Zamiest ahučanych 4 młn t pastaŭlena budzie ŭsiaho kala 1 miljona, zajaviŭ ministr transpartu Ukrainy.
Ukraina hatovaja dać Biełarusi mahčymaść pastaŭlać vieniesuelskuju naftu trubapravodam Adesa-Brody, ale tolki ŭ vypadku harantyi, što hetym maršrutam budzie prapampoŭvacca prynamsi 9 miljonaŭ ton štohod. Pra heta zajaviŭ ministr transpartu Ukrainy Kanstancin Jafimienka.
Tolki na takich umovach Kijeŭ hatovy raźviarnuć kirunak pampavańnia pa trubapravodzie ŭ bok Biełarusi. Pampavać mienšyja abjomy nafty ekanamična niemetazhodna. Ciapier hetym maršrutam u Adesu transpartujecca rasiejskaja nafta.
Pavodle słovaŭ uradoŭca, kali Miensk takoj harantyi nie daść, to nafta ź Vieniesueły i nadalej budzie dastaŭlacca na Mazyrski NPZ čyhunkaj.
9 miljonaŭ ton — nievykanalny pakazčyk.
Pavodle damoŭlenaściaŭ Alaksandra Łukašenki i Uha Čaviesa, Minsk płanuje zakupić u Karakasa 4 miljona ton nafty ŭ 2010 hodzie i 10 miljonaŭ ton — u 2011 hodzie. Adnak častka nafty maje traplać na navapołacki «Naftan» praz terminały ŭ Muuzie (Estonija) i Kłajpiedzie (Litva).
Navat u 2011 hodzie prapampoŭka 9 młn t praz Adesu nie maje ekanamičnaha sensu. Pa-pieršaje, niama patreby admaŭlacca całkam ad tańniejšaj, choć i horšaj pa jakaści rasiejskaj nafty. Pa-druhoje, ahulnaja maksimalnaja patreba Mazyrskaha naftapierapracoŭčaha zavoda składaje kala 12 miljonaŭ ton. Ale sioleta abjomy pierapracoŭki prykładna na 30% nižejšyja. Da taho ž, kala 1,8 młn ton na zavod traplaje ź biełaruskich paleskich radoviščaŭ.
Tearetyčna nafta moža paciačy naftapravodam Adesa-Brody ŭ 2011-m, ale tolki ŭ vypadku, kali Biełaruś całkam admovicca ad zakupu rasiejskaj syraviny abo Rasieja admovicca pradavać naftu Biełarusi. I toj, i toj varyjant nierealnyja.
Pahadnieńnie pra zachady ŭ raźvićci supracy pa transpartavańni nafty praz Ukrainu ŭ Biełaruś było padpisanaje 12 lipienia hetaha hoda vice-premjerami dźviuch krainaŭ. Jano dało padstavy mierkavać, što ad 2011-ha moža pačacca vykarystańnie naftapravodu Adesa-Brody dla pampavańnia hetych abjomaŭ.
Vynikaje, što vykarystańnie «Adesy-Brodaŭ» u aviersnym režymie stanie mahčymym, tolki kali źjavicca praciah naftapravodu ŭ Polšču i volnaja nafta z kaśpijskaha basiejnu dla jaho napaŭnieńnia.
Kankretnych prapanovaŭ ad naftavych kampanij nakont hetaha pakul nie było.
Pieršy tankier ź Vieniesueły prybyŭ u Adesu 25 krasavika, druhi — 19 červienia, treci — 29 červienia, čaćviorty — 19 lipienia.
Ministr transpartu Ukrainy adznačyŭ, što zadekłaravanych Biełaruśsiu abjomaŭ pastavak vieniesuelskaj nafty dasiahnuta nie budzie. Zamiest ahučanych 4 młn t, miarkuje jon, pastaŭlena budzie ŭsiaho kala 1 młn.U port prychodzić prykładna dva tankiery ŭ miesiac, h.zn. kala 160 tys. t za miesiac. U suviazi z hetym ministr adznačyŭ, što Ukraina nie budzie nadavać źnižak za transpartavańnie — maŭlaŭ, abjomy niedastatkovyja. Ministr miarkuje, što bałtyjskija party kankurencyi ŭkrainskamu maršrutu ŭsio adno nie składuć.
Niahledziačy na minimalnyja abjomy pastavak, varta adznačyć, što pastaŭki nafty ź Vieniesueły ŭpieršyniu dyviersifikavali krynicy enierhanośbitaŭ dla Biełarusi. Da apošniaha času Biełaruś zastavałasia krainaj, jakaja tatalna zaležyć ad pastavak vuhlevadarodaŭ z Rasii. Pavodle standartaŭ ES, kraina nie pavinna atrymlivać ad adnaho pastaŭščyka bolš za tracinu abjomu spažyvanych enerhanośbitaŭ.
Ciapier čytajuć
Redaktara niezaležnaj baranavickaj haziety «Inteks-Pres» Janukieviča prysudzili da 14 hadoŭ kałonii, jaho namieśnika Pakalenku — da 12 hadoŭ11
Kamientary