Dyzajniery prapanujuć vychodzić zamuž u viasielnych šlopancach — takuju kalekcyju vypuścili ŭ Birkenstock
Usio bolš niaviest zamiest tradycyjnych abcasaŭ na viasielle abirajuć alternatyvu, u jakoj dakładna budzie kamfortna: adny vychodziać zamuž u baletkach, inšyja — u kiedach ci marcinsach.
Znakamity niamiecki brend abutku z anatamična pravilnymi vuściłkami Birkenstock na chvali mody na kamfort razam z dyzajnierkaj ź Ńju-Jorka Daniel Frankiel Chirš vypuścili kalekcyju viasielnych šlopancaŭ.
Novaja kalekcyja — heta kłasičnyja i lubimyja mnohimi madeli Birkenstock, ale ŭ viasielnym pračytańni. Stylisty prarakajuć im vialikuju budučyniu — niekatoryja navat ličać, što Birkenstock zadaje hałoŭny trend na 2026 hod, i za imi rušać uśled mnohija inšyja brendy, sfakusavanyja na abutku ci kankretna na viasielnaj modzie.
«Navat samyja zručnyja łodački ci tufli z «kačynym myskom», dy navat baletki nie mohuć spaborničać z kamfortam Birkenstock. Maŭču ŭžo pra abutak na špilkach», — adhukajucca pieršyja hrupy teściroŭščyc.
Šlopancy vykananyja ŭ małočnych adcieńniach i rasšytyja piarlinami i karunkavymi kvietkami. Ad kłasičnych madelaŭ ich adroźnivajuć i bolš elehantnyja zašpilki.
Nie zabyli dyzajniery i pra žanichoŭ: u kalekcyju ŭvachodzić minimalistyčnaja čornaja viersija madeli Arizona dla mužčyn.
Stvaralniki viasielnaj kapsuły adznačajuć, što jana stała reakcyjaj na patreby sučasnych par, jakija adychodziać ad tradycyjnych viasielnych cyrymonij i łamajuć stereatypy, chočuć, kab adzieńnie adlustroŭvała ich ład žyćcia, a nie adkazvała na čakańni amataraŭ tradycyj.
Vychad kalekcyi zapłanavany na 12 lutaha. Ceny na viasielnyja šlopancy buduć vyrjiravacca ad 660 da 950 dalaraŭ.
Kamientary