«Ела раз на суткі, скінула 4 кг». Беларуска, якая была захрасла на Мальдывах, вярнулася дадому
Беларуска, якая праз абвастрэнне канфлікту на Блізкім Усходзе і масавую адмену рэйсаў захрасла на Мальдывах, змагла вярнуцца дадому. Вольга прабыла на астравах 16 дзён замест дзевяці і расказала, як перанесла гэтае «незабыўнае падарожжа». «Я баялася выходзіць на вуліцу, ела раз у суткі і скінула 4 кг», — кажа дзяўчына, згадваючы адпачынак, які яна лічыла «марай усяго свайго жыцця». Пра падрабязнасці яе вяртання напісала выданне «Анлайнер».
Што адбылося?
Вольга павінна была адпачываць на Мальдывах з 25 лютага па 5 сакавіка (востраў Маафушы), але праз сітуацыю на Блізкім Усходзе сутыкнулася з адменай рэйсаў. Тур быў з вылетам з Масквы авіякампаніяй Air Arabia праз Шарджу (ААЭ), назад — па той жа схеме. Але вылет перанеслі спачатку на 12-га, а пасля — на 15 сакавіка, а жыллё спачатку прапанавалі шукаць самастойна.
Пазней тураператар усё ж прапанаваў Вользе варыянт пажыць да вылету спачатку ў адным, а пасля ў іншым гатэлі. Пры гэтым трэба было пераехаць з курортнага вострава Маафушы на Мале, дзе «нават з дому было небяспечна выйсці, бо быў Рамадан». А авіякампанія гатовая была аформіць вяртанне сродкаў крэдытным ваўчарам, ім можна скарыстацца на працягу пэўнага тэрміну на куплю білетаў Air Arabia.
Гэтыя варыянты Вольгу не задаволілі: ёй трэба было як мага хутчэй вярнуцца дадому і выйсці на працу.
«Калі пісала з просьбай дапамагчы, тураператар Anex (з якім заключаная дамова) адпраўляў мяне да турагента, а па пытаннях пражывання — у авіякампанію. Дырэктар турагенцтва «360 Трэвел» дапамог скласці звароты ў авіякампанію і Anex, але патлумачыў: яго паўнамоцтвы на гэтым заканчваюцца, усе ключавыя пытанні павінен вырашаць буйны аператар. У чацвер, 5 сакавіка, мяне выселілі з гатэля. Праз Threads мне ўдалося знайсці дзяўчыну з Прагі, якая апынулася ў падобнай сітуацыі. Яна зняла кватэру ў Мале і пусціла мяне пажыць да сябе да 7 сакавіка», — расказвала дзяўчына.
«На стрэсе скінула 4 кг»
На момант публікацыі папярэдняга матэрыялу тураператар Anex прапанаваў Вользе правесці адну ноч (6 сакавіка) у гатэлі Noomoo Huhumale, а з 7 сакавіка — дзве ночы ў гатэлі Amber Sea Side.
Але дзяўчына пабаялася заставацца на востраве Мале і перабралася на лакальны востраў Гурайда (Guraidhoo), размешчаны за 30 км ад сталіцы Мальдываў. Як і на суседнім Маафушы, тут таксама былі бікіні-пляж, кафэ, крамы, бальніца.
«Гэта было сапраўды незабыўнае падарожжа, — згадвае дзяўчына. — Пра «выжыць на Мальдывах» можна кнігу пісаць. Астатнія дні я жыла за свой кошт, прапанаваны варыянт ад турфірмы для мяне быў небяспечным, заставацца адной у Мале мне было страшна, тым больш што не было ўпэўненасці, што тураператар падоўжыць жыллё непасрэдна да дня вылету.
Таму праз знаёмых знайшла бюджэтны варыянт на востраве Гурайда, пра што адразу ж паведаміла турфірме і прапанавала яго аплаціць, але мне адмовілі».
Каля 2 тысяч даляраў на дарогу назад дзяўчыне сабралі яе сябры і знаёмыя з роднага Дзяржынска. Гэтых грошай, паводле яе слоў, хапіла на пражыванне і на тое, каб купіць зваротны квіток на самалёт.
«У якасці варыянту мне падказалі мясцовы невялікі гатэль Chambao hotel. Якое ж было маё здзіўленне, калі я даведалася, што яго гаспадыня Алена — беларуска і што яе дзяцінства прайшло ў Дзяржынскім раёне. Увогуле, сустрэлі мяне з цеплынёй, клопатам і вельмі смачнай ежай».
Па словах Вольгі, падтрымка зямлячкі шмат у чым дапамагла ёй справіцца і перажыць сітуацыю.
«Раніцай 8 сакавіка я расплакалася, думаючы пра тое, што ў свята засталася без кветак і ўвагі. Прыйшла на сняданак, а там спецыяльна для мяне ўсё ўпрыгожылі кветкамі. Гэта было так міла!
Тым не менш мая трывожнасць пасля стрэсу, здаецца, прабіла космас: пасля Мале, дзе ўсе былі паглынутыя Рамаданам, мне страшна было выходзіць на вуліцу, плюс да ўсяго прыходзілася ашчаджаць кожную капейку, сабраную людзьмі.
У крамы, кавярні схадзіла, можа, пару разоў. Адпаведна, ела ў асноўным раз у суткі. На стрэсе і галадоўцы скінула 4 кг. Адпачываць ужо не хацелася, я толькі лічыла дні, калі палячу дадому».
Паводле слоў дзяўчыны, яна запытала ў турфірмы вяртанне сродкаў за адменены ў чарговы раз рэйс, «але дагэтуль ніякіх лістоў і вяртання не дачакалася». Вярнуцца ў Беларусь яна змагла 12 сакавіка рэйсам «Аэрафлота» Мале — Масква (аэрапорт Шарамецьева). Квіток на самалёт быў куплены за грошы, сабраныя землякамі. Усяго на пражыццё і дарогу назад у дзяўчыны пайшло каля 1700 даляраў:
«У мяне застаўся асадак ад таго, як арганізатары тура паставіліся да маёй сітуацыі. Калі б яны 28 лютага не сталі пераконваць, што мы вылецім назад 5 сакавіка, то я б змагла купіць квіткі значна танней і быць дома своечасова. У выніку ляцела дадому ў два разы даражэй, і мне пакуль нават грошы за тыя квіткі не вярнулі».
Паколькі тураператар першапачаткова не падоўжыў Вользе пражыванне ў гатэлі і не даставіў яе дадому, Вольга адправіла дасудовую прэтэнзію на адрас Anex.
Цяпер чытаюць
Што азначае расследаванне Міжнароднага крымінальнага суда для Лукашэнкі і беларусаў? Тлумачыць Кацярына Дзяйкала17
Каментары