Prafiesijnyja spartsmieny padsieli na višni i višniovyja napoi. Što heta daje?

Jašče niekalki hadoŭ tamu višniovy sok byŭ pieravažna zachapleńniem prafiesijnych viełahonščykaŭ. Ciapier trend dajšoŭ i da futboła. Pavodle The Athletic, sok ź višni vykarystoŭvaje pieravažnaja bolšaść kłubaŭ najvyšejšaha ŭzroŭniu. Adzin z vytvorcaŭ śćviardžaje, što «Čełsi», «Mančester Sici» i «Mančester Junajted» robiać heta ŭžo niekalki hadoŭ. Im usio bolš cikaviacca futbolnyja kłuby Ispanii i Niderłandaŭ.

Višniovy sok paśpieŭ pryžycca i ŭ inšych vidach sportu. Jaho vykarystoŭvali, naprykład, brytanskija alimpijcy i zbornaja Novaj Ziełandyi pa rehbi.

Ale što takoha asablivaha spartsmieny znajšli ŭ višni? Jak piša The Athletic, karjera višniovaha soku ŭ vialikim sporcie pačałasia z daśledavańnia, praviedzienaha ŭ Vialikabrytanii bolš za 15 hadoŭ tamu.

Pavialičyć

Što navukoŭcy znajšli ŭ višni

Paśla intensiŭnych fizičnych nahruzak u myšcach uźnikajuć mikrapaškodžańni i akiślalny stres. Z adnaho boku, jany zapuskajuć pracesy, dziakujučy jakim arhanizm adaptujecca da nahruzak i pavyšaje vynoślivaść. Z druhoha — vyklikajuć bol u ciahlicach i patrabujuć času na adnaŭleńnie.

Dla zvyčajnaha čałavieka chutkaść takoha adnaŭleńnia naŭrad ci maje vialikaje značeńnie. Dla prafiesijnaha spartsmiena, jakomu nieŭzabavie znoŭ treba vystupać na maksimumie mahčymaściaŭ, heta ŭžo moža być važna.

U 2010 hodzie navukoŭcy Nartumbryjskaha ŭniviersiteta daśledavali kisłyja višni hatunku Manmaransi. U ich utrymlivajecca šmat polifienołaŭ, asabliva antacyjanaŭ, jakija majuć antyaksidantnyja ŭłaścivaści.

Navukoŭcy praviali ekśpierymient z 20 marafoncami. Pałovie davali višniovy sok, druhoj pałovie — płaceba. Daśledčyki vyjavili istotnuju roźnicu ŭ adnaŭleńni pamiž dźviuma hrupami. Paźniej vyniki hetaha ekśpierymientu padmacavali daśledavańni ŭ inšych vidach sportu. Tak višniovy sok pačaŭ pieratvaracca ŭ spartyŭnuju dabaŭku.

Jość u višni i jašče adna ŭłaścivaść, jakaja zacikaviła spartsmienaŭ. Ciomnyja višni naturalnym čynam źmiaščajuć miełatanin, jaki ŭdzielničaje ŭ rehulavańni snu. Vytvorcy śćviardžajuć, što charčovyja dabaŭki na asnovie višni mohuć dapamahać chutčej zasnuć i palapšać jakaść snu.

Dla futbalistaŭ heta moža być asabliva aktualna, bo matčy časta zakančvajucca pozna ŭviečary.

Pavialičyć

Čamu jaho nie pjuć pastajanna

Adnak višniovy sok nie taja dabaŭka, jakuju spartsmienam varta ŭžyvać štodnia.

Akiślalny stres, na źmianšeńnie jakoha nakiravana dziejańnie višniovych praduktaŭ, adnačasova adyhryvaje važnuju rolu ŭ adaptacyi arhanizma da fizičnych nahruzak. Jon daje arhanizmu sihnał pierabudoŭvacca, u tym liku pavialičvać kolkaść mitachondryj u kletkach, što spryjaje rostu vynoślivaści.

Tamu višniovy sok vykarystoŭvajuć stratehična. Padčas trenirovačnaha pieryjadu, kali važna, kab arhanizm adaptavaŭsia da nahruzak, patreba ŭ im mienšaja. A voś padčas spabornictvaŭ na pieršy płan vychodzić zadača jak maha chutčej adnavicca.

Dla futbalistaŭ heta asabliva aktualna ŭ razhar siezona, kali kamanda moža pravodzić niekalki matčaŭ na tydzień, a hulcy paralelna vystupajuć za nacyjanalnyja zbornyja.

Mienavita tamu višniovyja pradukty, jakija daŭno stali zvykłymi ŭ prafiesijnym viełasporcie, ciapier usio šyrej vykarystoŭvajucca i ŭ futbole.

Ad soku da cukierak

Ale tut vyjaviłasia inšaja prablema. Toje, što dobra pasuje viełahonščykam, nie zaŭsiody zručna futbalistam.

Jak tłumačać śpiecyjalisty, paśla doŭhaha etapu viełahonščyku treba adnavić stračanuju vadkaść. Tamu dadatkovaja butelka napoju jamu tolki darečy.

U futbole situacyja inšaja. Kali hulca zamianiajuć paśla 60 ci 70 chvilin, jamu nie patrebnyja paŭlitra adnaŭlenčaha kaktejlu, a śledam jašče paŭlitra višniovaha soku. Da taho ž futbalisty skardzilisia vytvorcam, što paśla poźnich matčaŭ praź vialikuju kolkaść vypitaj vadkaści im davodzicca ŭvieś viečar chadzić u prybiralniu.

U vyniku vytvorcy prydumali inšuju formu — višniovyja žavalnyja cukierki. U ich tyja ž kampanienty, što i ŭ soku, ale bieź lišniaj vadkaści.

Jość u cukierak i jašče adna pieravaha: ich praściej brać z saboj u pajezdki i pieraloty, čym butelki z sokam. Tak što kali futbalist na łaŭcy zapasnych niešta žuje, heta nie abaviazkova zvyčajnaja cukierka. Mahčyma, heta jašče adzin etap niečakanaj karjery višni ŭ vialikim sporcie.

• 11
• 0
• 2
• 0
• 2
• 0
• 0
• 0