Na suśvietnym rynku małočnaj pradukcyi adbyłosia samaje rezkaje padzieńnie cen za apošnija dva hady. Pa vynikach čarhovych tarhoŭ Global Dairy Trade (GDT) indeks źniziŭsia na 4,9%. Adnak jość i vyklučeńni.
Na mižnarodnaj płatformie Global Dairy Trade (GDT), jakaja ličycca hałoŭnym aryjenciram dla suśvietnaha małočnaha rynku, siaredni indeks cen źniziŭsia na 4,9%. Heta stała samym rezkim adnarazovym padzieńniem za apošnija dva hady. Pry hetym aktyŭnaść kupcoŭ nie źmienšyłasia: abjom tarhoŭ vyras na 2,4% i skłaŭ 26,3 tysiačy ton pradukcyi, a siaredniaŭzvažanaja cana ŭsich pradadzienych kantraktaŭ apuściłasia da 3793 dołaraŭ za tonu.
U minusie apynulisia amal usie asnoŭnyja vidy małočnaj pradukcyi. Jak paviedamlaje MilkNews, najbolš patańnieła suchoje abiastłuščanaje małako — jaho siaredniaja cana źniziłasia na 7%. Asabliva mocna patańnieli kantrakty z pastaŭkaj u listapadzie — na 10,6%. Ale hety pradukt usio jašče kaštuje daražej, čym hod tamu: u paraŭnańni z pačatkam lipienia 2025 hoda jaho cana vyšejšaja na 15,3%.
Suchoje celnaje małako, hałoŭny tavar tarhoŭ GDT, patańnieła na 4,4%. U hadavym vymiareńni źnižeńnie skłała 11,2%. Ceny źnizilisia dla ŭsich terminaŭ pastavak, najbolš — dla kastryčnickich kantraktaŭ.
U siarednim na 5% patańnieła i masła. U paraŭnańni ź minułym hodam jaho košt nižejšy amal na treć (-29,1%).
Abiazvodžany małočny tłušč taksama straciŭ u košcie — 3,9%, a syr straciŭ 12,3% i ciapier kaštuje na 19,8% mienš, čym hod tamu.
Na ahulnym fonie byli i vyklučeńni. Vyraśli ceny na macarełu (+3,8%), suchija źniatłuščanyja viarški (+8,2%) i łaktozu (+3,6%).
Razam z tym sam indeks GDT ciapier prykładna na 10% nižejšy za ŭzrovień anałahičnaha pieryjadu minułaha hoda. Analityki źviazvajuć źnižeńnie cen z rostam vytvorčaści małaka ŭ asnoŭnych krainach-eksparciorkach na fonie adnosna słaboha popytu.
Ź siaredziny sakavika indeks GDT užo straciŭ kala 12%, pryčym šeść z vaśmi apošnich tarhoŭ zaviaršylisia źnižeńniem cen. Kali takaja tendencyja zachavajecca, heta moža paŭpłyvać na prahnozy zakupnych cen na małako dla fiermieraŭ u siezonie 2027 hoda.
Razam z tym ekśpierty adznačajuć, što ciapierašni cisk na ceny moža być časovym. Śpiakota ŭ Jeŭropie i raźvićcio źjavy El-Nińjo ŭ Cichim akijanie mohuć pryvieści da skaračeńnia vytvorčaści małaka ŭ šerahu rehijonaŭ i tym samym asłabić lišak prapanovy na suśvietnym rynku.
Na siońnia ŭ «Jedastaŭcy» masła «Stary Miensk» pradajuć pa 16,25 rubloŭ u pieraliku za kiłahram. Kiefir u butelcy ci tetrapaku, tłustaściu 2,5%, pradajecca ad 2,50 rubla za litr.
Ciapier čytajuć
26‑hadovaha supracoŭnika elitnaha padraździaleńnia mytni asudzili na 16 hadoŭ pa nabory palitartykułaŭ. Siarod ich i «zdrada dziaržavie»4
Kamientary
ale dažyć da hetych časoŭ nie daviadziecca ni mnie, ni tabie, nikamu.. mu)