«Terarysta, što padarvaŭ mietro, znajšli za sutki, a ŭ hetaj kryminalnaj spravie zastoj»

7 maja 1999 hoda bližej da paŭnočy pa šlachu dadomu ŭ rajonie vulicy Žukoŭskaha ŭ Minsku z užyvańniem hvałtu niavyśvietlenymi asobami byŭ vykradzieny i vyviezieny na lehkavym aŭtamabili ŭ nieviadomym kirunku Jury Zacharanka.

Kryminalnaja sprava pa fakcie źniknieńnia eks-ministra ŭnutranych spravaŭ było ŭzbudžanaja tolki 17 vieraśnia taho ž hoda pa prykmietach złačynstva, praduhledžanaha artykułam 101 Kryminalnaha kodeksa («Naŭmysnaje zabojstva»). Z tych časoŭ termin śledstva kožnyja try miesiacy padaŭžajecca; čarhovy — skančajecca 24 červienia 2011 h.

Zredku ŭ adkaz na svaje zvaroty svajaki Zacharanki atrymlivajuć z Hienieralnaj prakuratury teksty prykładna takoha źmiestu: «Praca pa raskryćci i rasśledavańni hetaha złačynstva praciahvajecca. Vyłučanyja i daśledujucca roznyja viersii ździajśnieńnia ŭ dačynieńni Zacharanki Ju.A. supraćpraŭnych dziejańniaŭ, u tym liku z chcivaści, na hlebie asabistych niepryjaznych adnosinaŭ, u suviazi ź jaho palityčnaj dziejnaściu, a taksama šerah inšych».

16 kastryčnika 1995 «za dapuščanaje hrubaje parušeńnie finansavaj dyscypliny, jakoje vyjaviłasia ŭ niametavym vykarystańni biudžetnych srodkaŭ, i niezdavalniajučuju baraćbu z złačynnaściu» Jury Zacharanka byŭ vyzvaleny ad pasady ministra ŭnutranych spraŭ. Na pieršaj pres-kanfierencyi ŭ statusie eks-ministra Zacharanki paviedamiŭ, što pryčynaj zvalnieńnia ličyć kanflikt z prezidentam i jaho asiarodździem, bo jon «bolš nie moh tryvać biezzakońnia, jakoje jany tvaryli». Ukazam prezidenta ad 16 krasavika 1996 hienierał-major Zacharanka byŭ panižany ŭ zvańni da pałkoŭnika i zvolnieny ŭ zapas pa vysłuzie hadoŭ. Paśla adstaŭki byŭ členam Nacyjanalnaha kamiteta Abjadnanaj hramadzianskaj partyi, zajmaŭsia stvareńniem hramadskaj arhanizacyi «Sajuz aficeraŭ Biełarusi». Napiaredadni źniknieńnia uznačaliŭ vybarčy štab eks-prem'jer-ministra Michaiła Čyhira — kandydata ŭ prezidenty na alternatyŭnych vybarach (sakavik-lipień 1999 hoda).

Žonka, dźvie dački i ŭnuki Zacharanki emihravali ŭ Niamieččynu, dzie atrymali palityčny prytułak. Mama Juryja Zacharanki Uljana Ryhoraŭna žyvie ŭ Biełarusi.

«Dziŭna! — kaža jurydyčny pradstaŭnik siamji Zacharanka Aleh Voŭčak. — Terarysta, što padarvaŭ minskaje mietro, znajšli za sutki, a ŭ hetaj kryminalnaj spravie poŭny zastoj. Za minułyja hady śledstva nie dało adkazu ni na adno pytańnie, jakija stavili udava Juryja Mikałajeviča i jaho mama…

Chto prachodziŭ abo prachodzić padazravanym pa hetaj spravie? Chto z supracoŭnikaŭ pravaachoŭnych orhanaŭ i śpiecsłužbaŭ adpracoŭvaŭsia na pradmiet datyčnaści da vykradańnia Zacharanki? Ci vyvučalisia materyjały vonkavaha nazirańnia za Juryjem Zacharanki, jakoje, pa najaŭnych źviestkach, było ŭstanoŭlena za im napiaredadni jaho vykradańnia? Ci praviarałasia viersija vykradańniaŭ Juryja Zacharanki, a taksama Viktara Hančara, Anatola Krasoŭskaha i Dźmitryja Zavadskaha, pakazanyja byłymi śledčymi prakuratury Aleham Słučakam i Dźmitryjem Pietruškievičam i byłym načalnikam śledčaha izalatara Minska Aleham Ałkajevym? Bo mienavita jany pieršyja zajavili, što ŭ krainie dziejničaje bandfarmavańnie zvanaje ŭ narodzie «eskadronam śmierci».

