Mužčyna vyjhraŭ pracu Pikasa koštam 1 miljon jeŭra ŭ dabračynnaj łatarei, kupiŭšy łatarejny bilet za 100 jeŭra

Žychar Paryža vyjhraŭ u dabračynnaj łatarei aryhinalnuju karcinu Pabła Pikasa koštam bolš za 1 młn jeŭra, piša Bi-bi-si.

Ary Chadara, inžynier i amatar mastactva, daviedaŭsia pra svaju pieramohu ŭ aŭtorak, kali adkazaŭ na videazvanok z aŭkcyjonnaha doma Christie's u Paryžy.

«Adkul mnie viedać, što heta nie žart?» — spytaŭ 58‑hadovy mužčyna, kali jamu paviedamili, što jon staŭ novym uładalnikam pracy ispanskaha majstra 1941 hoda.

Pa słovach arhanizataraŭ, usiaho było pradadziena bolš za 120 000 biletaŭ pa canie 100 jeŭra, što dazvoliła sabrać kala 11 młn jeŭra na daśledavańni chvaroby Alchiejmiera.

Hety rozyhryš staŭ trecim pa liku ŭ dabračynnaj łatarei «Adzin Pikasa za 100 jeŭra», jakaja była zasnavana ŭ 2013 hodzie.

U hetym hodzie pieramožcu dastałasia praca «Hałava žančyny» (Tête de femme) — partret, napisany huaššu na papiery ŭ firmiennym styli Pikasa.

Na joj namalavana jaho partniorka i muza, francuzskaja mastačka-siurrealistka Dora Maar (Hienryeta Teadora Markavič).

«Ja byŭ ździŭleny, voś i ŭsio, — skazaŭ Chadara padčas telefonnaj razmovy z aŭkcyjonistami paśla rozyhryšu. — Kali robiš staŭku na takoje, nie čakaješ vyjhrać… Ale ja vielmi ščaślivy, tamu što vielmi cikavlusia žyvapisam, i dla mianie heta vydatnaja navina».

U mužčyny byŭ bilet pad numaram 94 715. Jon raskazaŭ, što kupiŭ jaho ŭ vychadnyja, vypadkova daviedaŭšysia pra konkurs.

Francuzskaja žurnalistka Pery Košen arhanizavała łatareju pry padtrymcy siamji i fondu Pikasa.

Pa jaje słovach, vydatna, što pieramožca žyvie ŭ Paryžy, niahledziačy na toje, što bilety pradavalisia ŭ dziasiatkach krain pa ŭsim śviecie.

«Nam budzie vielmi lohka dastavić karcinu, tak što my rady», — skazała jana.

Pabła Pikasa žyŭ i pracavaŭ u Paryžy bolšuju častku svajho žyćcia, a ŭ paryžskich muziejach vystaŭleny tysiačy karcin, hraviur i skulptur mastaka.

Z sabranych srodkaŭ 1 młn jeŭra pojdzie łondanskaj Opera Gallery, uładalniku karciny, a astatnija srodki buduć achviaravany Francuzskamu fondu daśledavańniaŭ chvaroby Alchiejmiera.

«Heta inicyjatyva, źviazanaja ź Pikasa, — jašče adzin cahlinka ŭ tym fundamiencie, dziakujučy jakomu adnojčy chvaroba Alchiejmiera stanie nie bolš čym niehatyŭnym uspaminam», — cytuje AFP kiraŭnika fondu Aliŭje de Ładusieta.

U 2013 hodzie pieramožcam pieršaha rozyhryšu staŭ 25‑hadovy žychar amierykanskaha štata Piensilvanija, a sabranyja srodki tady pajšli na zachavańnie livanskaha horada Cir — abjekta Suśvietnaj spadčyny JUNIESKA.

Pieramožcaj druhoha rozyhryšu ŭ 2020 hodzie stała 58‑hadovaja italjanskaja buchhałtarka, čyj syn kupiŭ bilet na Rastvo. Atrymanyja srodki byli achviaravany na prajekty pa palapšeńni sanitarnych umoŭ u škołach i vioskach Kamieruna, Madahaskara i Maroka.

• 1
• 0
• 0
• 0
• 0
• 0
• 0
• 0