Ministerstva pryrodnych resursaŭ i achovy navakolnaha asiarodździa voźmie ŭdzieł u ekśpiertyzie architekturnaha prajekta budučaj biełaruskaj AES.Pra heta paviedamiŭ načalnik upraŭleńnia dziaržaŭnaj ekałahičnaj ekśpiertyzy Minpryrody Alaksandr Andrejeŭ.
Jon nahadaŭ, što 13 lipienia była zavieršana dziaržaŭnaja ekałahičnaja ekśpiertyza spravazdačy ab acency ŭździejańnia AES na navakolnaje asiarodździe (AUNA). Minpryrody vyłučyła šerah patrabavańniaŭ, nakiravanych na praduchileńnie škodnaha ŭździejańnia budučaj stancyi. Adno ź ich tyčycca pamianšeńnia ciepłavoha i chimičnaha ŭpłyvu na raku Vilija, raźmieščanuju pablizu placoŭki dla budaŭnictva AES u Astravieckim rajonie. Akramia taho, pradstaŭniki Minpryrody zapatrabavali raźličyć abjomy vykidu ad hradzirniaŭ elektrastancyi, jakija pry achałodžańni vady vydzialajuć u atmaśfieru vilhać, a ŭ vypadku, kali ŭ rehijonie budzie naziracca pavyšanaja vilhotnaść, praduhledzieć mahčymaści abarony ad jaje pomnikaŭ architektury, raźmieščanych u najbližejšych nasielenych punktach.
Čarhovym etapam padrychtoŭki prajekta AES stanie inviestycyjnaje abhruntavańnie jaje budaŭnictva, paśla čaho pačniecca raspracoŭka architekturnaha prajekta stancyi, patłumačyŭ Andrejeŭ. Na jaho dumku, da pačatku ekśpiertyzy architekturnaha prajekta projdzie jak minimum hod.
Alaksandr Andrejeŭ taksama paviedamiŭ, što padčas ekśpiertyzy architekturnaha prajekta śpiecyjalisty Minpryrody prakantralujuć vykanańnie raspracoŭščykami «šerahu mierapryjemstvaŭ pa praduchileńni značnaha škodnaha ŭździejańnia stancyi na navakolnaje asiarodździe», u tym liku tych, jakija byli vyłučanyja pa vynikach dziaržaŭnaj ekałahičnaj ekśpiertyzy.
«Śvińni zarochkali. Biez vady daŭno nie siadzieli, ja b im adklučyŭ». Azaronak abrynuŭsia na žycharoŭ rajona Lebiadziny29
Kamientary