Biełaruskija pravajdery rychtujucca da filtracyi z 1 vieraśnia 6

Mienavita z hetaj daty ŭsie jany pavinny mieć mahčymaść filtravać zabaronienuju infarmacyju ŭ bajnecie. Voś tolki ŭsie vydatki mohuć u vyniku lehčy na zvyčajnych karystalnikaŭ.

Nahadajem, pastanovaj Apieratyŭna-analityčnaha centra i Minsuviazi 29 červienia 2010 było zaćvierdžanaje pałažeńnie ab paradku abmiežavańnia dostupu karystalnikaŭ internet-pasłuh da infarmacyi, zabaronienaj da raspaŭsiudu ŭ adpaviednaści z zakanadaŭčymi aktami.

Hatovyja da pracy i abarony infarmacyjnaj prastory

Akazałasia, pravajdery nie źbirajucca iści pa śladach internet-resursaŭ, dla jakich daviałosia padaŭžać terminy rehistracyi.

Jak zajavili ŭ pres-słužbie «Biełtelekama», hałoŭny apieratar krainy zaŭsiody hatovy.

«Jość termin vykanańnia patrabavańniaŭ — 1 vieraśnia, i jaho nichto nie skasoŭvaŭ. Naturalna, my jak dziaržaŭny pravajder nie źbirajemsia parušać ukaz. Zakupleny soft, abstalavańnie, jość rabotniki, jakija hetym zajmajucca», — zapeŭnili nas u kampanii.

Nahadajem, adrazu paśla ŭstupleńnia ŭ siłu pastanovy ab internet-filtracyi «Biełtelekam» užo zajaŭlaŭ, što hatovy filtravać bajnet choć zaŭtra.

«My sapraŭdy ŭžo z 1 lipienia padrychtavali ŭsie miery pa realizacyi internet-filtracyi. Ale akazvać hetuju pasłuhu, zhodna z zakanadaŭstvam, my pavinny z 1 vieraśnia», — patłumačyli takuju situacyi ŭ «Biełtelekamie».

Svaju hatoŭnaść filtravać infarmacyju paćvierdzili i inšyja pravajdery. Niekatoryja, praŭda, adznačajuć, što nie ŭsio jašče zrazumieła sa śpisami zabaronienych resursaŭ, ale Dziaržaŭnaja inśpiekcyja pa elektrasuviazi abiacaje, što asudžanyja na zabaronu buduć całkam pradstaŭlenyja ŭ śpisach.

U lubym vypadku, my ŭsio ŭžo zmožam ubačyć praz paru dzion. «Miery ažyćciaŭlajucca, usio ŭbačycie 1 vieraśnia», — raskazali nam u administracyi pravajdera «Dziełavaja sietka».

Chto zapłacić za filtry?

Adnak z 1 vieraśnia, mahčyma, nam daviadziecca sutyknucca nie tolki z čakanym filtravańniem, ale i niekatorymi niečakanym abstavinami.

Bo, jak adznačajuć pravajdery, abstalavańnie dla internet-filtracyi abyšłosia vielmi doraha. Tak, naprykład, «Bielinfanet» patraciŭ na ŭsio amal 100 tysiač dalaraŭ.

«Pytańnie ŭ tym, što jašče budzie prydumana. Ciapier havorka pakul idzie pra ručnyja naładki filtracyi. Kali budzie vyrašana pierajści na aŭtamatyčnuju — vydatki mohuć być značna bolšyja», — raskazaŭ dyrektar kampanii «Bielinfanet» Jury Bitno.

«Samaja vialikaja prablema — lišnija vydatki, ničym nie kampiensavanyja», — pryznaŭsia dyrektar telekamunikacyjnaj kampanii «Ajčyna-plus» Maksim Laŭdanski.

Pa jaho słovach, mety, praduhledžanyja pastanovaj ab internet-filtracyi, vysakarodnyja, ale voś miery pa ich realizacyi kulhajuć.

«Ideja dobraja. Skažam, asabista ja b nie chacieŭ, kab majo dzicia naviedvała nieviadoma jakija sajty i atrymlivała niepatrebnuju infarmacyju. Ale voś miery dla dasiahnieńnia hetaj mety — nie samyja ŭdałyja», — padzialiŭsia mierkavańniem śpiecyjalist.

«Vydatki na ažyćciaŭleńnie filtracyi paviesili na pravajderaŭ, a pravajdery, u svaju čarhu, paviesiać na karystalnikaŭ, — tłumačyć jon. — Nu, a jak ža inakš nam akupić vydatki?»

