moh kazać toje, što ja nasamreč dumaju i pra Ofis, i APK. I ja ščyra vieru, što jany sapraŭdy imknucca da «maksimalnaj raznastajnaści i inkluziŭnaści».
Sarkazm Buraha padtrymała jaho žonka Maryna Hiryn. Pavodle jaje słoŭ, «apošnija hady dla niekatorych dempalitykaŭ užo stała całkam normaj chadzić na pryjomy, na miedyjakanały dy jeździć u słužbovyja padarožžy ź dziećmi».
Hiryn dadaje, što nie ździvicca, «kali nastupnym ich krokam budzie zavieści špica i chadzić paŭsiul jašče i ź im, reputacyju ž patrebna niejak padymać, kali śpievy nie dapamohuć».
Što adkazali abvinavačanyja
U toj ža čas daradca Śviatłany Cichanoŭskaj Franak Viačorka zapeŭniŭ:
«Nie zajmajusia i nie zajmaŭsia. (…) Ofis i Kabiniet nie vykreślivajuć nikoha, a naadvarot, imknucca dadavać imiony i pieradavać arhanizataram, kab nikoha nie zabyć i kab usie byli zaprošanyja i zadavolenyja — u hetym i jość meta kaladnaha pryjomu — sabrać usich, niezaležna ad pohladaŭ, partyjaŭ, prafiesij. My zaŭždy imkniemsia da maksimalnaj raznastajnaści i inkluziŭnaści».
Na krytyku adhuknułasia adna sa składalnic śpisa — supracoŭnica Abjadnanaha pierachodnaha kabinieta, žurnalistka i art-mieniedžarka Irena Kaciałovič.
«Koštam «achviary» niekatorymi zaŭsiodnikami na pryjomie pabyvajuć tyja, chto nikoli na im nie byŭ, — heta pradstaŭniki kultury, miedyja, publičnyja asoby, a taksama niadaŭna vyzvalenyja palitviaźni.
Kali b była mahčymaść zaprasić usich, to, napeŭna, zaprasili b, adnak pry najaŭnych mahčymaściach chtości, na žal, abaviazkova musić sastupić.
Z «navičkoŭ» taksama nie ŭdałosia zaprasić usich, kaho chaciełasia b, ale ŭ ich reakcyjach było našmat bolš razumieńnia», — patłumačyła Kaciałovič i dadała: «Luby padobny śpis niespraviadlivy, nieabjektyŭny i nie moža zadavolić usich, ale prykra, što spadarstva ŭ kamientarach, razumiejučy heta, vykarystoŭvaje pryjom prezidenta Polščy jak čarhovuju nahodu dla svarak i teoryj zmovy».
«Kali vy tak zmahajeciesia za spraviadlivaść i inkluziŭnaść — dyk i admovilisia b sami»
U sprečku ź joj ustupiŭ Jaŭhien Bury, padkreśliŭšy, što z pradstaŭnikami biznesu nichto nie abmiarkoŭvaŭ mahčymaść zamieny:
«Kali b u mianie była takaja opcyja — admovicca ad udziełu na karyść inšaha (naprykład, palitviaźnia) — ja b z zadavalnieńniem heta zrabiŭ. Ale jaje nie było. Nichto ničoha z nami jak biznes-supolnaściu nie abmiarkoŭvaŭ».
«Kali vy tak zmahajeciesia za spraviadlivaść i inkluziŭnaść — tak i admovilisia b sami jak palityčnyja struktury na karyść inšych. Chapiła b pa adnamu pradstaŭniku — tym bolš što heta amal usie adnyja i tyja ž ludzi (i ź dziećmi chadzić tudy zusim nie abaviazkova). Hladziš, tak paru dziasiatkaŭ miescaŭ by zvolniłasia dla inšych», — padsumavaŭ Bury.
Vyrašyŭ vykazacca i błohier Alaksandr Knyrovič:
«Paciešna… paciešna, što ja taki, akazvajecca, zusim nie adzin… raniej — zaprašali, zaraz — nie. Ja vielmi rady, što sastupiŭ hetaje miesca niejkamu bolš vartamu pabyvać na prezidenckim pryjomie čałavieku».
Mnohija ludzi vykazali i adkrytaje abureńnie pastom Alaksieja Dzikavickaha.
«Brydka čytać, jak ludzi hryzucca za zaprašeńnie na niejki tam pryjom. Hańba», — prakamientavaŭ redaktar «Našaj historyi» Andrej Dyńko.
«U Biełarusi siadzić 1100+ palitviaźniaŭ, u susiedniaj krainie idzie vajna. Čym zajmajucca dziejačy palityčnaj emihracyi? Płačucca adzin adnamu i śvietu, što ich nie paklikali na niejki ŭračysty pryjom u Varšavie. Realna, ludzi mohuć pieražyvać, što nie zmohuć zdalok kiŭnuć polskamu prezidentu i ŭźniać paru kielichaŭ šampanskaha. Ćfu ty, panyły soram», — napisaŭ były palitźniavoleny žurnalist Jahor Marcinovič.
Ciapier čytajuć
Cichanoŭskaja: Dzieci nie pierajechali ŭ ZŠA, a prosta časova buduć z tatam dziela biaśpieki39
Kamientary
Pomniu była takaja šutka o tom kak poruhaliś v emihracii dva rośsijskich impieratora. )