Na apošnim łapiku Niamihi pastaviać piacipaviarchovuju sparudu
Ad vulicy Kamsamolskaj da Haradzkoha vału pastaviać hramadzka-handlovy kompleks. Novaja sparuda budzie paŭtarać abličča parkinhu, jaki budujecca nasuprać Kaciarynienskaj carkvy. Roźnica tolki ŭ habarytach – novy hmach budzie našmat daŭžejšym.
Havorka pra toje, jakim być novamu kompleksu daŭžynioj u ceły histaryčny kvartał, išła na architekturna-horadabudaŭničaj naradzie pry hałoŭnym architektary Miensku, paviedamlaje «Viečiernij Minsk».
Praktyčna architektary, jakija pracujuć nad prajektam kompleksu, prapanavali zrabić jaho ŭ tym samym styli, što i Handlovy dom «Słavianski»: nižnija pavierchi zakryć vitražami, jakija imitujuć vody Niamihi, a vierchnija stylizavać pad damki minułaha stahodździa. Piešachodny balkon-platforma, jaki idzie ŭzdoŭž usiaho fasadu, admiažuje vierchniuju častku ad nižniaj. Faktyčna heta paŭtareńnie abličča abjektu, jaki ŭžo budujecca, roźnica tolki ŭ habarytach – novy kompleks budzie našmat daŭžejšy za HC «Słavianski». Mienavita heta i vyklikała niepryniaćcie takoha rašeńnia architekturnaj radaj. Zaduža manatonnaj moža atrymacca zabudova hetaha boku vulicy.
Siabry rady prapanavali pašukać jakojeś inšaje abličča budučaha abjektu, «padzialić» budynak arkami albo inšymi sposabami; mahčyma, dadać piešachodnyja mastki cieraz vulicu Niamihu (pakul ad hetaha kompleksu miarkujecca adzin mastok da Handlovaha domu «Na Niamizie», taksama zaplanavanaja piešachodnaja suviaź z HD «Słavianski»); pradumać metazhodnaść piešachodnaj platformy ŭzdoŭž usiaho fasadu. Budynak, na dumku rady, pavinien vyhladać pryvabna nia tolki z boku vulicy Niamihi, ale i z skryžavańnia z Haradzkim Vałam.
Što ŭžo viadoma pra kompleks – jahonaje funkcyjanalnaje pryznačeńnie. Aproč padziemnaha ŭzroŭniu, na jakim raźmieścicca parkoŭka, tut «vyraście» piać pavierchaŭ. Na troch nižnich pavierchach buduć nievialikija handlovyja abie'kty, niekalki kaviarniaŭ, restaran, fitnes-centry, vystaŭnyja pamiaškańni. Dva vierchnija pavierchi zojmuć ofisy. Ahulnaja płošča kompleksu planujecca 4,5 tysiačy kv. metraŭ. Zajaždžać u budynak možna budzie i z vulicy Revalucyjnaj, i z Kamsamolskaj.
Praŭda, u budučyni abiedźvie hetyja vulicy mierkavałasia zrabić piešachodnymi. Tamu na radzie prahučała prapanova pakinuć vulicu Kamsamolskuju prajaznoj, kab adtul možna było padjaždžać da abjektu.
Pamior paet Uładzimir Karyzna, aŭtar słoŭ da ciapierašniaha dziaržaŭnaha himna Biełarusi8
Pamior paet Uładzimir Karyzna, aŭtar słoŭ da ciapierašniaha dziaržaŭnaha himna Biełarusi
Viadomy partret Kahanca akazaŭsia savieckim fejkam, zatoje znajšłosia adzinaje fota archieołaha Tatura. Razhadanyja fotatajamnicy Biełaruskaha muzieja ŭ Vilni
Kamientary