ZBS «Baćkaŭščyna» zasnavała premiju imia Ihnata Dvarčanina

Z nahody 115-hadovaha jubileju vybitnaha biełaruskaha dziejača Ihnata Dvarčanina, jaki adznačaŭsia ŭ 2010 h., z metaj padtrymki i papularyzacyi daśledavańniaŭ i publikacyj, pryśviečanych historyi i kultury biełaruskaha zamiežža, Zhurtavańnie biełarusaŭ śvietu «Baćkaŭščyna» zasnavała premiju imia Ihnata Dvarčanina.

Pryjom prac na atrymańnie premii budzie vieścisia da 30 krasavika 2011 h.

Płanujecca, što premija budzie štohadovaj. Uručacca jana budzie na dzień narodzinaŭ Ihnata Dvarčanina, 27 traŭnia, pa vynikach papiaredniaha hoda.

Naminacyi, u jakich uručajecca premija:

— daśledčaja praca;

— daśledčy artykuł;

— publikacyja spadčyny biełaruskaha zamiežža.

U zaležnaści ad plonu kožnaha asobnaha hoda, premija imia Ihnata Dvarčanina moža być prysudžana ŭ adnoj ci niekalkich naminacyjach.

Na premiju imia Ihnata Dvarčanina vyłučajucca daśledčyja pracy, u tym liku, knihi i artykuły, pryśviečanyja historyi i kultury biełaruskaha zamiežža, biblijahrafii, publikacyi tvoraŭ mastactva, uspaminaŭ, epistalarnaj i inšaj spadčyny biełaruskaha zamiežža, apublikavanyja ciaham papiaredniaha hoda.

Asnoŭnymi kryterami adboru kandydataŭ na atrymańnie premii imia Ihnata Dvarčanina źjaŭlajucca:

aryhinalnaść i navizna tematyki, daśledčaha padychodu i samich apublikavanych materyjałaŭ i tvoraŭ, hruntoŭnaść i značnaść praroblenaj pracy.

Mova publikacyj nie maje značeńnia dla naminavańnia na premiju. Dla inšamoŭnych publikacyj (akramia publikacyj na ŭkrainskaj, polskaj, anhlijskaj i ruskaj movach) pry naminavańni treba pradstavić reziume na biełaruskaj abo anhlijskaj movie.

Pravam vyłučeńnia prac na premiju imia Ihnata Dvarčanina vałodajuć jak aŭtary ci vydaŭcy daśledčych prac, tak i inšyja fizičnyja i jurydyčnyja asoby ź Biełarusi i zamiežža.

Prosim zacikaŭlenych asobaŭ dasyłać publikacyi-pretendenty da 30 krasavika 2011 h. na elektronny adras [email protected] (z paznakaj: Premija imia Ihnata Dvarčanina) abo pa pošcie na adras: 220012 h. Minsk, vuł. Kuźmy Čornaha, 31 ofis 906, Zhurtavańnie biełarusaŭ śvietu «Baćkaŭščyna».

Vyznačeńniem pieramožcaŭ premii zajmajecca śpiecyjalnaje žury, u skład jakoha ŭvachodziać: Aleh Hardzijenka, Radzim Harecki, Valery Hierasimaŭ, Vitaŭt Kipiel, Arsien Lis, Alena Makoŭskaja, Mikoła Nikałajeŭ, Nina Šydłoŭskaja, Lavon Jurevič.

Pieramožcy premii atrymajuć uznaharodžańnie.

***

Ihnat Dvarčanin (27.05.1895 — 8.12.1937) — dziejač biełaruskaha nacyjanalnaha ruchu, palityk, historyk, litaraturaznaŭca, paet. Udzielnik biełaruskich arhanizacyj u roznych biełaruskich asiarodkach za miažoj. U 1926 h. u Prazie abaraniŭ dysiertacyju «Francysk Skaryna jak kulturny dziejač i humanist na biełaruskaj nivie». Aŭtar šerahu skarynaznaŭčych prac i składalnik «Chrestamatyi novaj biełaruskaj litaratury (ad 1905 hoda)» (Vilnia, 1927). U 1933 h. byŭ aryštavany pa spravie «Biełaruskaha nacyjanalnaha centra» i pryhavorany da vyšejšaj miery pakarańnia.

• 0
• 0
• 0
• 0
• 0
• 0
• 0
• 0