«Byŭ u pryhniečanym stanie». Što viadoma pra 41‑hadovaha mužčynu, jakoha šukajuć užo piaty dzień
U Minsku i vakolicach šukajuć 41‑hadovaha Alaksandra Narkieviča. Aryjenciroŭki raźmiaścili PVA «Anhieł» i PVA «Siryus». Mužčyna pierastaŭ vychodzić na suviaź udzień 29 vieraśnia — z taho času pra jaho miescaznachodžańnie ničoha nie viadoma.
«Jon nikoli tak prosta nie źnikaŭ»
Vydańnie «Anłajnier» pahutaryła z žonkaj Alaksandra, jakaja apošni raz bačyła jaho doma ŭ aŭtorak kala dziasiataj ranicy. Kaciaryna ŭzhadvaje, što ŭ toj dzień mužčyna byŭ «emacyjna nakručany»: vierahodnaja pryčyna — u dziŭnych bolach, na jakija minčanin skardziŭsia apošnija niekalki tydniaŭ.
«Nie vielmi zrazumieła, byli heta fizičnyja boli ci štości psichasamatyčnaje… Kazaŭ, što balać to kaleni, to śpina, to pravy bok. Za apošnija dva tydni try razy vyklikali chutkuju. Jaho zabirali, potym adpraŭlali [dadomu]… Ničoha takoha nie znachodzili. Ale jon usio roŭna pastajanna skardziŭsia na boli, upadaŭ u paniku. Pry hetym MRT, analizy byli ŭ normie. Heta jašče ŭletku pačałosia, a prosta da žachu depresiŭny stan u jaho staŭ u apošnija dva tydni».
Pierad źniknieńniem Alaksandr taksama vyklikaŭ chutkuju — heta było ŭ rajonie šostaj ranicy. Z Balnicy chutkaj miedycynskaj dapamohi mužčynu znoŭ adpravili domu biez dyjahnazu ŭžo da dziaviataj. Jon paśniedaŭ i źjechaŭ na pracu.
Apošni raz Kaciaryna sazvaniłasia z mužam u aŭtorak u 14:05 — Alaksandr, pa jaje słovach, byŭ u pryhniečanym emacyjnym stanie, ale paabiacaŭ zabrać syna sa škoły i pahadziŭsia spłanavać siamiejny adpačynak u vychadnyja.
A 15‑j hadzinie, jak i paznačana ŭ aryjenciroŭcy «Anhieła», telefon minčuka byŭ užo niedastupny.
«Ja adrazu nie spałochałasia, bo jon pracuje ŭ kramach handlovym pradstaŭnikom i časta spuskajecca ŭ padvalnyja pamiaškańni, dzie niama suviazi. Praciahvaju pracavać, paralelna telefanavać, pisać u Viber — adkazu niama. Razumiejučy, što jon pavinien być u hety čas u škole ŭ dziciaci, pajechała tudy, ale mašyny nie ŭbačyła. Dzicia jon nie zabraŭ. Choć dla nas heta niedapuščalna, jon nikoli voś tak prosta nie źnikaŭ. Mianie heta, viadoma, naściarožyła, uličvajučy jahony stan».
U vioscy pad Smalavičami znajšli aŭto: što jašče viadoma pra chod pošukaŭ
Kali pošukami Alaksandra zaniałasia milicyja, udałosia ŭstanavić łakacyju, dzie apošni raz byŭ uklučany jaho telefon, — Smalavicki rajon, vioska Kalniki.
Ranicaj 30 vieraśnia niepadalok ad jaje znajšłasia i mašyna siamji. Aŭto było začynienaje, u sałonie nie było telefona, pracoŭnaha płanšeta, klučoŭ ad dźviuch kvater i kašalka, jakija byli z saboj u mužčyny. Pry hetym Kaciaryna ŭzhadvaje, što pry sabie u muža nie było ni zaplečnika, ni čahości jašče, kudy jon moh by skłaści hetyja rečy.
Zaraz u hetaj miascovaści viaducca aktyŭnyja pošuki, u tym liku z prymianieńniem śpiectechniki — dronaŭ i ŭsiudychodaŭ. Najbližejšyja vadajomy pračesvajuć vadałazy. Pašukaviki kaardynujuć łancužki vałancioraŭ.
Kaciaryna miarkuje, što muž spakojna moh dastatkova daloka adyści ad punkta, dzie pryparkavaŭ mašynu: apošnim časam Alaksandr padoŭhu špacyravaŭ pieššu ŭ parku kala doma, kab pryhłušyć niehatyŭnyja dumki.
Kali vam štości viadoma pra miescaznachodžańnie Alaksandra Narkieviča, paviedamicie pa telefonach PVA «Anhieł»: 7733 (haračaja linija), +375 33 666-60-33, +375 29 270- 77‑33 — abo ŭ milicyju pa telefonie 102.
Ciapier čytajuć
Dzie pracujuć i jak vyhladajuć žonki top-čynoŭnikaŭ?10
Kamientary