Maksim Laŭdanski dadaje, što «praz dempinh „Biełtelekama“ košty padniać nierealna. Heta značyć, što karystalniki pacierpiać nie praz padaražańnie taryfaŭ na internet — chutčej im niedadaduć niejkuju pasłuhu ci daduć jaje, ale nie ŭ toj jakaści. Tut varyjantaŭ šmat, i ŭsio zaležyć tolki ad stupieni kiepskaha finansavaha stanovišča kampanii».

Juryj Bitno taksama padtrymlivaje mierkavańnie ab tym, što vydatki pravajderaŭ adhuknucca na prostych karystalnikach bajnetu: «Rana ci pozna tak i budzie. Adnak kali i ŭ jakim kantekście heta adbudziecca — pakul kazać składana».

«My zrobim usio, kab našy vydatki byli apraŭdanyja — mahčyma, budziem raspracoŭvać dadatkovyja pasłuhi, kab tak ci inakš viarnuć hetyja hrošy», — zaŭvažyŭ Juryj Bitno.

Praŭda, dadaŭ dyrektar kampanii, pakul kankretnych rašeńniaŭ z hetaj nahody jašče niama.

Ukaz № 60 padkasiŭ internet-kaviarni

Pakutujuć ad ukazu № 60 nie tolki pravajdery, ale i internet-kaviarni, vymušanyja ŭžo druhi miesiac nie absłuhoŭvać naviedvalnikaŭ biez «papierki».

Nahadajem, što z 1 lipienia ŭ Biełarusi skarystacca pasłuhami internet-kaviarni možna tolki pakazaŭšy dakumient, jaki paćviardžaje asobu. Pa roznych dadzienych, kolkaść naviedvalnikaŭ takich ustanovaŭ skaraciłasia na 30–50%.

«Popyt na internet-pasłuhi źniziŭsia ŭ dva razy, — raskazaŭ dyrektar bujnoj staličnaj internet-kaviarni. — Naturalna, udvaja skaracilisia i prybytki, što zrabiła pradpryjemstva paprostu nierentabielnym».

Jak pryznajucca supracoŭniki, navat tyja ludzi, jakija majuć pry sabie pašpart, usio roŭna pastajanna aburajucca novymi paradkami.

Ciapier ustanova vyžyvaje vyklučna za košt pasłuh kaviarni. U płanach — pamienšyć miesca pad kamputarnyja zały i ŭrezać śpis internet-pasłuh. Jak adznačajuć śpiecyjalisty, apošnim časam i tak naziraŭsia spad papularnaści internet-kaviarniaŭ — maŭlaŭ, navošta kudyści chadzić, kali mnohija choć praz telefon zachodziać u internet. A ŭkaz № 60, ličać jany, paprostu zabiŭ hetuju śfieru biźniesu.

«Uładalniki internet-kaviarniaŭ buduć vymušanyja začyniać centry i pradavać pamiaškańni, rearhanizoŭvać ich u kramy», — miarkuje dyrektar internet-kaviarni.

Što datyčyć apraŭdańnia takich mieraŭ, to zamiest kamientara śpiecyjalist pryvioŭ statystyku: za šeść hadoŭ pracy ŭstanovy da ich tolki trojčy nalacieli pradstaŭniki orhanaŭ pravaparadku, jakija šukali internet-škodnikaŭ. I heta pry siaredniaj naviedvalnaści internet-kaviarni 300 čałaviek za sutki…

Ciažkaści pierakładu

Zrešty, paprakajuć čynoŭnikaŭ nie tolki ŭ niedalnabačnaści pry novaŭviadzieńni, ale navat u nierazumieńni pradmieta razmovy.

Adzin sa śviežych prykładaŭ — znosiny češskich sienataraŭ, što naviedali Biełaruś, sa staršyniom pastajannaj kamisii Savieta respubliki pa mižnarodnych spravach i nacyjanalnaj biaśpiecy Ninaj Mazaj.

«Nam šmat chto kazaŭ, što ciapier u internet-kaviarniu možna zajści tolki z pradstaŭleńniem pašpartu. Spadarynia Mazaj nam adkazała, što hetyja praviły dziejničajuć tolki dla niepaŭnaletnich i tolki ŭ tych ustanovach, dzie adsutničajuć filtry na błakavańnie sajtaŭ, jakija źmiaščajuć ekstremisckija ci parnahrafičnyja materyjały. Mahčyma, spadarynia Mazaj nie vałodaje infarmacyjaj», — skazaŭ namieśnik staršyni kamiteta pa zamiežnych spravach, abaronie i biaśpiecy sienata Čechii Tomaš Irsa.

Dadamo, što zamiežnikam u pryncypie zdajucca dzikimi abmiežavańni, uviedzienyja ukazam № 60 i viejeram pastanovaŭ da jaho. I paśla hetaha našy vysokija čynoŭniki jašče dakazvajuć, što my — serca Jeŭropy.

0

0

0

0

0

0

Biełaruskija naviny

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH