Były kiraŭnik Słužby biaśpieki Łukašenki pradaŭ katedž u Drazdach za $1,2 miljona
Andrej Uciuryn prasiadzieŭ u kałonii piać hadoŭ, pakul jaho nie pamiłavaŭ były bos.
Adzin z darahich katedžaŭ u Drazdach sprabavali pradać bolš za try hady. Jak minimum da 2021 hoda im vałodaŭ Andrej Uciuryn — eks-kiraŭnik Słužby biaśpieki Alaksandra Łukašenki. Heta dom płoščaj 590 kvadratnych mietraŭ, u jakim na toj momant jašče nie było ŭnutranaha azdableńnia. U rozny čas žyllo kaštavała ad 1,3 da 1,4 młn dalaraŭ, piša «Lusterka».
Katedž pradali letam 2025 hoda. Vierahodna, mienavita jon akazaŭsia samym darahim domam, jaki realizavali ŭ žniŭni taho hoda, — havorka idzie pra $1,2 miljona. Hetaja nieruchomaść raźmiaščajecca na toj ža vulicy, što i dom Uciuryna, i ich płošča supadaje.
Andrej Uciuryn uznačalvaŭ Słužbu biaśpieki Alaksandra Łukašenki z 2007 hoda. Na hetaj pasadzie jon pravioŭ siem hadoŭ, a ŭ vieraśni 2014‑ha jaho pieraviali na pasadu namieśnika dziaržaŭnaha sakratara Rady biaśpieki.
A viasnoj 2019 hoda jaho zatrymali ŭ momant atrymańnia chabaru ad rasijskaha biznesmiena. U 2020‑m jaho pryznali vinavatym u atrymańni chabaraŭ na ahulnuju sumu 192 tysiačy dalaraŭ. Paviedamlałasia, što takija hrošy jamu płacili za łabiravańnie intaresaŭ pry pastaŭcy telekamunikacyjnaha abstalavańnia dla Departamienta vykananania pakarańniaŭ, u pryvatnaści, dla turmy №8 u Žodzinie.
Andreju Uciurynu prysudzili 12 hadoŭ pazbaŭleńnia voli ŭ kałonii ŭzmocnienaha režymu. Adnak užo ŭ 2024‑m Łukašenka pamiłavaŭ svajho byłoha padnačalenaha.
Toj samy masažyst raskazaŭ, navošta zdymaŭ hołych klijentak2
Kamientary