Jak italjanski aliharch šukaŭ u Biełarusi paluboŭnicu

Žurnalist «Źviazdy», zamaskiravaŭšysia pad apieninskaha bahacieja, raspačaŭ palavańnie na biełaruskich dziaŭčat. Kolki ź ich spakusilisia na vysoki status aliharcha i jaho tryvałaje finansavaje stanovišča?

My praviali ekśpierymient. Kab zrabicca italjanskim miljanieram, žurnalist «Źviazdy» nie staŭ rabić hrym, brać u arendu aŭtamabil elitnaha kłasu i drukavać kiejs padroblenych hrašovych banknot. My prosta stvaryli ankietu na papularnym sajcie znajomstvaŭ (tut svaje profili majuć blizu 200 tysiač biełarusaŭ i biełarusak).

U aliharchavaj ankiecie vystavili fiktyŭny fotazdymak pryvabnaha i małaviadomaha zamiežnaha artysta. Prydumali jamu ŭzrost (44 hady) i malaŭničaje imia (Lučana). U rubrycy «Pra siabie» paznačyli pa-anhlijsku: «Ja italjanski mužčyna. Chaču paznajomicca ź biełaruskaj žančynaj. U mianie šmat hrošaj, ale niama kachańnia». U rubrycy «aksesuaraŭ» napisali, što miljanier jeździć na «Majbachu 62» (mašynka kaštuje bolš za paŭmiljona jeŭra).

«Banžurna», — tak vitalisia my z pryvabnymi, na naš pohlad, dziaŭčatami i čakali adkazaŭ ad ich. Ale, na dziva, daloka nie kožnaja biełaruska zaachvočvałasia takim znajomstvam.

Adna ź ich — 28-hadovaja Jeva. U svajoj ankiecie paznačyła: «Ja nie jakaja-niebudź anučka, što pabiažyć da ciabie za 200 dołaraŭ». Voś jak pačałasia naša ź Jevaj pierapiska.

Aliharch: Banžurna.

Jeva: Sustreča — 1000 jeŭra.

Tut ja ledź nie ašaleŭ: jakoje nachabstva! Stolki nie prosiać navat elitnyja prastytutki. Paprasiŭ Jevu dasłać fotazdymki (vidavočna, što ŭ ankiecie jana chavała svoj sapraŭdny tvar).

Praź dziesiać chvilin na elektronnuju skryniu pryjšoŭ list. Jeva apynułasia Kaciaj. Na fotazdymku była vulharnaja žančyna, jakaja ŭskaraskałasia na areli i sprabavała zavabić aliharcha Lučana, nieachajna rastapyryŭšy karotkija nožki. Na hetym znajomstva skončyłasia.

Na prapanovu paznajomicca achvotna i chutka adhuknułasia jašče adna «sieńjaryta», z zamiežnaj mianuškaj Nichie. Na fotazdymku dziaŭčyna siadzieła ŭ kupalniku na bierazie mora. Nijakich uzhadak pra akazańnie intymnych pasłuh u ankiecie Nichie nie było. Ale na majo «Banžurna!» adkaz byŭ taki:

— 200 u.a.

Voś vam i kachańnie. Jašče šeść pryvabnych dziaŭčat prosta pahadzilisia na sustreču ŭ Minsku. Maŭlaŭ, pabačymsia, a tam vyrašym, što z taboj, Lučana, rabić. Najbolš serca aliharcha pałaniła 21-hadovaja Ludmiła, raspaŭsiudnica kaśmietyki. Pryvabnaja brunetka vykazvała spačuvańni, što pryvabny 44-hadovy aliharch dahetul nie znajšoŭ kachańnie i nie naradziŭ dziaciej. Pahadziłasia sustrecca u Minsku i pravieści pieramovy ŭ dvuchbakovym farmacie. Usio išło jak maje być, ale ja straciŭ ideałahičnuju raŭnavahu i całkam pierajšoŭ na ruskuju movu.

— Niešta ty nie padobny da italjanca, skančaj hety maskarad, — pastanaviła Ludmiła i prypyniła pierapisku. U hety ž čas sardečka na jaje ankiecie pakinuŭ moj kankurent — 41-hadovy turak Erdahan, jaki vabiŭ dziaŭčat uśmieškami i svaim fotazdymkam na fonie kijoska z šaŭrmoj. Tak, napeŭna, adzin zamiežnik prajhraŭ druhomu. Kankurencyja!

A ja, padličvajučy ścipłyja vyniki palavańnia, kanstatavaŭ, što daloka nie ŭ kožnaj biełaruskaj dziaŭčyny pa dołary ŭ kožnym voku.

Prastytutka ź interneta — jak aŭtamat seksualnych

pasłuh

Niekatoryja rasijskija sajty znajomstvaŭ dazvalajuć načnym miatłuškam stvarać admysłovyja intym-staronki. Tam jany paznačajuć, što chočuć znajści sponsara, vystaŭlajuć košty, eratyčnyja fotazdymki i hetak dalej.

