Vyšejšy haspadarčy sud pryniaŭ da razhladu skarhu «Aŭtaradyjo»

Siońnia Juryju Bazanu, hieneralnamu dyrektaru «Aŭtaradyjo», viaščańnie jakoha było prypyniena z 12 studzienia zahadam Respublikanskaj kamisii pa telebačańni i radyjoviaščańni, paviedamili ŭ Vyšejšym haspadarčym sudzie, što heta vyšejšaja sudovaja instancyja budzie razhladać jaho apelacyjnuju skarhu.

Sam dakument z Vyšejšaha haspadarčaha sudu Jury Bazan jašče nia bačyŭ, — jaho vysłali pa pošcie, ale pra sutnaść jamu paviedamili: «Tak, heta vyznačeńnie sudu pa ŭzbudžeńni spravy ŭ vytvorčaść. Tamu budzie vyznačeńnie, niejkaja data razhladu ŭžo pryznačanaja. Jak mnie patłumačyli, admovy niama, budzie razhlad spravy pa sutnaści».

Juryst Biełaruskaj asacyjacyi žurnalistaŭ Andrej Bastuniec pierakanany, što rašeńnie Respublikanskaj kamisii pa telebačańni i radyjoviaščańni anulavać dazvoł na tranślacyju «Aŭtaradyjo» u FM efiry niezakonnaje pa niekalkich punktach. Spadar Bastuniec źviartaje ŭvahu na asnoŭnyja: «Heta rašeńnie sapraŭdy niezakonnaje chacia b tamu, što ŭ im jość spasyłka na toje, što „Aŭtaradyjo“ pieradavała ŭ efir ekstremisckija materyjały. Ale ž zhodna z Zakonam ab procidziejańni ekstremisckaj dziejnaści pryznać materyjały ekstremisckimi moža tolki sud, a nie orhan suviazi. Tolki sud, i tolki paśla zvarotu ŭ jaho Kamiteta dziaržaŭnaj biaśpieki. A ŭ nas takija rašeńni biare na siabie Respublikanskaja kamisija pa telebačańni i radyjoviaščańni».

Bolš za toje, u samim rašeńni Respublikanskaj kamisii nie paznačana, jakija kankretna materyjały stali padstavaj dla zakryćcia «Aŭtaradyjo». Hieneralny dyrektar radyjostancyi Jury Bazan miarkuje, što ekstremisckija zakliki ŭłady pačuli ŭ vystupie Andreja Sańnikava, jaki ŭ ahitacyjnym roliku skazaŭ, što «los krainy vyrašajecca nie na kuchni, a na płoščy». Heta ž vykazvańnie 2 śniežnia nadrukavała i «Sovietskaja Biełoruśsija», hučała jano i efiry Biełaruskaha radyjo i pa telebačańni, adnak da dziaržaŭnych ŚMI pretenzijaŭ čamuści niama. Da taho ž, nijakich pretenzij da viaščańnia raniej taksama nie było, užo paśla spynieńnia viaščańnia 13 studzienia «Aŭtaradyjo» atrymała papiaredžańnie «zadnim čysłom», datavanaje 10-m studzienia.

Juryst BAŽ Andrej Bastuniec vykazaŭ takoje mierkavańnie: «Ciaham hodu „Aŭtaradyjo“ nie atrymlivała nijakich zaŭvahaŭ ci papiaredžańniaŭ z boku rehistracyjnych orhanaŭ. Heta taksama śviedčyć ab štučnaści pretenzij voś hetaj kamisii da FM stancyi. Havorka ž u rašeńni nie idzie ab prypynieńni albo spynieńni srodku masavaj infarmacyi. ŚMI zarehistravany, ale ž danosić hetuju samuju infarmacyju jon stračvaje mahčymaść, bo pazbaŭleny prava voś hetaha efirnaha viaščańnia. Tut my bačym inšy padychod i inšy, dadatkovy mechanizm cisku na radyjokampaniju».

Hieneralny dyrektar «Aŭtaradyjo» Jury Bazan spadziajecca na abjektyŭny razhlad svajoj apelacyjnaj skarhi Vyšejšym haspadarčym sudom:

«Ja ŭžo nieadnarazovy sustrakaŭsia pa roznych spravach z Vyšejšym haspadarčym sudom. U pryncypie, pa raniejšych spravach u ich usio było hruntoŭna i kampetentna».

Hladzi jašče: Juryj Bazan: «Aŭtaradyjo» zakryli niezakonna

• 0
• 0
• 0
• 0
• 0
• 0
• 0
• 0