Sud u Biełastoku pastanaviŭ nie ekstradavać žurnalista pa zapycie Biełarusi
Raniej Hienprakuratura patrabavała ad Polščy vydać Źmitra Sałaŭjova.
22 kastryčnika adbyłosia pasiadžeńnie akruhovaha suda ŭ Biełastoku, jaki vynies rašeńnie pra niedapuščalnaść vydačy Źmitra Sałaŭjova orhanam pieraśledu ŭ Biełarusi. U žniŭni Hienprakuratura Biełarusi zapatrabavała ad Polščy ekstradavać mahiloŭca, jaki źjaŭlajecca vymušanym palitemihrantam, piša BAŽ.
Pavodle Źmitra Sałaŭjova, polski bok ad pačatku nie mieŭ namieru vysyłać jaho ŭ Biełaruś. Adnak daviałosia prajści zakonnuju praceduru paśla zapytu biełaruskaha boku.
«Praces prachodziŭ u akruhovym sudzie Biełastoka. Kali suadnosić ź biełaruskimi realijami, to heta abłasny sud. Mianie padrabiazna raspytali, jakija akaličnaści zmusili pakinuć radzimu i što mnie pahražaje ŭ Biełarusi.
Ja raspavioŭ, što ŭ Biełarusi suprać mianie raspačatyja dźvie kryminalnyja spravy za žurnalisckuju dziejnaść — pavodle častak 1 i 2 artykuła 361—1 KK RB za nibyta stvareńnie ekstremisckaha farmavańnia i ŭdzieł u im i pavodle č. 1 art. 357 KK RB — nibyta za ŭdzieł u zmovie ci inšych dziejańniach, učynienych z metaj zachopu ŭłady niekanstytucyjnym šlacham. Zhadaŭ, što ŭ Biełarusi sankcyjanavana zaklučeńnie mianie pad vartu.
Sud vynies rašeńnie, pavodle jakoha vydača mianie biełaruskim uładam niedapuščalnaja, bo ŭ dziaržavie, jakaja patrabuje vydačy, moža adbycca parušeńnie svabody i maich pravoŭ», — raspavioŭ BAŽ Źmicier Sałaŭjoŭ, atrymaŭšy aficyjnuju sudovuju pastanovu.
Ciapier, pavodle polskaha zakanadaŭstva, jana budzie dasłanaja na razhlad ministru justycyi, jaki vyniesie kančatkovaje rašeńnie.
U Polščy Źmicier Sałaŭjoŭ žyvie z 2021 hoda. Jon pakinuŭ radzimu paśla taho, jak daviedaŭsia pra svaju pieršuju kryminalnuju spravu. Pra toje, što jość jašče i druhaja, było napisana akurat u zapycie Hienprakuratury nakont jaho ekstradycyi. Ź im žurnalista paznajomili padčas hutarki ŭ polskaj prakuratury sioleta ŭletku. Na toj čas jon užo niekalki hadoŭ byŭ abvieščany ŭ vyšuk na terytoryi Rasii i Biełarusi.
Źmicier Sałaŭjoŭ byŭ hałoŭnym redaktaram navinavaha partała «Mahiloŭski rehijon», zhadanym u rašeńni KDB Biełarusi ad 29 listapada 2023 hoda (u aryhinalnym tekście pamyłkova stajała 19 listapada), dzie havorycca pra pryznańnie «ekstremisckim» farmavańniem «hrupy hramadzian, abjadnanych inicyjatyvaj «6TV Bielarus» i jaho strukturnym padraździaleńniem «Mahiloŭ Miedyja» («Naviny Mahiloŭskaha rehijonu»)». Žurnalist nie vyklučaje, što patrabavańnie jaho ekstradycyi z Polščy moža papiaredničać pačatku ŭ dačynieńni da jaho śpiecyjalnaj vytvorčaści.
Kamientary