Carlsberg Group atrymała kantrolny pakiet akcyj «Alivaryi»

Kampanija Baltic Beverages Holding AB (VVN), jakaja naležyć Carlsberg Group, u vyniku šerahu ŭhodaŭ, u tym liku praz publičnuju prapanovu ab vykupie akcyj, pavialičyła svaju dolu ŭ statutnym fondzie AAT «Piŭzavod «Alivaryja» da 67,8%.

Pra heta BiełaPAN paviedamili ŭ «Alivaryi».

Nahadajem, letam 2010 hoda VVN pavialičyła pakiet akcyj u «Alivaryi» z 30 da 47%.

«Takoje surjoznaje pavieličeńnie pakieta akcyj u statutnym fondzie adnaho ź viadučych pivavarnych pradpryjemstvaŭ Biełarusi źjaŭlajecca łahičnym krokam u realizacyi stratehii Carlsberg Group, skiravanaj na ŭmacavańnie pazicyj u rehijonie Uschodniaja Jeŭropa, — adznačyli na pradpryjemstvie. — Heta pahadnieńnie dazvalaje AAT «Piŭzavod „Alivaryja“ stać paŭnapraŭnaj častkaj hrupy i atrymać dostup da mižnarodnaha vopytu ŭ halinie prodažu i markietynhu, a taksama da pieradavych technałohij pivavarstva».

Nabyvajučy kantrolny pakiet akcyj AAT «Piŭzavod «Alivaryja», hrupa kampanij Carlsberg tym samym paćviardžaje svaje namiery i ŭ dalejšym umacoŭvać i raźvivać prysutnaść u Biełarusi i va Uschodniaj Jeŭropie, zajaviŭ staršy vice-prezident Carlsberg Group pa Uschodniaj Jeŭropie Anton Arciemjeŭ. «My ličym biełaruski rynak piva vielmi pierśpiektyŭnym i płanujem aktyŭna raźvivać biźnies „Alivaryi“ razam z našym stratehičnym partnioram u Biełarusi — Jeŭrapiejskim bankam rekanstrukcyi i raźvićcia (JEBRR). Z pazicyi Carlsberg heta aznačaje abjadnańnie našaha mižnarodnaha vopytu i viedańnia miascovaha rynku i razumieńnia biełaruskich spažyŭcoŭ», — adznačyŭ jon.

«My płanujem i dalej raźvivać našy pazicyi na rynku i vypuskać paśpiachovyja navinki, vykarystoŭvajučy nou-chau Carlsberg Group, dla zadavalnieńnia patrabavalnych zapytaŭ biełaruskich spažyŭcoŭ. Akramia taho, pierad tymi našymi supracoŭnikami, chto imkniecca budavać mižnarodnuju karjeru, adkryjecca šmat novych mahčymaściaŭ», — skazaŭ hienieralny dyrektar AAT «Piŭzavod «Alivaryja» Michaił Čečanieŭ.

Carlsberg Group — adna ź pivavarnych hrup, jakija lidzirujuć u śviecie, vałodaje šyrokim partfielem brendaŭ piva i inšych napojaŭ. Fłahmanski brend kampanii — Carlsberg — źjaŭlajecca adnym z najbolš viadomych piŭnych brendaŭ u śviecie. «Bałtyka», Carlsberg i Tuborg uvachodziać u šeść najbujniejšych brendaŭ Jeŭropy. U Carlsberg Group pracuje bolš za 43 tys. čałaviek, a jaje pradukty pradajucca bolš jak na 150 rynkach.

Piŭzavod «Alivaryja» vyrablaje 15 hatunkaŭ piva pad markami «Alivaryja», «Brovar», «Data 1864». Zavod zasnavany ŭ 1864 hodzie. Kolkaść supracoŭnikaŭ — 475. «Alivaryja» zajmaje treciaje miesca na piŭnym rynku Biełarusi. Druhim paśla Carlsberg Group bujnym akcyjanieram AAT «Piŭzavod «Alivaryja» źjaŭlajecca JEBRR (21% akcyj). Astatnija akcyi naležać fizičnym asobam.

Maryna Nosava, BiełaPAN.

• 0
• 0
• 0
• 0
• 0
• 0
• 0
• 0