Najbahaciejšyja ludzi Biełarusi

Ukrainskaja hazieta «Dieło» ŭpieršyniu ŭklučyła ŭ svajo daśledavańnie našych suajčyńnikaŭ.

Ukrainskaja hazieta «Dieło» vyśvietliła, u čyich rukach u najbujniejšych postsavieckich respublikach skancentravanyja samyja salidnyja biznes-aktyvy, i z dapamohaj ekśpiertaŭ acaniła ich rynkavuju vartaść.

Kali nie detalizavać infarmacyju ab najbujniejšych kapitałach pa krainach, usio prosta i vidavočna. Samyja bujnyja — u Rasii, Ukrainie, Kazachstanie. Pradstaŭniki hetych troch krain byłoha SSSR rehularna traplajuć u śpis dalaravych miljarderaŭ płaniety, jaki składaje amierykanski časopis Forbes. U hetych respublikach jość vialikija i zrazumiełyja zamiežnym ekśpiertam biznesy.

Samyja prazrystyja aktyvy ŭ paraŭnańni ź inšymi krainami Sadružnaści — u rasijskaha i ŭkrainskaha biznesaŭ.

Pra ich bolš za ŭsio infarmacyi. Tamu aliharchaŭ hetych dźviuch krain rehularna aceńvajuć i Forbes, i miascovyja žurnalisty (va Ukrainie, naprykład, časopis «Karespandent», u Rasii — «Finans»). Akramia taho, bahatyja rasijcy i ŭkraincy aceńvajucca polskim vydańniem Wprost, jakoje da 2008 uklučna štohod pisała pra svajo bačańnie sotni najbahaciejšych ludziej Uschodniaj Jeŭropy (pradstaŭniki inšych krain SND u rejtynhach hetaha vydańnia nie fihurujuć).

Da Rasii i Ukrainy ŭ hetym płanie padciahvajecca Hruzija: dvojčy (u 2007 i 2008) kapitał etničnych hruzinaŭ (jak hramadzian Hruzii, tak i biznesoŭcaŭ, jakija žyvuć abo viaduć biznes u inšych dziaržavach) aceńvała hruzinskaja hazieta The Georgian Times. Chtości z hruzinskaj biznes-elity fihuruje ŭ śpisach Forbes u jakaści pradstaŭnikoŭ biznesu inšych krain (asnoŭnyja aktyvy najbujniejšych biznesoŭcaŭ skancentravanyja za miežami Hruzii). Tak, prykładam, Bidzina Ivanišvili na radzimie zajmajecca dabračynnaściu, a biznes aliharcha Hruzii № 1 — u Rasii.

Siarod azijackich respublik samyja prazrystyja i zrazumiełyja aktyvy — u Kazachstanie. Praŭda, biznesoŭcaŭ navat hetaj respubliki miascovyja ŚMI nie aceńvajuć. U najlepšym vypadku možna natrapić na razroźnienyja zhadki pra adzinkavych asobaŭ. Rejtynhi samych upłyvovych pierson Małdovy drukuje časopis VIP-Magazine. Adnak aceńvać ich kapitał dziełavyja ŚMI Małdovy nie biarucca. Adkrytaj dakładnaj infarmacyi pra top-biznesoŭcaŭ respubliki i ich aktyvy niama, čutak i skandałaŭ bolš čym dastatkova. Da taho ž, kapitały najbahaciejšych pradstaŭnikoŭ pryvatnaha biznesu Małdovy, jak praviła, raspylenyja pa roznych halinach, časta prasočvajecca suviaź kapitału z adminresursam. Mahčyma, z hetaj pryčyny biznesoŭcy Małdovy nie traplajuć pad pryceł Wprost. Niaśmiełyja sproby sistematyzavać infarmacyju pra najbahaciejšych suajčyńnikaŭ robiać žurnalisty Biełarusi. Śpis 100 samych bahatych biznesoŭcaŭ Biełarusi apošnija niekalki hadoŭ rychtuje miascovaja hazieta «Ježiednievnik». Adnak acenki kapitałaŭ nie pryvodziacca.

Aceńvać aktyvy samych bahatych suajčyńnikaŭ pakul što navažvajucca tolki biełaruskija internet-partały.

Sukupnyja aktyvy dziesiaci najbujniejšych biznesoŭcaŭ Biełarusi acenienyja ŭ $1,9 młrd., a dziesiaci najbujniejšych biznesoŭcaŭ Małdovy — u $1,4 młrd. Dla paraŭnańnia: top-10 aliharchaŭ Rasii ŭ ahulnym vałodaje aktyvami na $ 113 młrd (pavodle acenki Forbes).