«Skarby, znojdzienyja na haryščy». Kalekcyju kartak Pokemon malara-piensijaniera pradali za dva miljony dalaraŭ
Malar-dekaratar z brytanskaha haradka Uokinh staŭ miljanieram paśla taho, jak pradaŭ na aŭkcyjonie svaju kalekcyju kartak Pokemon.
Jon raskazaŭ, što navat nie padazravaŭ ab jaje kaštoŭnaści, pakul nie pračytaŭ u miascovaj haziecie, što adnu takuju kartku pradali bolš čym za 6000 funtaŭ sterlinhaŭ (8000 dalaraŭ), piša Bi-bi-si.
Jaho kalekcyja pakiemonaŭ, jakaja 15 hadoŭ pralažała na haryščy, była pradadziena ŭ sieradu na aŭkcyjonie Ewbank's za 1,56 młn funtaŭ sterlinhaŭ (dva miljony dalaraŭ).
Aŭkcyjonny dom z hrafstva Surej zajaviŭ, što heta najbujniejšy pa košcie prodaž kalekcyjnych kartak na aŭkcyjonie za ŭsiu historyju Vialikabrytanii, i vykazaŭ zdahadku, što suma ździełki moža akazacca rekordnaj i dla ŭsioj Jeŭropy.
«Viedaju, ludzi časta raskazvajuć pra skarby, znojdzienyja na haryščy, ale ŭ maim vypadku heta akazałasia čystaj praŭdaj», — raskazaŭ mužčyna, jaki pažadaŭ zastacca nieviadomym.
«Kali moj syn byŭ maleńkim, u kancy 1990‑ch hadoŭ, jon pačaŭ źbirać kartki i abmieńvacca imi z adnakłaśnikami. Mnie zdałosia, što jany pryhoža vyhladajuć, i ja zadumaŭsia, ci nie stanuć jany dobraj inviestycyjaj hrošaj. U syna byli svaje kartki, a da hetych jon nikoli nie dakranaŭsia, čamu ja, mušu skazać, rady», — uspaminaje jon.
Pokemon — japonskaja franšyza, najbolš viadomaja svaimi kalekcyjnymi kartkami, videahulniami i animacyjnymi sieryjałami.
Mužčyna raskazaŭ, što kupiŭ niekalki poŭnych naboraŭ kartak u pradaŭca z Małajzii praz eBay.
Adzin z naboraŭ, za jaki jon u svoj čas zapłaciŭ 300 funtaŭ sterlinhaŭ, na aŭkcyjonie ŭ sieradu byŭ pradadzieny za 75 tysiač funtaŭ (100 tysiač dalaraŭ).
Usie kartki zachoŭvalisia ŭ śpiecyjalnych papkach Pokemon, pryčym kožnaja zastavałasia ŭ aryhinalnaj zapiačatanaj upakoŭcy. Paśla taho jak syn mužčyny straciŭ cikavaść da pokiemonaŭ, kalekcyju prybrali na haryšča.
Udzielniki tarhoŭ z usiaho śvietu
U aŭkcyjonnym domie Ewbank's raskazali, što supracoŭniki litaralna stracili dar movy, kali mužčyna prynios im svaje 42 nabory kartak.
«Kali my ŭbačyli, što ŭ jaho jość, pryčym usie kartki byli ŭ idealnym stanie, my prosta nie mahli pavieryć svaim vačam», — raskazaŭ Džejms Spunier, kiraŭnik adździeła kalekcyjnych kartak aŭkcyjonnaha doma.
U Ewbank's dadali, što hetyja tarhi stali samymi paśpiachovymi za bolš čym 30 hadoŭ isnavańnia aŭkcyjonnaha doma.
Samym darahim łotam staŭ poŭny kalekcyjny nabor Legendary Collection Complete Master Set, jaki ŭklučaŭ kartku Čaryzarda (Charizard) u stanie, blizkim da idealnaha. Pieršapačatkova jaho košt aceńvali ŭ 15—20 tysiač funtaŭ sterlinhaŭ, adnak u vyniku nabor pradali za 100 tysiač funtaŭ (135 tysiač dalaraŭ).
Endru Jubenk, kiraŭnik aŭkcyjonnaha doma Ewbank's, jaki asabista pravodziŭ tarhi, zajaviŭ ich udzielnikam, što paśla zaviaršeńnia aŭkcyjonu jamu «pryjdziecca trochi palažać i adpačyć».
«Cikavaść da hetych tarhoŭ napiaredadni aŭkcyjonu była fienamienalnaj, i ŭ dzień prodažu jany apraŭdali ŭsie čakańni, — dadaŭ jon paźniej. — U tarhach udzielničali pakupniki z usiaho śvietu».
«Ažyjataž byŭ nievierahodnym, asabliva tamu, što kalekcyjaniery nie mahli pavieryć, nakolki dobraja hetaja kalekcyja: šyrokaja, niekranutaja, z poŭnymi naborami i praktyčna ŭsimi redkimi kartkami, pra jakija tolki možna maryć», — raskazaŭ jon Bi-bi-si.
Jubenk dadaŭ, što pakiemony zaraz pieražyvajuć sapraŭdny bum.
Pavodle jaho słoŭ, ludziam, jakija byli dziećmi, kali hetaja franšyza tolki źjaviłasia, ciapier pa 30—40 hadoŭ, i ŭ ich źjavilisia svabodnyja hrošy, jakija jany mohuć vydatkavać na svaje zachapleńni.
«Nastalhija adyhryvaje tut vielizarnuju rolu, — dadaŭ jon. — Ludzi chočuć znoŭ pieražyć uspaminy pra svajo dziacinstva».
Jubenk paraiŭ usim, chto padazraje, što ŭ ich na haryščy mohuć zachoŭvacca kaštoŭnyja rečy, «dastać ich i pakazać śpiecyjalistam».
«Kali vy kuplajecie niešta svajmu synu, jak adbyłosia ŭ dadzienym vypadku, a jamu heta akazvajecca nie patrebna, mahčyma, varta prosta adkłaści nabytaje na zachoŭvańnie. Bo nikoli nie viedaješ, jakuju kaštoŭnaść jano moža pradstaŭlać u budučyni», — skazaŭ jon.
Pavodle dadzienych aŭkcyjonnaha doma Ewbank's, rekordnaja suma, vyručanaja za kalekcyju pokiemonaŭ, pieravysiła papiaredni rekord, ustalavany zusim niadaŭna — 9 kastryčnika ŭ Łondanie, kali na tarhach aŭkcyjonnaha doma Stanley Gibbons ahulnaja suma prodažaŭ skłała 872 tys. funtaŭ sterlinhaŭ (1,1 młn dalaraŭ).
Aryštavali pradstaŭnikoŭ kampanii Bayer u Biełarusi15
Kamientary
nu vieś podriad musor javno chraniť nie stoit. nadiejaťsia čto chłam staniet zołotom eto šiza