Łukašenka palacieŭ u Turcyju

Alaksandr Łukašenka nakiravaŭsia z rabočym vizitam u Turcyju, paviedamiła pres-słužba prezidenta.

Płanujecca, što 2 kastryčnika adbudziecca jaho sustreča z prem'jer-ministram Redžepam Taipam Erdahanam u farmacie sam-nasam. Zapłanavanyja pieramovy z prezidentam krainy Abdułoj Hiulem. Padčas pieramoŭ baki «abmiarkujuć stan dvuchbakovych adnosinaŭ i najbolš pierśpiektyŭnyja kirunki dalejšaha supracoŭnictva dźviuch krain u roznych śfierach, a taksama aktualnyja pytańni mižnarodnaha paradku dnia».

Prahramaj vizitu «na bližejšyja dni» zapłanavany šerah sustreč z aficyjnymi pradstaŭnikami i dziełavymi kołami Turcyi.

Z momantu ŭstanaŭleńnia dypłamatyčnych adnosinaŭ pamiž Biełaruśsiu i Turcyjaj 25 sakavika 1992 hoda dźviuma krainami «dasiahnuty vysoki ŭzrovień palityčnych kantaktaŭ», zaznačajecca ŭ paviedamleńni. U linieni 1996 hoda adbyŭsia aficyjny vizit Łukašenki ŭ Turcyju, padčas jakoha byŭ padpisany dahavor ab družbie i supracoŭnictvie. Pamiž dźviuma krainami «raźvita halinovaje ŭzajemadziejańnie pa linii ministerstvaŭ i viedamstvaŭ».

U dvuchbakovym supracoŭnictvie «skłałasia praktyka ŭzajemnaj padtrymki kandydatur i mižnarodnych inicyjatyŭ u miežach AAN». Ažyćciaŭlajecca «ciesnaje ŭzajemadziejańnie ŭ miežach ABSIE, Rady Jeŭropy, Arhanizacyi Čarnamorskaha ekanamičnaha supracoŭnictva i ich parłamienckich struktur». Tureckaja delehacyja ŭ Parłamienckaj asamblei Rady Jeŭropy «padtrymlivaje pazicyju nacyjanalnaha schodu Biełarusi pa viartańni jamu statusu śpiecyjalnaha zaprošanaha».

Pa vynikach 2009 hoda tavaraabarot pamiž dźviuma krainami skłaŭ 266,8 młn. dołaraŭ. U studzieni-lipieni 2010 hoda «adznačany dynamičny rost pakazčykaŭ dvuchbakovaha handlu». Tavaraabarot skłaŭ 197,7 młn. dołaraŭ.

Asnovu biełaruskaha ekspartu ŭ Turcyju składajuć mietałapradukcyja, kalijnyja ŭhnajeńni, pradukty naftapierapracoŭki, lonavyja tkaniny, stanki. Turcyja ekspartuje ŭ Biełaruś aŭtamabili i zapčastki da ich, stanki, płodaaharodninnuju pradukcyju, bytavuju chimiju.

Pa vynikach 2009 hoda ŭ biełaruskuju ekanomiku pastupiła 9,7 młn dołaraŭ tureckich inviestycyj, u tym liku 9 młn dołaraŭ pramych. U pieršym paŭhodździ 2010 hoda tureckija inviestycyi dasiahnuli 5,6 młn dołaraŭ, u tym liku pramyja — 4,5 młn dołaraŭ. Asnoŭnyja paśpiachova realizavanyja inviestycyjnyja prajekty Turcyi i Biełarusi majuć miesca ŭ śfierach budaŭnictva (hatelny biźnies) i telekamunikacyj.

Zaraz «vyznačany šerah pierśpiektyŭnych prajektaŭ» dla prapracoŭki z tureckim bokam pa linii ministerstvaŭ pramysłovaści i enierhietyki, kancernaŭ «Biellehpram» i «Biełnaftachim».

• 0
• 0
• 0
• 0
• 0
• 0
• 0
• 0