Achvotna karystajucca takimi staronkami i biełaruski.

Dla ekśpierymientu my, prykryŭšysia ŭsio tym ža zamiežnym aliharcham, pasprabavali zavieści razmovu z tuzinam takich prastytutak. Usie jany, jak akazałasia, nie vałodajuć zamiežnymi movami i nie mohuć padtrymać razmovu. Składvałasia ŭražańnie, što pierapisvaješsia nie z čałaviekam, a z humovym aŭtamatam seksualnych pasłuh. Pra takich našy prodki trapna zaŭvažyli — durnaja jak kałoda.

Zamiežny biznesoviec: «U Biełarusi mała dziaŭčat adnačasova pryhožych

i dobrych pa charaktary»

Vierahodna, niekatoryja dziaŭčaty raskusili ideju z zamiežnym aliharcham i, zamiest taho, kab padtrymać pierapisku, prosta ŭśmichnulisia. Takija dumki pryjšli da nas paśla praviadzieńnia ekśpierymienta. Adnak znajomy azijacki biznesoviec spadar Łu Sian (imia i proźvišča čałavieka źmienienyja z pryčyny jaho vysokaha statusu, zapis razmovy jość u redakcyi. — «Źviazda») paćvierdziŭ niekatoryja vyniki našaha ekśpierymienta.

Siadzim sa spadarom Łu ŭ adnoj z kaviarniaŭ u centry horada, viačerajem, razmaŭlajem pra biełaruskich žančyn. Biznesoviec dapamahaŭ sustrakać nie adzin tuzin delehacyj z Azii i nie raz byŭ śviedkam taho, jak zamiežnyja hości sprabavali zaviazać znajomstva ź biełaruskaj dziaŭčynaj.

— Spadar Łu, ja padrychtavaŭ materyjał pra seks-turyzm, jak vy ličycie, ci možna kazać, što ŭ Minsku isnuje takaja źjava?

— Kolki dzion tamu ja pryjechaŭ z Šanchaja. Tam lubomu turystu paznajomicca z žančynaj lahčej. U Minsku niama ŭmoŭ dla seks-turyzmu, niama masažnych sałonaŭ, dzie takija pasłuhi mohuć akazvacca.

— Časam vy sustrakajecie delehacyi. Napeŭna, pryjazdžajuć i zabiaśpiečanyja ludzi, sprabujuć paznajomicca ź dziaŭčynami. Jak u ich heta atrymlivajecca?

— U luboha mužčyny, jaki vypje, mohuć źjavicca intymnyja žadańni. Adzin ź piaci, ale zaŭsiody maje žadańnie adpačyć z žančynaj. Ale nie ŭsie asoby žanočaha połu dajuć na heta zhodu.

Tak, niadaŭna my naviedali adzin minski stryptyz-kłub. Spadaru, jakoha ja supravadžaŭ, spadabałasia dziaŭčyna, jakaja tančyła eratyčny taniec. Paznajomilisia, jon spytaŭsia, kolki jana zarablaje. Skazała, što 1000 dołaraŭ u miesiac. Jon prapanavaŭ joj 500 dołaraŭ za noč, ale jana admoviłasia. Tady jamu paraili źviarnucca da jakoha-niebudź taksista, što mužčyna i zrabiŭ. Zapłaciŭ vadzicielu 100 dołaraŭ, i toj pavioz jaho pa miescach, dzie byvajuć prastytutki. Mužčyna znajšoŭ, što chacieŭ.

— Ci šmat vy viedajecie ŭ Minsku miescaŭ, dzie źbirajucca prastytutki?

-Takija miescy jość u luboj krainie, aproč musulmanskich, dzie, jak ja čuŭ, za zaniatki prastytucyjaj mohuć publična pakarać. Cikava toje, što zaraz, uviečary, pobač z nami prachodzić šmat pryvabnych dziaŭčat. A ŭnačy jany źnikajuć, i vybrać pryhažuniu siarod prastytutak nie tak prosta. Choć u horadzie jość niekalki miescaŭ, dzie admysłova pracujuć darahija rabotnicy seks-biznesu.

Usio adno składvajecca ŭražańnie, što prastytutak u Minsku našmat mienš, čym ludziej, jakija chacieli b skarystacca ich pasłuhami.

— Vy šmat času pravodzicie ŭ Biełarusi i kažacie, što tut šmat pryhožych dziaŭčat. Ci chacieli b vy ŭziać u žonki biełarusku?

— Raniej byŭ upeŭnieny, što vaźmu šlub ź biełaruskaj. Ale ciapier razumieju, što znajści tut dziaŭčynu adnačasova pryhožuju i dobruju charaktaram składana. Žyćcio pakaža…

• 0
• 0
• 0
• 0
• 0
• 0
• 0
• 0