Što i jak pieradavać u Žodzinski SIZA

«Prašu paviedamić hetuju infarmacyju ŭsim, chto ŭ ciapierašni čas źbiraje pieradačy dla asudžanych paśla niadzielnaha razhonu akcyi pratestu ŭ Miensku». Z hetymi słovami ŭ redakcyju «Narodnaj voli» datelefanavaŭsia svajak adnaho z asudžanych Jaŭhien Martunčyk.

Jaŭhien pavioz pieradaču ŭ Žodzinskaje SIZA i vyrašyŭ padzialicca paradami z tymi, čyich svajakoŭ aŭtazaki taksama vieźli siudy.

— Ježu i navat vadu tut nie prymajuć, usio heta lepš nie kuplać i nie vieźci. Treba pryvozić vopratku, a taksama tualetnyja prynaležnaści. Pryčym, pieradačy treba vieźci nie ŭ SIZA, a ŭ Žodzinski RUUS pa adrasie: vulica Suchahradskaja, 1.

Aficyjnuju kolkaść zatrymanych, jakija znachodziacca ŭ Žodzina, milicyja nie paviedamlaje. Nieaficyjna viadoma, što tut kala dvuchsot čałaviek. Žančyn raźmiaścili ŭ IČU pry Žodzinskim RUUS, a mužčyn — prama ŭ turmie. Praŭda, zatrymanych padčas akcyi pratestu trymajuć nie razam sa złačyncami, im adviali asobny błok.

***

Što možna pieradavać na Akreścina

Ciopłyja rečy. Najpierš aryštavanym na sutki spatrebiacca mienavita jany. Možna pasprabavać pieradać spalny miašok, ale pry hetym varta zachapić ciopłuju kurtku, abo dublonku, kali spalnik nie zachočuć pieradavać. Pakładzicie ŭ pieradaču niekalki źmienaŭ bializny, ciopłyja škarpetki i rušnik.

Srodki hihijeny. Zubnaja pasta, ščotka, myła, šampuń, tualetnaja papiera, dla žančyn srodki dla intymnaj hihijeny.

Leki. Najchutčej nie pieradaduć, a voś vitaminy mohuć uziać. Najlepš brać kompleksnyja, pašukajcie ŭ aptecy takija, što zdymajuć stres (pravierana na sabie). Štoranicy aryštantaŭ vodziać da dziažurnaha lekara toj vydaje aktyvavany vuhal i aśpiryn. U vypadku abvastreńnia tut vyklikajuć chutkuju pieršy vyklik biaspłatna. Nastupnyja – za košt pacyjenta.

Ježa. Niekalki hod jaje na Akreścina nie pieradajuć. Tolki kali ŭdasca pieradać aryštantu ŭ kalidorach suda. Zatoje prymajuć pitnuju vadu i soki. Karaciej, luboje biezałkaholnaje pitvo ŭ płastykavaj i papiarovaj tary. Časam žartaŭniki sprabujuć paradavać svaich aryštantaŭ dadavańniem u sok harełki. Lepš nie žartavać – kali vyjaviać parušalnika, to jamu mohuć pakarać dadatkovymi sutkami aryštu.

Presa, asadki, natatniki. Niasicie haziety, časopisy i knihi. Akramia surjoznaj presy prynoście zborniki kryžavanak i skanvordaŭ. Mnohija na sutkach viaduć natatki, tamu nie lišnim u torbie ź pieradačaj budzie natatnik i asadka, abo ałovak.

Cyharety. Tut vyrašajcie sami. Kali ž vyrašyli pieradać i ich, nie zabudźciesia na zapałki – zapalnički ŭ aryštantaŭ adbirajuć.

I apošniaje. Praktyka pakazvaje, što ŭ kožnaj kamiery byvaje niechta, kamu ź niejkich pryčynaŭ pieradačy nie prynosiać. Tamu nie paškadujcie kolki dadatkovych pačkaŭ cyharet, ci lišni pakunak soku. Paviercie, heta budzie zusim nie lišnim.

***

Nahadajem, što 19 śniežnia ŭ časie akcyj pratestu byli zatrymanyja sotni demanstrantaŭ. 20 śniežna na pres-kanfierencyi Alaksandr Łukašenka ahučyŭ ličbu — 639. Pa apošnich źviestkach, ź ich užo asudžana kala 580 čałaviek. Pa śviedčańniach vidavočcaŭ, u čakańni sudoŭ mnohim z zatrymanych daviałosia dźvie nočy pravieści ŭ chałodnych aŭtazakach. Pa śviedčańniach žurnalista «Gazeta Wyborcza» Andreja Pačobuta, siarod zatrymanych šmat vypadkovych.

***

Pa hetych numarach možna daviedacca pra tych, kaho sudziać u minskich sudach:

Ofis BCHK: +37517 2224801

Pravaabarončy centr «Viasna»: +375173310844; +375296875129

• 0
• 0
• 0
• 0
• 0
• 0
• 0
• 0