«Jeła raz na sutki, skinuła 4 kh». Biełaruska, jakaja była zachrasła na Maldyvach, viarnułasia dadomu
Biełaruska, jakaja praz abvastreńnie kanfliktu na Blizkim Uschodzie i masavuju admienu rejsaŭ zachrasła na Maldyvach, zmahła viarnucca dadomu. Volha prabyła na astravach 16 dzion zamiest dzieviaci i raskazała, jak pieraniesła hetaje «niezabyŭnaje padarožža». «Ja bajałasia vychodzić na vulicu, jeła raz u sutki i skinuła 4 kh», — kaža dziaŭčyna, zhadvajučy adpačynak, jaki jana ličyła «maraj usiaho svajho žyćcia». Pra padrabiaznaści jaje viartańnia napisała vydańnie «Anłajnier».
Što adbyłosia?
Volha pavinna była adpačyvać na Maldyvach z 25 lutaha pa 5 sakavika (vostraŭ Maafušy), ale praź situacyju na Blizkim Uschodzie sutyknułasia z admienaj rejsaŭ. Tur byŭ z vyletam z Maskvy avijakampanijaj Air Arabia praz Šardžu (AAE), nazad — pa toj ža schiemie. Ale vylet pieranieśli spačatku na 12-ha, a paśla — na 15 sakavika, a žyllo spačatku prapanavali šukać samastojna.
Paźniej turapieratar usio ž prapanavaŭ Volzie varyjant pažyć da vyletu spačatku ŭ adnym, a paśla ŭ inšym hateli. Pry hetym treba było pierajechać z kurortnaha vostrava Maafušy na Male, dzie «navat z domu było niebiaśpiečna vyjści, bo byŭ Ramadan». A avijakampanija hatovaja była aformić viartańnie srodkaŭ kredytnym vaŭčaram, im možna skarystacca na praciahu peŭnaha terminu na kuplu biletaŭ Air Arabia.
Hetyja varyjanty Volhu nie zadavolili: joj treba było jak maha chutčej viarnucca dadomu i vyjści na pracu.
«Kali pisała z prośbaj dapamahčy, turapieratar Anex (ź jakim zaklučanaja damova) adpraŭlaŭ mianie da turahienta, a pa pytańniach pražyvańnia — u avijakampaniju. Dyrektar turahienctva «360 Trevieł» dapamoh skłaści zvaroty ŭ avijakampaniju i Anex, ale patłumačyŭ: jaho paŭnamoctvy na hetym zakančvajucca, usie klučavyja pytańni pavinien vyrašać bujny apieratar. U čaćvier, 5 sakavika, mianie vysielili z hatela. Praz Threads mnie ŭdałosia znajści dziaŭčynu z Prahi, jakaja apynułasia ŭ padobnaj situacyi. Jana źniała kvateru ŭ Male i puściła mianie pažyć da siabie da 7 sakavika», — raskazvała dziaŭčyna.
«Na stresie skinuła 4 kh»
Na momant publikacyi papiaredniaha materyjału turapieratar Anex prapanavaŭ Volzie pravieści adnu noč (6 sakavika) u hateli Noomoo Huhumale, a z 7 sakavika — dźvie nočy ŭ hateli Amber Sea Side.
Ale dziaŭčyna pabajałasia zastavacca na vostravie Male i pierabrałasia na łakalny vostraŭ Hurajda (Guraidhoo), raźmieščany za 30 km ad stalicy Maldyvaŭ. Jak i na susiednim Maafušy, tut taksama byli bikini-plaž, kafe, kramy, balnica.
«Heta było sapraŭdy niezabyŭnaje padarožža, — zhadvaje dziaŭčyna. — Pra «vyžyć na Maldyvach» možna knihu pisać. Astatnija dni ja žyła za svoj košt, prapanavany varyjant ad turfirmy dla mianie byŭ niebiaśpiečnym, zastavacca adnoj u Male mnie było strašna, tym bolš što nie było ŭpeŭnienaści, što turapieratar padoŭžyć žyllo niepasredna da dnia vyletu.
