Kiraŭnik MZS: Hiermanija choča pakłaści kaniec vajnie va Ukrainie i paspryjać viartańniu ŭkrainskich mužčyn na radzimu

Havoračy pra svaju pazicyju adnosna Rasii, Vadeful padkreśliŭ, što dla palapšeńnia adnosinaŭ Kreml pavinien prademanstravać imknieńnie da spynieńnia vajny:

«Hiermanija choča pakłaści kaniec hetamu kanfliktu i damahčysia taho, kab situacyja ŭ Jeŭropie ŭ cełym znoŭ supakoiłasia. Ale heta mahčyma tolki tady, kali budzie spynienaja takaja ahresija, jak hetaja vajna va Ukrainie, dla jakoj nie było nivodnaj pryčyny. […] Kali jon [Pucin] sapraŭdy hatovy havaryć pra spynieńnie hetaj vajny, tady, biezumoŭna, buduć hatovyja havaryć ź im pra heta».

Vadeful spadziajecca, što ciapierašnija pieramovy Ukrainy i Rasii nakont transpartavańnia zbožža ŭ Čornym mory buduć raspaŭsiudžvacca i na enierhietyčnuju infrastrukturu. Heta było b «mahčyma, pieršym maleńkim krokam da taho, kab hety kanflikt nabliziŭsia da kanca», — skazaŭ ministr.

Taksama Johan Vadeful abvinavaciŭ ministra zamiežnych spraŭ Rasii Siarhieja Łaŭrova ŭ chłuśni.

Rasijski ministr zamiežnych spraŭ zajaŭlaje, što reakcyja Hiermanii na sprobu dyviersii ŭ aeraporcie Lejpcyhu — heta «pačatak sapraŭdnaj vajny», i admaŭlaje dačynieńnie Rasii da hetaha napadu. Vadeful skazaŭ:

«My dakładna viedajem, i Siarhiej Łaŭroŭ, viadoma, taksama viedaje, što Rasija ŭčyniła heta ŭ Lejpcyhu — i što my na heta adreahavali, musili adreahavać. Jon heta viedaje, heta vidavočna kožnamu».

Rytaryčnuju eskałacyju Łaŭrova Vadeful nazvaŭ «vyjaŭleńniem peŭnaha rasijskaha adčaju». Rasija «ŭ hetaj vajnie daloka nie takaja paśpiachovaja, jak chacieła b», tamu što «vajna pavinna była skončycca za niekalki dzion, a idzie ŭžo piaty hod».

Vadeful taksama zajaviŭ, što choča bolšaj padtrymki z boku prezidenta Ukrainy Uładzimira Zialenskaha.

«Ciapier my źjaŭlajemsia najbujniejšym prychilnikam Ukrainy, kali havorka idzie pra finansavuju i vajennuju padtrymku. I, naturalna, niamieckaja abaronnaja pramysłovaść pavinna atrymlivać ad hetaha vyhadu. Ja skazaŭ heta i prezidentu Ukrainy Zialenskamu padčas svajho apošniaha vizitu. My z vami, my vas padtrymlivajem. Ale ja taksama pavinien tłumačyć heta niamieckim padatkapłacielščykam, i samaje mienšaje, što vy možacie zrabić, — heta pry ŭsich zakupkach taksama pryciahvać niamieckuju abaronnuju pramysłovaść. Na dadzieny momant my nie całkam zadavolenyja tym, kolki zamovaŭ raźmiaščajecca ŭ Hiermanii. Tamu ciapier my paprasili ŭkrainski ŭrad pravieryć heta i pakłapacicca pra toje, kab situacyja palepšyłasia».

Vadeful taksama zhodny ź niamieckimi palitykami, jakija patrabujuć viartańnia ŭkrainskich mužčyn pryzyŭnoha ŭzrostu va Ukrainu. Pry hetym niamiecki ŭrad moh by dapamahčy ŭ hetym Kijevu, pieradaŭšy danyja pra ŭkrainskich hramadzian u Hiermanii.

«My ž viedajem, chto tut žyvie. Naprykład, chto atrymlivaje sacyjalnyja vypłaty, chto tut zarehistravany, u kaho jość status znachodžańnia. [Ukrainski ŭrad moža] napisać hetym mužčynam, što jany pavinny być pryzvanyja».

Pry hetym, jak ličyć Vadeful, viartańnie pavinna adbyvacca «biez prymusu».

Ministr taksama zajaviŭ, što adchilaje idei skaračeńnia padtrymki Ukrainy i pierahladu vajennych vydatkaŭ, jakija hučać z šerahaŭ SDPH i AdH. «Pieravažnaja bolšaść nasielnictva Hiermanii padtrymlivaje našu palityku adnosna Ukrainy», — zajaviŭ Vadeful.

• 2
• 1
• 3
• 0
• 0
• 0
• 0
• 0