Vital Rymašeŭski z prychilnikami ŭžo praviali schod svajho kryła BCHD
Pakul palityk Pavieł Sieviaryniec rychtuje abjadnaŭčy źjezd Biełaruskaj chryścijanskaj demakratyi ŭ Biełastoku ŭ hetu subotu, inšaje kryło arhanizacyi ŭžo praviało ŭłasny schod u Varšavie i abrała čatyroch sustaršyniaŭ, piša «Biełsat».
17—18 kastryčnika ŭ Varšavie prajšła spravazdačna-vybarnaja kanfierencyja hramadska-palityčnaha ruchu «Biełaruskaja salidarnaść/Biełaruskija chryścijanskija demakraty». Pavodle Vitala Rymašeŭskaha, u im uziali ŭdzieł bolš za 80 čałaviek, u tym liku pradstaŭniki moładzievaj i žanočaj arhanizacyjaŭ. Sustaršyniami abrali Volhu Alejnik, Dzianisa Sadoŭskaha, Ksieniju Pałuektavu i Vitala Rymašeŭskaha. U Radu arhanizacyi ŭvajšli 17 asobaŭ.
Jak patłumačyŭ «Biełsatu» Rymašeŭski, jahonaja kamanda płanuje pieratvaryć chryścijanska-demakratyčny ruch u šyrokuju hramadska-palityčnuju arhanizacyju, jakaja budzie pracavać nie tolki z byłymi partyjcami, ale i z novymi aktyvistami.
Siarod pryjarytetaŭ na 2027—2028 hady — padtrymka biełarusaŭ unutry krainy i ŭ emihracyi, abarona ichnych pravoŭ, zachavańnie suviaziaŭ ź ES i supraćdziejańnie rasiejskaj hibrydnaj ahresii.
Čamu chryścijanskija demakraty nie mohuć damovicca?
Vital Rymašeŭski tłumačyć padzieł pryncypova roznym razumieńniem chryścijanskaj demakratyi. Svajo kryło jon nazyvaje bolš prahresiŭnym, a hrupu Sieviarynca i Dźmitruka — relihijna-kansiervatyŭnaj.
Adno z hałoŭnych razychodžańniaŭ datyčyć roli relihii ŭ palitycy.
«My nie ličym, što chryścijanizacyja biełarusaŭ, biełarusizacyja chryścijan — heta zadača palityčnaj partyi ci hramadska-palityčnaha ruchu. Heta zadača carkvy», — zajaviŭ Rymašeŭski.
Pavodle jaho, chryścijanskaja demakratyja musić zastavacca nierelihijnym rucham, adkrytym dla ludziej niezaležna ad ichnaha vieravyznańnia.
Jašče adnym kamieniem spatyknieńnia stała hiendarnaja roŭnaść. Za apošnija čatyry hady kamanda Rymašeŭskaha raspracavała asobnuju płatformu, pryśviečanuju pravam žančyn. Rymašeŭski nie vyklučaje, što ŭ vyniku dźvie płyni buduć mieć asobnyja prahramnyja płatformy, ale zmohuć supracoŭničać u supolnych hramadskich kampanijach.
Pahadnieńnie mohuć padpisać jašče da źjezdu Sieviarynca
Niahledziačy na supiarečnaści, Rymašeŭski zapeŭnivaje, što jahonaja kamanda nie razhladaje paplečnikaŭ Sieviarynca jak kankurentaŭ. Pavodle palityka, baki ŭžo kala dvuch miesiacaŭ viaduć intensiŭnyja pieramovy, i apošnim časam dyjałoh staŭ bolš kanstruktyŭnym.
«Z našaha boku nijakich kanfliktnych rečaŭ niama. My zaraz viadziem pieramovy pra toje, kab pieršasnaje pahadnieńnie ab supracy było padpisanaje, moža być, jašče da schodu 24-ha, jaki adbudziecca ŭ Paŭła Sieviarynca i Hieorhija Dźmitruka», — skazaŭ jon.
Naleta Rymašeŭski spadziajecca pravieści supolnuju kanfierencyju i farmalizavać supracoŭnictva dvuch kryłaŭ. Pry hetym jany mohuć zachavać arhanizacyjnuju samastojnaść. U jakaści prykładu palityk pryvodzić niamieckija Chryścijanska-demakratyčny i Chryścijanska-sacyjalny sajuzy (CHDS/CHSS), jakija dziejničajuć jak palityčnyja partniory.
Na pytańnie, ci budzie jon udzielničać u źjeździe 24 kastryčnika, Rymašeŭski adkazaŭ, što jahonaja kamanda jak minimum nakiruje vitańni. Nie vyklučanaja i asabistaja prysutnaść jaje pradstaŭnikoŭ.
Rymašeŭski adchilaje mierkavańnie, što dva asobnyja schody mohuć śviedčyć pra baraćbu za lidarstva ŭ BCHD.
«Pra jakuju palityčnuju baraćbu siońnia moža iści havorka, kali ŭsie hramadska-palityčnyja lidary biełaruskija znachodziacca za miažoj?» — zadajecca pytańniem jon.
Pavodle jaho, zamiest zmahańnia za pasady demakratyčnyja siły musiać zajmacca praktyčnymi prablemami biełarusaŭ. Siarod kankretnych zadačaŭ jon nazvaŭ vydaču prajaznych dakumientaŭ uciekačam na try hady zamiest adnaho, supraćdziejańnie dyskryminacyi emihrantaŭ i zachavańnie mahčymaściaŭ dla biełarusaŭ padarožničać i atrymlivać adukacyju ŭ Jeŭropie.
Rymašeŭski taksama padkreśliŭ, što ciapier niemahčyma pravieści paŭnavartasny partyjny źjezd z udziełam siabraŭ BCHD, jakija zastajucca ŭ Biełarusi, tamu havorka moža iści najpierš pra raźvićcio chryścijanska-demakratyčnaha ruchu ŭ emihracyi.
Ci atrymajecca pieraadoleć šmathadovy raskoł, pakaža dalejšaje raźvićcio pieramovaŭ.
Kamientary
Tak u partii Łatuški ili tam ostalnych - cieli ž (diekłarirujemyje) točno takije žie, nie?