Kiraŭnik MUS Biełarusi biare ŭdzieł u naradzie ŭ Astanie

Kiraŭnik MUS Biełarusi Anatol Kulašoŭ biare ŭdzieł u naradzie ministraŭ unutranych spraŭ dziaržaŭ — udzielnic Mytnaha sajuza (MS), jakaja prachodzić siońnia ŭ Astanie (Kazachstan).

Pavodle infarmacyi pres-słužby MUS Biełarusi, ministry płanujuć abmierkavać pytańni, źviazanyja z dapracoŭkaj dahavorna-pravavoj bazy supracoŭnictva, pavyšeńnia efiektyŭnaści sumiesnaha procidziejańnia arhzłačynnaści i kryminalnamu aŭtabiźniesu, a taksama parušeńniam u śfiery ekanomiki, niezakonnamu abarotu narkotykaŭ i nielehalnaj mihracyi.

Buduć abmiarkoŭvacca mahčymyja niehatyŭnyja tendencyi raźvićcia kryminalnaj situacyi, źviazanyja z farmiravańniem MS Biełarusi, Kazachstana i Rasii.

«Śpiecyjalisty adznačajuć, što Biełaruś užo ciapier niedaatrymlivaje ŭ biudžet značnyja sumy hrošaj u vyhladzie mytnych i padatkovych adličeńniaŭ z-za ŭciahvańnia ŭ ekanamičny abarot tavaraŭ trecich krain, niezakonna ŭviezienych na jaje terytoryju, — padkreślivajecca ŭ paviedamleńni MUS. — Jość usie padstavy mierkavać, što mahčymaść svabodnaha pieramiaščeńnia hetych tavaraŭ u ramkach Mytnaha sajuza moža ŭzmacnić prablemu».

«Nie vyklučana, što raźvićcio intehracyjnych pracesaŭ paciahnie stvareńnie novych złačynnych schiem z udziełam biźnies-struktur dźviuch i bolš krain, vykarystańniem fiktyŭnych dakumientaŭ, — adznačaje pres-słužba. — Aktyvizujucca sproby niezakonnaha pieramiaščeńnia cieraź miažu tytuniovych i ałkaholnych vyrabaŭ, vadkaściej z utrymańniem śpirtu, pryznačanych dla vytvorčaści tannaj kantrafaktnaj ałkaholnaj pradukcyi. Mahčymaja arhanizacyja kanałaŭ nielehalnaha vyvazu vyrabaŭ z utrymańniem kaštoŭnych darahich redkaziamielnych i kalarovych mietałaŭ z terytoryi krain Mytnaha sajuza dla realizacyi na terytoryi krain Jeŭrasajuza».

Napiaredadni siońniašniaj sustrečy, 23 žniŭnia, va Uralsku (Kazachstan) prajšła narada pa pytańniach pryhraničnaha supracoŭnictva MUS troch krain MS. Adkryvajučy jaje, ministr unutranych spraŭ Rasii Rašyd Nurhalijeŭ vykazaŭ pierakanańnie ŭ tym, što «dasiahnutyja damoŭlenaści dazvolać vyznačyć adzinyja padychody da vyrašeńnia ahulnaj dla nas zadačy zabieśpiačeńnia achovy hramadskaha paradku i procidziejańnia złačynnaści ŭ farmacie adzinaj antykryminalnaj prastory».

Siońnia ŭdzielniki narady ŭ Astanie sustrenucca z prezidentam Kazachstana Nursułtanam Nazarbajevym.

• 0
• 0
• 0
• 0
• 0
• 0
• 0
• 0