Praces Sieviarynca, Chalip, Marcaleva

Šerah supracoŭnikaŭ DAI, jakija byli dapytany siońnia ŭ sudzie Zavodskaha rajona Minska jak śviedki abvinavačańnia pa spravie Iryny Chalip, Paŭła Sieviarynca i Siarhieja Marcaleva, nie ŭpeŭnieny ŭ tym, što mitynhoŭcy mahli čuć papiaredžańni ab niesankcyjanavanym charaktary akcyi 19 śniežnia.

U pryvatnaści Michaił Čarnabaj, jaki ŭ toj viečar vykonvaŭ abaviazki kamandzira ŭzvodu DAI HUUS Minharvykankama i znachodziŭsia ŭ łancuhu supracoŭnikaŭ Dziaržaŭtainśpiekcyi na Kastryčnickaj płoščy, paviedamiŭ, što hučała mocnaja muzyka. Z-za hetaha jon nie čuŭ paviedamleńniaŭ ab niesankcyjanavanym charaktary mitynhu i zaklikaŭ razyścisia.

Razam z tym Čarnabaj bačyŭ, jak kandydaty ŭ prezidenty Dźmitryj Us, Andrej Sańnikaŭ i Mikałaj Statkievič, a taksama Pavieł Sieviaryniec razmaŭlali z načalnikam DAI Karziukom. Jany prasili Karziuka dazvolić ludziam prajści pa prajeznaj častcy praśpiekta Niezaležnaści ŭ bok płoščy Niezaležnaści.

Karziuk, pavodle słoŭ Čarnabaja, zaklikaŭ ludziej viarnucca na tratuary i nie pieraškadžać ruchu hramadskaha transpartu. Zatym «pastupiła kamanda vyzvalić praśpiekt i dać ludziam iści, kudy jany chočuć», paviedamiŭ śviedka.

Čarnabaj dadaŭ, što kali jaho ŭzvod pieramiaściŭsia na płošču Niezaležnaści, jon i tam nie čuŭ zaklikaŭ da demanstrantaŭ razyścisia.

Śviedka Ivan Šmarłoŭski, taksama supracoŭnik DAI HUUS, paviedamiŭ, što stajaŭ u ačapleńni na Kastryčnickaj płoščy i z-za hučnaj muzyki taksama nie čuŭ nijakich papiaredžańniaŭ.

Anałahičnyja pakazańni dali i niekatoryja inšyja śviedki abvinavačańnia.

Razam z tym staršy inśpiektar hrupy dazvolnaj pracy HUUS Minharvykankama Juryj Karalkoŭ zajaviŭ, što 19 śniežnia jon znachodziŭsia ŭ mašynie z hukaŭzmacnialnaj aparaturaj u rajonie vulicy Savieckaja. «Pryblizna ŭ 20.30 pastupiła kamanda pieramiaščacca na płošču Niezaležnaści i pačać čytać tekst (papiaredžańnia pra niesankcyjanavany mitynh), tamu što kałona demanstrantaŭ užo zajšła na płošču Niezaležnaści», — paviedamiŭ jon.

Karalkoŭ śćviardžaje, što, znachodziačysia ŭ mašynie, jakaja stajała nasuprać uvachodu ŭ hałoŭny korpus BDU, jon pryblizna 10 razoŭ začytaŭ tekst papiaredžańnia na ruskaj i biełaruskaj movach. Što ŭ hety čas adbyvałasia na płoščy, Karalkoŭ nie bačyŭ, bo, pavodle jaho słoŭ, začytvaŭ tekst, nie padymajučy vačej ad arkuša papiery.

Jašče adzin supracoŭnik HUUS, Kirył Kisłoŭ, paviedamiŭ, što znachodziŭsia ŭ takoj ža mašynie ŭ rajonie Kastryčnickaj płoščy. Zatym pastupiła kamanda vyjazdžać na płošču Niezaležnaści i čytać tam tekst. Pavodle słoŭ Kisłova, jaho mašynie daviałosia jechać pa praśpiekcie ŭ kancy kałony demanstrantaŭ. «Ja dva-try razy pračytaŭ tekst i spyniŭsia. Na płoščy Niezaležnaści jaho nie čytaŭ, tamu što takoj kamandy nie pastupała», — skazaŭ jon.

Karalkoŭ i Kisłoŭ u sudzie śćviardžali, što demanstranty mahli dobra čuć papiaredžańnie.

Adnak ich kaleha, supracoŭnik HUUS Ivan Sulžycki, pakazaŭ, što nie bačyŭ mašyn z hukaŭzmacnialnaj aparaturaj i nijakich papiaredžańniaŭ nie čuŭ.

U pasiadžeńni abvieščany pierapynak da 14.00. Zatym sud maje namier pačać vyvučeńnie materyjałaŭ spravy.

Taćciana Karaviankova, BiełaPAN.

• 0
• 0
• 0
• 0
• 0
• 0
• 0
• 0