Jak ja ŭ musulmanaŭ dyplom zarabiŭ

Dyskusija z nahody taho, što internet-hazeta Naviny.by atrymała rasiejskuju premiju, padajecca symptamatyčnaj.

A mienavita: na dyskusijnym absiahu ajčynnaha Sieciva jość katehoryja krytykaŭ, jakija pad lupaju vyšukvajuć prykmiety zdrady nacyjanalnaj spravie. Pryčym ichni asabisty ŭniosak u hetu spravu zbolšaha zastajecca tajamnicaj. A dziaŭbuć tych, chto niešta robić.

Dyk voś, nie bajučysia zališniaha patasu, možna kazać, što BiełaPAN z vejeram jahonych prajektaŭ užo zabiaśpiečyŭ sabie hodnaje miesca ŭ historyi ajčynnych medyjaŭ. Niekali na žurfaku buduć vyvučać hety fenomen: jak va ŭmovach žorstkaha aŭtarytaryzmu, zdušeńnia volnaha słova trymała ŭdar, macavałasia i štodzień raspaviadała praŭdu pra Biełaruś pieršaja niezaležnaja infarmacyjnaja kampanija.

Niedziaržaŭnym medyjam, kab vy viedali, datacyjaŭ ź biudžetu nie dajuć. A treba ž nia tolki vyžyvać, ale i płacić padatki, i ŭkładać hrošy ŭ perspektyvu. Heta robicca za košt prodažu svajho infarmacyjnaha praduktu.

Nia vydam vialikaha sakretu, kali zaznaču, što trylinhvizm BiełaPANu (biełaruskaja, anhielskaja i rasiejckaja movy) tłumačycca ŭ tym liku i kamercyjnymi mierkavańniami. I tut niama ničoha zahannaha.

Va ŭsiakim razie, chaj kinie kamień toj, chto zrobić z nula niešta padobnaje ŭ bolej rafinavanym vyhladzie.

Darečy, voś kreda prajektu Naviny.by.

Jak bačycie, usie akcenty rasstaŭleny: i pryjarytet niezaležnaści, i dapamoha ajčynnym rehijanalnym medyjam, i raźvićcio biełaruskaj movy, i navat pavaha da taraškievicy.

Pisaŭsia ž tekst u 2002 hodzie pry niepasrednym udziele aŭtara hetych radkoŭ.

Reč u tym, što mnie było prapanavana stać pieršym hałoŭnym redaktaram internet-hazety Naviny.by. Adpracavaŭ u henym amplua bolej za dva hady.

I kali rasiejskija medyi źviartalisia pa interviju, nie ličyŭ hańbaj raspavieści pra naš medyjny prajekt i ŭvohule pra biełaruskija spravy na movie susiedniaj krainy.

Ci voś niadaŭna analahičnym čynam trochi prareklamavaŭ ajčynnuju błahasferu :)

Čym šyrej buduć pra nas viedać, tym lepiej. A ad taho, što interviju pa-rasiejsku, nu daliboh, karona nie zvaliłasia :)

Darečy, Naviny.by čytajuć praktyčna va ŭsich kutkach ziamnoj kuli. Navat ŭ Iranie, Kot dJIvuary, na Trynidadzie i Tabaha. Pryčym zamiežnych naviednikaŭ usio boleje. Statystyka absalutna dakładnaja, u Siecivie ž fiksujecca kožny klik.

Miarkuju, što ŭ Afrycy, Łacinskaj Amerycy, arabskim śviecie resurs cikavy mnohim z tych, chto niekali atrymlivaŭ u nas adukacyju. Tak, na rasiejskaj movie. Ale ž hałoŭnaje, na moj pohlad, toje, što ŭ vyniku śviet bolej daviedvajecca pra Biełaruś ź niezaležnaj infarmacyjnaj krynicy.

Što ž da nazovu toj premii, dyk — nu što zrobiš, u rasiejcaŭ svaje kompleksy! Jany nie zaŭvažajuć navat, što damen nia ichni: Naviny ž, u rešcie reštaŭ — .BY, a nia .RU!

Ź inšaha boku, tyja ludzi ŭ Maskvie, dajučy ŭznaharodu, de-fakta pryznali pośpiechi intelektualnaj elity niezaležnaj Biełarusi. Chiba kiepska?

Zrazumieła, dla nas nacyjanalnaja, u pryvatnaści, moŭnaja prablematyka z šerahu pryčynaŭ asabliva adčuvalnaja, dyskusijnaja. I spračacca varta. Niecikava tolki, kali sprava zvodzicca da vyśviatleńnia, chto samy śviadomy.

Voś tut ja pra heta trochi pisaŭ užo.

...Dobra, ale pry čym tut, spytajecie vy, musulmany ŭ zahałoŭku?

Adkazvaju. U maim asabistym archivie lažyć dyplom, napisany arabskaj viaźziu.

U 1998 hodzie daviałosia ŭ miežach adnaje adukacyjnaje prahramy ciaham dvuch tydniaŭ słuchać ŭ Ehipcie lekcyi tamtejšaj prafesury. Davoli vyrazna adčuvaŭsia i podych isłamu.

Jahony upłyŭ tam zaŭvažna macniejšy, čym jak u vesternizavanaj Tureččynie. U Ehipcie isłam sunickaha kštałtu jość dziaržaŭnaj relihijaj.

Dyk voś, z katedry nam davodzili, u pryvatnaści, prahresiŭnaść kałymu i prava mužčyny mieć da čatyroch žonak. Tłumačyli i sutnaść džyhadu.

Na zakančeńnie halantnyja arhanizatary biez anijakich ekzamenaŭ prezentavali ŭsim słuchačam sertyfikaty, što kurs zasvojeny naležnym čynam.

Dyk voś, zakidać resursu Naviny.by "imperski" dyplom — prykładna toje samaje, što aŭtara hetych radkoŭ na padstavie vydadzienaha mahametanami sertyfikatu padazravać u suviaziach ź bin Ladenam :)

P.S. A pra ehipieckija pryhody mo' jašče raspaviadu. My ž tam nia tolki lekcyi słuchali :)

Pavialičyć

Miž inšym, pahladziecie na fota, Cheopsava piramida zblizku zusim nie takaja, jak ŭjaŭlajecca zavočna.

• 0
• 0
• 0
• 0
• 0
• 0
• 0
• 0