Paźniak raskazaŭ, jak jaho nie puścili ŭ Viarchoŭny Saviet u 1995-m. Kaža, Mackievič tam uvohule nijakim čynam

Zianon Paźniak prakamientavaŭ artykuł «Našaj Nivy» «Try viersii adnaho pravału: jak na parłamienckich vybarach u 1995‑m sutyknulisia Paźniak i Mackievič». Tam abmiarkoŭvajecca viersija projhryšu Zianona Paźniaka na parłamienckich vybarach u 1995‑m. Zhodna ź joju, kali b nie ŭmiašańnie Uładzimira Mackieviča, jaki adciahnuŭ hałasy, Paźniak moh by pieramahčy.

Palityk nazyvaje takuju viersiju łuchtoj.

«U realnaści ŭ 1995 hodzie nichto ni z kim ni «stałkivałsia». Nieviadomy Mackievič razam z šaściu pretendentami vielmi słabieńka išoŭ na vybarach u adnoj akruzie z Paźniakom. Paźniak pieramoh u 1‑m tury i byŭ na pieršym miescy, a spadar Mackievič na čaćviortym. Ale vybary tady nie adbylisia, bo jaŭka vybarščykaŭ była nižej 50%, — raskazvaje Paźniak. — Tamu «chitroj ehoističnoj stratiehii» nieviadomaha tady Mackieviča (navat kali b jana isnavała) nichto nie zaŭvažyŭ. Dyj sam jon tut byŭ ni pry čym». 

Jak zhadvaje Paźniak, vybary ŭ Viarchoŭny Saviet tady, u traŭni 1995 hoda, nie adbylisia ŭ bolšaj pałovie vybarčych akruhoŭ Biełarusi (vybrali tolki ŭ 39% deputataŭ).

Paŭtornyja vybary pryznačyli ŭ listapadzie.

«Ja bałatavaŭsia pa Smarhonskaj akruzie i nabraŭ bolšaść hałasoŭ. Ale tady akazałasia, što i tut vybary «nie adbylisia», bo znoŭ «nie chapiła» hałasavalščykaŭ.

Tolki na hety raz maja kamanda vykryła falsifikacyju i napisała ŭ CVK. CVK vysłała kamisiju dla pravierki, jakuju ŭznačaliŭ namieśnik staršyni CVK Aleś Žuk (viadomy piśmieńnik). Kamisija sp. Žuka vykryła padłoh z boku Smarhonskaj akruhovaj vybarčaj kamisii, jakaja śviedama nie ŭličyła 500 hałasoŭ vybarščykaŭ vajskovaj čaści».

Paźniak piša, što hetaha jakraz chapiła b dla jaŭki i dla pryznańnia jaho pieramohi.

«Dalej fars praciahvaŭsia ŭžo ŭ CVK. Staršynia CVK viadomy juryst Abramovič (paźniej jon padrabiŭ Kanstytucyju pad Łukašenku) nie staŭ prymać nieabchodnaha rašeńnia i admoviŭsia źviartacca ŭ Prakuraturu, pierakłaŭ heta na mianie. Ja źviarnuŭsia i, zrazumieła, nie atrymaŭ navat adkazu (sistema pracavała)», — raskazvaje palityk.

Pavodle jaho słoŭ, tady ad BNF taksama pieramahli try viadomyja frontaŭcy: Jury Bieleńki, Vialancin Hołubieŭ i Hienadź Hrušavy.

«I tady režym pajšoŭ na adčajny krok: spadaroŭ Bieleńkaha i Hołubieva prosta tupa vykinuli sa śpisaŭ vybranych. Pakinuli adnaho Hrušavoha. Taki ŭžo nastaŭ čas», — piša Paźniak. 

Jon miarkuje, što kali b jany ŭčatyroch zastalisia ŭ parłamiencie, «łukašystam nie ŭdałosia b uhrobić impičmient u 1996 hodzie, a maskoŭski adčajny desant pa ŭratavańni Łukašenki na čale z Čarnamyrdzinym palacieŭ by nazad u Maskvu «nie sołono chlebavšy».

«My viedali, jak i što treba rabić. I zrabili b. Front jašče byŭ u sile. Ludzi nas słuchali b, a nie Šareckaha i ŭsich tych pierapałochanych», — śćviardžaje jon. 

«Fatalnaja ŭźnikła karcina, treba skazać. Nu, a spadar Mackievič tut uvohule nijakim čynam. Jaho paśla 1‑ha tura ŭ traŭni, dzie jon zaniaŭ 4‑ie miesca, tady navat u infarmacyi nie isnavała», — piša Paźniak.

• 23
• 0
• 3
• 3
• 0
• 0
• 0
• 0