Byłyja supracoŭniki prakuratury Dźmitryj Pietruškievič i Aleh Słučak ŭ červieni 2001 hoda zajavili ab datyčnaści šerahu bujnych čynoŭnikaŭ i kiraŭnikoŭ siłavych struktur Biełarusi da vykradańniaŭ lideraŭ apazicyi Juryja Zacharanki, Viktara Hančara, biznesmena Anatola Krasoŭskaha, žurnalista Dźmitryja Zavadskaha i šerahu inšych ciažkich złačynstvaŭ. Abodva supracoŭniki emihravali ŭ ZŠA, dzie atrymali palityčny prytułak.

Śledstva pa spravach źnikłych ludziej aktyvizavałasia vosieńniu 2000 hoda. 23 listapada 2000-ha byŭ aryštavany i kamandzir bryhady śpiecnaza ŭnutranych vojskaŭ MUS Dźmitryj Paŭličenka. Jaho aryštu papiaredničali raparty načalnika SIZA № 1 Aleha Ałkajeva — ab vymańni rasstrelnaha pistaleta napiaredadni źniknieńniaŭ Zacharanki, Hančara i Krasoŭskaha, — i načalnika Hałoŭnaha ŭpraŭleńnia kryminalnaj milicyi MUS Mikałaja Łapacika — pra toje, što ŭsie źnikłyja zabityja (z zhadvańniem datyčnych da hetaha asob) i miescy ich pachavańnia (śpiecučastak mahił na Paŭnočnych mohiłkach).

Adnak u SIZA Paŭličenka pravioŭ usiaho niekalki hadzin. Pa čutkach, jon byŭ vypuščany pa rasparadžeńni prezidenta. 27 listapada 2000 h. svaich pasadaŭ pazbavilisia hienieralny prakuror Aleh Bažełka i staršynia KDB Uładzimir Mackievič.

Hienierała Łapacika adpravili ŭ adstaŭku, u adnym ź intervju, kali jaho spytali ab tych padziejach, jon zajaviŭ: «Ja ŭsio zabyŭsia». Pałkoŭnik Ałkajeŭ źbieh u Niamieččynu, dzie atrymaŭ palityčny prytułak.

… Epizadyčna ŭ internecie źjaŭlajucca roznyja paviedamleńni až da padrabiaznaściaŭ apošnich chvilin žyćcia Juryja Zacharanki. Maŭlaŭ, jość takaja videazapis, jakuju niejkija ludzi chočuć pradać za 250 tysiač dalaraŭ. Adnak aficyjnych zajavaŭ pa hetym pytańni tradycyjna niama. I tak — užo dvanaccać hadoŭ.

Niekali Juryj Sivakoŭ, kali byŭ na pasadzie ministra ŭnutranych spraŭ, śćviardžaŭ, što raskryć złačynstva, źviazanaje sa źniknieńniem jaho papiarednika — «sprava honaru». Sprava jość. Z astatnim, padobna, zusim drenna…

* * *

Juryj Zacharanka naradziŭsia 4 studzienia 1952 u vioscy Vasilevičy Rečyckaha rajona Homielskaj vobłaści. Uznačalvaŭ MUS Biełarusi ad 28 lipienia 1994 da 16 kastryčnika 1995 hoda. Paśla adstaŭki byŭ členam Nacyjanalnaha kamiteta Abjadnanaj hramadzianskaj partyi, zajmaŭsia stvareńniem hramadskaj arhanizacyi «Sajuz aficeraŭ Biełarusi». Uznačaliŭ vybarčy štab eks-prem'jer-ministra Michaiła Čyhira — kandydata ŭ prezidenty na alternatyŭnych vybarach (sakavik-lipień 1999). Źnik 7 maja 1999.

* * *

Uviečary 16 vieraśnia 1999 lider biełaruskaj apazicyi Viktar Hančar i jaho siabar biźniesmien Anatol Krasoŭski, vyjšli z łaźni ŭ centry Minska i biasśledna źnikli. Na miescy zdareńnia byli znojdzieny askiepki škła i kroŭ. Ekśpiertyza vyjaviła, što askiepki škła — ad džypa Krasoŭskaha, a kroŭ naležyć Hančaru. Vykradalniki nie byli znojdzienyja.

7 lipienia 2000 pa darozie ŭ aeraport «Minsk -2» źnik apieratar rasijskaha kanała ORT Dźmitryj Zavadski. Jaho mašyna była znojdzienaja na stajancy aeraporta. Pa spravie ab vykradańni Zavadskaha asudžanyja pažyćciova dvoje byłych bajcoŭ antyterarystyčnaha padraździaleńnia «Ałmaz» Valeryj Ihnatovič i Maksim Malik. Cieła Zavadskaha nie znojdzienaje.

• 0
• 0
• 0
• 0
• 0
• 0
• 0
• 0