Pra heta havorycca ŭ kamientaryi Ministerstva zamiežnych spraŭ Biełarusi, raspaŭsiudžanym 7 červienia.
Pavodle źviestak MZS, zaraz u handli ź Biełaruśsiu zamiežnymi dziaržavami prymianiajucca 28 abmiežavalnych mier, u tym liku dzieviać — antydempinhavych i piać — śpiecyjalnych abarončych. U pryvatnaści, Ukraina prymianiaje šeść mier, ES — čatyry, Indyja i ZŠA — pa dźvie, Małdova i Kyrhyzstan — pa adnoj.
Najbolšuju kolkaść abmiežavalnych mier — 12 — prymianiaje Rasija. Pavodle infarmacyi MZS, u Rasii stvorany niaroŭnyja kankurentnyja ŭmovy dla biełaruskich vytvorcaŭ, jakija biaruć udzieł u tenderach sistemy dziaržzakupak.
«Isnuje abmiežavańnie dostupu biełaruskich tavaraŭ da sistemy rasijskich dziaržaŭnych zakupak u vyhladzie ŭstanaŭleńnia cenavych prefierencyj u pamiery 15% tolki dla pastaŭščykoŭ rasijskich tavaraŭ. Zhadanyja prefierencyi raspaŭsiudžvajucca tolki na abmiežavany pieralik biełaruskich tavaraŭ», — padkreślivajuć u MZS.
Dziejničajuć taksama abmiežavańni na dostup biełaruskaj aŭtamabilnaj i kamunalnaj techniki, što vyrablajecca na terytoryi Rasii, da zakupki fiederalnymi orhanami vykanaŭčaj ułady i subjektami Rasijskaj Fiederacyi z vykarystańniem subsidyj.
Aprača taho, zaznačajecca ŭ paviedamleńni, isnuje zabarona na raspaŭsiudžvańnie lhotnych umoŭ kredytavańnia ŭ rasijskich bankach z subsidavańniem pracentnych stavak i nabyćcia sielhastechniki ŭ lizinh. Prymianiajucca abmiežavańni dostupu biełaruskaj aŭta‑ i sielhastechniki dla realizacyi sielskahaspadarčym tavaravytvorcam i sielskahaspadarčym spažyvieckim kaapieratyvam na ŭmovach lizinhu.
Šerah abmiežavalnych mier tyčacca i ŭzajemaadnosinaŭ u enierhietyčnaj śfiery. U pryvatnaści, padkreślivajuć u MZS, źbirańnie z 1 studzienia 2010 hoda vyvaznoj mytnaj pošliny na asobnyja katehoryi naftapraduktaŭ, što pastaŭlajucca ŭ Biełaruś z Rasii, parušaje pałažeńni mižnarodnych abaviazacielstvaŭ RF.
Abmiežavańniem taksama źjaŭlajecca pradastaŭleńnie AAT «Hazprom» vyklučnaha prava na ekspart hazu, što źjaŭlajecca mieraj nietaryfnaha rehulavańnia źniešniaha handlu, zaznačajecca ŭ kamientaryi. Pry hetym unutranaja rasijskaja cana na haz istotna nižejšaja za canu na haz u Biełarusi navat z ulikam transpartnych vydatkaŭ. «Heta stvaraje istotnyja cenavyja pieravahi dla rasijskich kampanij i tavaraŭ, jakija imi vyrablajucca, jak na ŭnutranym, tak i na biełaruskim rynku i pa sutnaści źjaŭlajecca frantalnaj subsidyjaj usioj rasijskaj ekanomicy», — havorycca ŭ paviedamleńni.
Nahadajem, u kancy maja Ministerstva ekanamičnaha raźvićcia Rasii zajaviła, što maksimalnaja kolkaść abmiežavalnych mier dla rasijskich tavaraŭ dziejničajuć u Biełarusi. Jak havorycca ŭ dakładzie Minekanamraźvićcia «Ab umovach dostupu rasijskich tavaraŭ na zamiežnyja rynki», u Biełarusi dziejničajuć 22 abmiežavalnyja miery, u krainach ES — 17, va Ukrainie — 10, u ZŠA — 9.