Tamu praz znajomych znajšła biudžetny varyjant na vostravie Hurajda, pra što adrazu ž paviedamiła turfirmie i prapanavała jaho apłacić, ale mnie admovili».
Kala 2 tysiač dalaraŭ na darohu nazad dziaŭčynie sabrali jaje siabry i znajomyja z rodnaha Dziaržynska. Hetych hrošaj, pavodle jaje słoŭ, chapiła na pražyvańnie i na toje, kab kupić zvarotny kvitok na samalot.
«U jakaści varyjantu mnie padkazali miascovy nievialiki hatel Chambao hotel. Jakoje ž było majo ździŭleńnie, kali ja daviedałasia, što jaho haspadynia Alena — biełaruska i što jaje dziacinstva prajšło ŭ Dziaržynskim rajonie. Uvohule, sustreli mianie ź ciepłynioj, kłopatam i vielmi smačnaj ježaj».
Pa słovach Volhi, padtrymka ziamlački šmat u čym dapamahła joj spravicca i pieražyć situacyju.
«Ranicaj 8 sakavika ja raspłakałasia, dumajučy pra toje, što ŭ śviata zastałasia biez kvietak i ŭvahi. Pryjšła na śniadanak, a tam śpiecyjalna dla mianie ŭsio ŭpryhožyli kvietkami. Heta było tak miła!
Tym nie mienš maja tryvožnaść paśla stresu, zdajecca, prabiła kosmas: paśla Male, dzie ŭsie byli pahłynutyja Ramadanam, mnie strašna było vychodzić na vulicu, plus da ŭsiaho prychodziłasia aščadžać kožnuju kapiejku, sabranuju ludźmi.
U kramy, kaviarni schadziła, moža, paru razoŭ. Adpaviedna, jeła ŭ asnoŭnym raz u sutki. Na stresie i haładoŭcy skinuła 4 kh. Adpačyvać užo nie chaciełasia, ja tolki ličyła dni, kali palaču dadomu».
Pavodle słoŭ dziaŭčyny, jana zapytała ŭ turfirmy viartańnie srodkaŭ za admienieny ŭ čarhovy raz rejs, «ale dahetul nijakich listoŭ i viartańnia nie dačakałasia». Viarnucca ŭ Biełaruś jana zmahła 12 sakavika rejsam «Aerafłota» Male — Maskva (aeraport Šaramiećjeva). Kvitok na samalot byŭ kupleny za hrošy, sabranyja ziemlakami. Usiaho na pražyćcio i darohu nazad u dziaŭčyny pajšło kala 1700 dalaraŭ:
«U mianie zastaŭsia asadak ad taho, jak arhanizatary tura pastavilisia da majoj situacyi. Kali b jany 28 lutaha nie stali pierakonvać, što my vylecim nazad 5 sakavika, to ja b zmahła kupić kvitki značna tańniej i być doma svoječasova. U vyniku lacieła dadomu ŭ dva razy daražej, i mnie pakul navat hrošy za tyja kvitki nie viarnuli».
Pakolki turapieratar pieršapačatkova nie padoŭžyŭ Volzie pražyvańnie ŭ hateli i nie dastaviŭ jaje dadomu, Volha adpraviła dasudovuju pretenziju na adras Anex.
Ciapier čytajuć
Prakuror prosić dla eks-pamočnika Łukašenki Ihara Bryło 12 hadoŭ źniavoleńnia4
Prakuror prosić dla eks-pamočnika Łukašenki Ihara Bryło 12 hadoŭ źniavoleńnia
Pahladzieli film «Piaščotna da siabie», źniaty pa dzika papularnaj biełaruskaj knizie — pra zaciukanuju žančynu, jakuju chočuć zrabić dla ŭsich zručnaj33
Kamientary