Nazvany najlepšy horad dla viełasipiedystaŭ. I heta nie Kapienhahien

U miežach štohadovaha apytańnia pra harady daśledčyki zapytali bolš za 24 tysiačy žycharoŭ roznych miehapolisaŭ, nakolki lohka pieramiaščacca na rovary ŭ ich horadzie. U rejtynh uvajšli 20 haradoŭ, dzie najbolšaja dola apytanych acaniła mahčymaści dla pieramiaščeńnia na rovary jak «dobryja» abo «vydatnyja». Kab rejtynh pakazvaŭ najlepšyja viełasipiednyja harady śvietu, u jaho ŭklučyli tolki adzin horad z najvyšejšym vynikam ad kožnaj krainy, piša TimeOut.

Na pieršym miescy — Kiembrydž (Vialikabrytanija)

Kab horad sapraŭdy byŭ zručnym dla ravarystaŭ, pavinny adnačasova supaści niekalki čyńnikaŭ. Kiembrydž — pryhožy ŭniviersitecki horad u Anhlii — adpaviadaje praktyčna ŭsim hetym kryteryjam. Horad raźmieščany na raŭninnaj miascovaści, a davoli suchi klimat aznačaje, što ravarystam nie daviadziecca pieraadolvać šmatlikija krutyja padjomy abo časta pryjazdžać da miesca pryznačeńnia pramokłymi da nitki.

Adnak pieravahi Kiembrydža nie abmiažoŭvajucca pryrodnymi ŭmovami. Jaho kampaktnyja pamiery i pradumanaja płaniroŭka, u tym liku šmatuzroŭnievaja viełaparkoŭka kala čyhunačnaha vakzała i śpiecyjalnyja «viełasipiednyja vulicy», zrabili rovar adnym z hałoŭnych sposabaŭ pieramiaščeńnia. Kala traciny ŭsich pajezdak u horadzie ździajśniajuć na rovarach. Nie dziŭna, što bolš za 83% apytanych miascovych žycharoŭ stanoŭča acanili ŭmovy dla ravarystaŭ.

Na druhim miescy — Manreal (Kanada)

Chałodnyja zimy hetaha horada i jaho reljef nielha nazvać całkam raŭninnymi. Adnak 82,5% miascovych žycharoŭ stanoŭča acanili mahčymaści dla ravarystaŭ, što dazvoliła Manrealu stać samym zručnym dla rovaraŭ horadam Paŭnočnaj Amieryki.

Adnoj z pryčyn źjaŭlajecca papularnaść haradskoj sistemy prakatu rovaraŭ BIXI. U 2023 hodzie joju skarystalisia 25% žycharoŭ Manreala.

Akramia taho, horad realizuje ambicyjny infrastrukturny prajekt — Express Bike Network, abo EBN. Havorka idzie pra sietku abaronienych viełasipiednych darožak, jakija zimoj čyściać ad śniehu. Paśla zaviaršeńnia prajekta jaje praciahłaść składzie 171 km. Heta dadasca da ŭžo najaŭnych u horadzie 1083 km viełasipiednych maršrutaŭ.

3. Kapienhahien, Danija

Pavodle źviestak Visit Copenhagen, žychary dackaj stalicy štodnia pieraadolvajuć na rovarach nievierahodnyja 1,44 młn km.

Taki pakazčyk staŭ mahčymym dziakujučy dziesiacihodździam pradumanaha haradskoha płanavańnia. Havorka idzie pra vielizarnuju sietku śpiecyjalnych viełasipiednych darožak i maršrutaŭ, adździelenych ad aŭtamabilnych daroh, ale važnuju rolu adyhryvajuć i pradumanyja miery źnižeńnia chutkaści ruchu.

Tak, u horadzie jość znaki, jakija abmiažoŭvajuć chutkaść da 20 km/h. Nie mienš efiektyŭna pracujuć teksturavanaje darožnaje pakryćcio i zvužanyja pałosy ruchu. Jany prymušajuć kiroŭcaŭ być bolš aściarožnymi i faktyčna spryjajuć źnižeńniu chutkaści.

Dalej iduć Šanchaj, Viena, Varšava, Marakieš, Tajbej, Stakholm, Sievilja, Sieuł, Miedeljin, Raterdam — 69,3, Chielsinki, Abu-Dabi, Arłanda, Frankfurt, Luksiemburh, Lublana, Brazilia.

• 2
• 0
• 1
• 2
• 0
• 0
• 0
• 0