Ź italjanskaj vinarobni ŭvadnačas skrali elitnaha vina na 5 miljonaŭ dalaraŭ. Heta biesprecedentny maštab

Kampanija, štab-kvatera jakoj znachodzicca ŭ Fłarencyi, viadzie svaju historyju z 1385 hoda. U minułyja vychadnyja złačyncy ŭleźli na skład u horadzie Kartona. U hety čas vinarobnia rychtavałasia adpravić zamiežnym klijentam vialikuju partyju niekatorych svaich samych darahich vinaŭ.

Rabaŭniki adklučyli sihnalizacyju i vyvieli sa stroju kamiery videanazirańnia ŭnutry składa i pa jaho pierymietry. Zatym jany zajechali na terytoryju na dvuch vialikahruznych aŭtamabilach i skarystalisia pahruzčykami, jakija naležali kampanii, kab zahruzić skrynki z butelkami. Pra źniknieńnie vina supracoŭniki daviedalisia ŭ paniadziełak ranicaj, kali pryjšli na pracu.

Miarkujecca, što ŭ złačynstvie ŭdzielničali nie mienš za siem mužčyn u maskach.

Hienieralny dyrektar Marchesi Antinori Renca Katareła zajaviŭ, što Italija jašče nie viedała kradziažu takoha maštabu i koštu. Jon spadziajecca, što pravaachoŭniki zmohuć adšukać skradzienaje vino.

«Dva hruzaviki, poŭnyja tavaru, nie mohuć prosta biasśledna źniknuć. Na darohach Taskany paŭsiul ustanoŭlenyja kamiery. Mahčyma, kali nam krychu pašancuje, my zdolejem viarnuć chacia b častku skradzienych butelek», — skazaŭ Katareła.

Košt adnoj butelki skradzienaha vina składaŭ ad 150 da 500 jeŭra. U kampanii ličać, što vybar takoj darahoj pradukcyi śviedčyć pra dobruju daśviedčanaść złačyncaŭ u vinach i najaŭnaść u ich unutranaj infarmacyi.

Katareła adznačyŭ, što kampanija maje namier abaraniać svoj rynak i ŭžo papiaredziła patencyjnych pakupnikoŭ: butelki, jakija prapanujuć ź niezvyčajnych krynic pa padazrona nizkich cenach, mohuć być skradzienymi. Kiraŭnik kampanii sumniavajecca, što złačyncy zmohuć pradać takuju kolkaść darahoha vina pa ŭsim śviecie, nie pryciahnuŭšy ŭvahi.

Marchesi Antinori ekspartuje svaju pradukcyju ŭ 170 krain. Letaś vyručka kampanii skłała 263 miljony jeŭra.

Kradziažy vina ŭ Italii zdarajucca niaredka, ale, pavodle palicyi, apošnim časam źmianiŭsia charaktar takich złačynstvaŭ. Raniej złamyśniki čaściej rabavali restarany, adznačanyja zorkami Mišlen i viadomyja svaimi bahatymi vinnymi sklepami. Adtul jany vynosili niekalki asabliva kaštoŭnych butelek, kožnaja ź jakich mahła kaštavać dziasiatki tysiač jeŭra.

Naprykład, letam dvoje mužčyn, pieraapranutych u rabočych i apranutych u achoŭnyja kaski sa śviatłoadbivalnymi kamizelkami, prarabili adtuliny va ŭdaratryvałym škle znakamitaha miłanskaha restarana Affinatore. Jany skrali niekalki butelek elitnaha vina Romanée-Conti ahulnym koštam 280 tysiač jeŭra.

Časam vino kraduć i z hruzavikoŭ padčas pieravozki. Adnak u apošnija miesiacy prafiesijnyja złodziei ŭsio čaściej nacelvajucca na sami vinarobni, adkul za niekalki hadzin vyvoziać tysiačy butelek sa składoŭ z rehulavanaj tempieraturaj.

Sioleta ŭletku histaryčnaja vinarobnia Banfi di Montalcino paviedamiła pra kradziež troch tysiač butelek svaich najlepšych vinaŭ Alta Langa sa składa ŭ Pjemoncie. Pradstaŭniki kampanii adznačyli, što złačyncy staranna adbirali butelki i dobra viedali, što mienavita treba zabrać.

U minułym miesiacy čaćviora złamyśnikaŭ mienš čym za try hadziny skrali try tysiačy butelek papularnaha vina Barolo ź vinarobni Conterno Fantino, taksama raźmieščanaj u Pjemoncie. Dla pahruzki jany vykarystali składski pahruzčyk.

Rabavańnie Marchesi Antinori, pavodle papiarednich acenak, stała najbujniejšym nie tolki ŭ Italii, ale i va ŭsim śviecie — jak pavodle kolkaści skradzienych butelek, tak i pavodle ich ahulnaha koštu.

«Supracoŭniki vinarobni płakali. Sprava nie tolki ŭ košcie vina. Heta niešta bolšaje. My možam pieražyć stratu hetaha vina, ale mianie žudasna zasmučaje sam fakt taho, što padobnaje mahło adbycca z nami», — havoryć Katareła.

• 0
• 0
• 2
• 0
• 0
• 0
• 1
• 0