Amierykanka, jakaja vyžyła paśla sproby pakarańnia śmierciu, raskazała, što ź joj adbyvałasia
Amierykanka Krysta Pajk, jakaja była asudžanaja da śmiarotnaha pakarańnia i pieražyła dźvie niaŭdałyja injekcyi, upieršyniu publična vykazałasia pra toje, što ź joj adbyłosia, piša Bi-bi-si.
U vieraśni ŭ turmie štata Tenesi Kryście Pajk dvojčy ŭvodzili pientabarbitał, adnak nivodnaja z doz nie pryviała da śmierci. Pa słovach miedykaŭ, u kryvianosnuju sistemu žančyny nie trapiła dastatkovaj kolkaści preparatu.
U svajoj zajavie, jakuju apublikavali ŭ sacyjalnych sietkach jaje advakaty, Pajk raskazała, što paśla pracedury aprytomnieła adna ŭ balnicy, nie razumiejučy, što adbyvajecca, i adčuvajučy bol:
«Paśla hetaha dnia nie było nivodnaj chviliny, kali b ja nie adčuvała bol. Majo cieła balić. Balać ruki. Balać kiści. Balić horła. Mnie ŭsio jašče ciažka havaryć. I heta nie tolki fizičny bol. Bol pranizvaje majo sumleńnie i maju dušu».
Paśla niaŭdałaj sproby pakarańnia 50‑hadovuju Pajk u krytyčnym stanie dastavili ŭ balnicu. Paźniej jaje viarnuli ŭ turmu, dzie jana znachodzicca ŭžo kala 30 hadoŭ. Raniej advakaty paviedamlali, što paśla injekcyj u žančyny raźviłasia zapaleńnie lohkich, apuchli ruki i ŭźnikli ciažkaści z hłytańniem.
Pajk była asudžanaja da śmiarotnaha pakarańnia za zabojstva 19‑hadovaj Kolin Ślemier, učynienaje ŭ 1995 hodzie. Na toj momant Kryście było 18 hadoŭ, a jaje tahačasnamu chłopcu Tadaryłu Šypu — 17. Jany źbili i katavali dziaŭčynu, ź jakoj paznajomilisia ŭ łahiery dla prablemnych padletkaŭ, a zatym zabili jaje. Šypa nie prysudzili da śmierci, bo na momant złačynstva jon byŭ niepaŭnaletnim. Jon dahetul zastajecca ŭ źniavoleńni.
Pajk pavinna była stać pieršaj za 200 hadoŭ žančynaj, pakaranaj śmierciu ŭ Tenesi. Ale hety vypadak staŭ adzinym viadomym, kali čałaviek vyžyŭ paśla śmiarotnaj injekcyi.
U svajoj zajavie žančyna adznačyła, što pastupova adnaŭlajecca i adčuvaje siabie macniejšaj, ale hajeńnie ran jašče nie aznačaje, što ź joj usio dobra. Jana taksama zajaviła, što jaje hłyboka ŭraziła niekampietentnaść, praź jakuju stolki ludziej apynulisia ŭ žachlivym stanoviščy.
Ułady Tenesi pakul nie patłumačyli, čamu vykanańnie śmiarotnaha pakarańnia skončyłasia niaŭdačaj. Pry hetym jany nastojvali, što sposab jaho praviadzieńnia byŭ abrany pravilna.
Ciapier čytajuć
Śviatłana Cichanoŭskaja pra krytyku z boku Cichanoŭskaha: Mnie ad hetaha vielmi kryŭdna i niepryjemna33
Kamientary